ਫਰੀਦਕੋਟ: ਪੰਜਾਬੀ ਸਿਨੇਮਾ ਦੇ ਦਿੱਗਜ਼ ਅਦਾਕਾਰ ਵਜੋਂ ਆਪਣੀ ਪਹਿਚਾਣ ਬਣਾਉਣ 'ਚ ਸਫ਼ਲ ਰਹੇ ਅਦਾਕਾਰ ਮਹਾਵੀਰ ਭੁੱਲਰ ਹੌਲੀ-ਹੌਲੀ ਹਿੰਦੀ ਫ਼ਿਲਮ ਜਗਤ ਵਿੱਚ ਵੀ ਆਪਣੀ ਪਹਿਚਾਣ ਕਾਇਮ ਕਰਦੇ ਜਾ ਰਹੇ ਹਨ। ਹੁਣ ਅਦਾਕਾਰ ਮਹਾਂਵੀਰ ਭੁੱਲਰ ਆਉਣ ਵਾਲੀ ਹਿੰਦੀ ਫ਼ਿਲਮ 'ਸਫ਼ਰ' ਵਿੱਚ ਲੀਡ ਰੋਲ ਅਦਾ ਕਰਦੇ ਨਜ਼ਰ ਆਉਣਗੇ। ਇਸ ਫਿਲਮ 'ਚ ਸੰਨੀ ਦਿਓਲ ਸਮੇਤ ਹੋਰ ਵੀ ਕਈ ਮਸ਼ਹੂਰ ਐਕਟਰਜ਼ ਸ਼ਾਮਲ ਹਨ। ਵਿਸ਼ਾਲ ਰਾਣਾ ਦੁਆਰਾ 'ਏਕਲੋਨ ਪ੍ਰੋਡਕਸ਼ਨ' ਦੇ ਬੈਨਰ ਅਧੀਨ ਬਣਾਈ ਜਾ ਰਹੀ ਇਹ ਫ਼ਿਲਮ ਸਾਲ 2024 ਵਿੱਚ ਸਾਹਮਣੇ ਆਉਣ ਜਾ ਰਹੀਆ ਬਾਲੀਵੁੱਡ ਦੀਆਂ ਬਹੁ-ਚਰਚਿਤ ਅਤੇ ਬਿੱਗ ਸੈਟਅੱਪ ਫ਼ਿਲਮਾਂ ਵਿੱਚੋ ਇੱਕ ਹੈ। ਇਸ ਫਿਲਮ 'ਚ ਸੰਨੀ ਦਿਓਲ ਅਲੱਗ ਅਤੇ ਨਵੇ ਅਵਤਾਰ ਵਿੱਚ ਨਜ਼ਰ ਆਉਣਗੇ, ਜਿਸ ਤਰ੍ਹਾਂ ਦਾ ਰੋਲ ਉਨਾਂ ਵੱਲੋ ਹੁਣ ਤੱਕ ਅਪਣੀ ਕਿਸੇ ਵੀ ਫ਼ਿਲਮ ਵਿੱਚ ਅਦਾ ਨਹੀਂ ਕੀਤਾ ਗਿਆ ਹੈ।
ਮਿਲੀ ਜਾਣਕਾਰੀ ਅਨੁਸਾਰ, ਫ਼ਿਲਮ 'ਸਫ਼ਰ' ਦਿਲ ਨੂੰ ਛੂਹ ਲੈਣ ਵਾਲੀ ਕਹਾਣੀ 'ਤੇ ਆਧਾਰਿਤ ਹੈ। ਇਸ ਫਿਲਮ 'ਚ ਲੀਡ ਰੋਲ ਅਦਾ ਕਰ ਰਹੇ ਮਹਾਵੀਰ ਭੁੱਲਰ ਵੱਲੋ ਅਪਣੇ ਹਿੱਸੇ ਦੀ ਸ਼ੂਟਿੰਗ ਸ਼ੁਰੂ ਕਰ ਦਿੱਤੀ ਗਈ ਹੈ। ਸ਼ੂਟਿੰਗ ਦੌਰਾਨ ਮਹਾਵੀਰ ਭੁੱਲਰ, ਸੰਨੀ ਦਿਓਲ ਅਤੇ ਸਿਮਰਨ ਬੱਗਾ ਸਮੇਤ ਹਿੰਦੀ ਸਿਨੇਮਾਂ ਦੇ ਕਈ ਹੋਰ ਨਾਮਵਰ ਐਕਟਰਜ਼ ਦਾ ਸ਼ੂਟ ਵੀ ਪੂਰਾ ਕੀਤਾ ਜਾਵੇਗਾ।
ਹਾਲ ਹੀ ਵਿੱਚ ਰਿਲੀਜ਼ ਹੋਈ ਫਿਲਮ 'ਗਦਰ 2' ਦੀ ਸਫਲਤਾ ਨਾਲ ਆਪਣੇ ਨਵੇਂ ਕਰਿਅਰ ਵੱਲ ਵਧੇ ਸੰਨੀ ਦਿਓਲ ਇਸ ਫ਼ਿਲਮ ਵਿੱਚ ਨਿਭਾਏ ਜਾ ਰਹੇ ਆਪਣੇ ਕਿਰਦਾਰ ਨੂੰ ਲੈ ਕੇ ਕਾਫ਼ੀ ਖੁਸ਼ ਹਨ। ਇਸ ਫਿਲਮ ਰਾਹੀ ਸੰਨੀ ਦਿਓਲ ਕਈ ਅਹਿਮ ਦ੍ਰਿਸ਼ਾਂ ਵਿੱਚ ਅਦਾਕਾਰ ਮਹਾਵੀਰ ਭੁੱਲਰ ਨਾਲ ਨਜ਼ਰ ਆਉਣਗੇ। ਇਸ ਫਿਲਮ ਨੂੰ ਲੈ ਕੇ ਅਦਾਕਾਰ ਮਹਾਵੀਰ ਭੁੱਲਰ ਵੀ ਕਾਫ਼ੀ ਉਤਸ਼ਾਹਿਤ ਹਨ।
ਅਦਾਕਾਰ ਮਹਾਵੀਰ ਭੁੱਲਰ ਦਾ ਕਰੀਅਰ: ਮਹਾਵੀਰ ਭੁੱਲਰ ਦੇ ਕਰੀਅਰ ਬਾਰੇ ਗੱਲ ਕੀਤੀ ਜਾਵੇ, ਤਾਂ ਪੰਜਾਬੀ ਫਿਲਮ ਇੰਡਸਟਰੀ ਵਿੱਚ ਆਪਣੇ ਕੰਮ ਲਈ ਜਾਣੇ ਜਾਂਦੇ ਮਹਾਵੀਰ ਭੁੱਲਰ ਨੂੰ ਪਹਿਲੀ ਵਾਰ 2012 ਦੇ ਖੇਡ ਨਾਟਕ 'ਕਬੱਡੀ ਵਨਸ ਅਗੇਨ' ਵਿੱਚ ਦੇਖਿਆ ਗਿਆ ਸੀ। ਇਸ ਤੋਂ ਇਲਾਵਾ, ਮਹਾਵੀਰ ਭੁੱਲਰ 'Qissa', ਰੋਂਦੇ ਸਾਰੇ ਵਿਆਹ ਪਿੱਛੋ', 'ਯੋਧਾ: ਦਿ ਵਾਰੀਅਰ', 'ਮੈਂਗੋ ਡਰੀਮਜ਼' ਆਦਿ ਫਿਲਮਾਂ 'ਚ ਵੀ ਕੰਮ ਕਰ ਚੁੱਕੇ ਹਨ। ਇਸਦੇ ਨਾਲ ਹੀ, ਉਨ੍ਹਾਂ ਨੂੰ ਸਪੋਰਟਸ ਐਕਸ਼ਨ ਡਰਾਮਾ 'ਰੌਕੀ ਮੈਂਟਲ' ਵਿੱਚ ਵੀ ਦੇਖਿਆ ਗਿਆ ਸੀ, ਜਿਸ ਵਿੱਚ ਪਰਮੀਸ਼ ਵਰਮਾ, ਤੰਨੂ ਕੌਰ ਗਿੱਲ ਅਤੇ ਕਨਿਕਾ ਮਾਨ ਮੁੱਖ ਭੂਮਿਕਾਵਾਂ ਵਿੱਚ ਸਨ।
