ਰਾਂਚੀ: 'ਕਹੋ ਨਾ ਪਿਆਰ ਹੈ' ਅਤੇ 'ਗਦਰ' ਫਿਲਮਾਂ 'ਚ ਆਪਣੀ ਕਾਬਲੀਅਤ ਦਾ ਸਬੂਤ ਦੇਣ ਵਾਲੀ ਫਿਲਮ ਅਦਾਕਾਰਾ ਅਮੀਸ਼ਾ ਪਟੇਲ ਧੋਖਾਧੜੀ ਦੇ ਕੇਸ ਦਾ ਸਾਹਮਣਾ ਕਰ ਰਹੀ ਹੈ। ਇਸ ਸੰਬੰਧ 'ਚ ਉਸ ਨੂੰ ਰਾਂਚੀ ਦੀ ਅਦਾਲਤ 'ਚ ਸਰੀਰਕ ਤੌਰ 'ਤੇ ਪੇਸ਼ ਹੋਣਾ ਪਿਆ। ਉਸ ਨੂੰ ਰਾਂਚੀ ਸਿਵਲ ਕੋਰਟ ਦੇ ਸੀਨੀਅਰ ਡਿਵੀਜ਼ਨ ਜੱਜ ਡੀਐਨ ਸ਼ੁਕਲਾ ਦੀ ਅਦਾਲਤ ਵਿੱਚ ਆਤਮ ਸਮਰਪਣ ਕਰਨਾ ਪਿਆ। ਇਸ ਤੋਂ ਬਾਅਦ 10-10 ਹਜ਼ਾਰ ਦੇ ਦੋ ਬਾਂਡ ਭਰਨ ਤੋਂ ਬਾਅਦ ਉਸ ਨੂੰ ਜ਼ਮਾਨਤ ਮਿਲ ਗਈ।
ਰਾਂਚੀ ਸਥਿਤ ਫਿਲਮ ਨਿਰਮਾਤਾ ਅਜੈ ਕੁਮਾਰ ਸਿੰਘ ਨੇ ਅਮੀਸ਼ਾ ਪਟੇਲ 'ਤੇ ਚੈੱਕ ਬਾਊਂਸ, ਧੋਖਾਧੜੀ ਅਤੇ ਧਮਕੀਆਂ ਦਾ ਇਲਜ਼ਾਮ ਲਗਾਇਆ ਸੀ। ਅਜੈ ਕੁਮਾਰ ਸਿੰਘ ਦੇ ਵਕੀਲ ਵਿਜੇ ਲਕਸ਼ਮੀ ਸ੍ਰੀਵਾਸਤਵ ਨੇ ਦੱਸਿਆ ਕਿ ਫਿਲਹਾਲ ਉਨ੍ਹਾਂ ਨੂੰ ਜ਼ਮਾਨਤ ਮਿਲ ਗਈ ਹੈ। ਪਰ ਅਦਾਲਤ ਨੇ 21 ਜੂਨ ਨੂੰ ਮੁੜ ਪੇਸ਼ ਹੋਣ ਦੇ ਨਿਰਦੇਸ਼ ਦਿੱਤੇ ਹਨ। ਅਮੀਸ਼ਾ ਪਟੇਲ ਦੀ ਤਰਫੋਂ ਉਸ ਦੇ ਵਕੀਲ ਜੈਪ੍ਰਕਾਸ਼ ਨੇ ਆਪਣਾ ਪੱਖ ਪੇਸ਼ ਕੀਤਾ।
ਅਦਾਲਤ ਨੇ ਕਈ ਵਾਰ ਜਾਰੀ ਕੀਤੇ ਸੀ ਸੰਮਨ: ਧੋਖਾਧੜੀ ਅਤੇ ਚੈੱਕ ਬਾਊਂਸ ਦੇ ਮਾਮਲੇ 'ਚ ਅਮੀਸ਼ਾ ਪਟੇਲ ਦੇ ਨਾਂ 'ਤੇ ਕਈ ਵਾਰ ਸੰਮਨ ਜਾਰੀ ਕੀਤੇ ਗਏ ਸਨ ਪਰ ਉਹ ਅਦਾਲਤ 'ਚ ਪੇਸ਼ ਨਹੀਂ ਹੋ ਰਹੀ ਸੀ। ਬਾਅਦ ਵਿਚ ਅਦਾਲਤ ਨੇ ਉਸ ਦੇ ਖਿਲਾਫ ਵਾਰੰਟ ਜਾਰੀ ਕੀਤਾ ਸੀ। ਇਹ ਮਾਮਲਾ ਨਵੰਬਰ 2018 ਦਾ ਹੈ। ਅਜੈ ਕੁਮਾਰ ਸਿੰਘ ਨੇ ਇਲਜ਼ਾਮ ਲਾਇਆ ਸੀ ਕਿ ਅਮੀਸ਼ਾ ਪਟੇਲ ਨੇ ਉਸ ਤੋਂ 2.5 ਕਰੋੜ ਰੁਪਏ ਲਏ ਸਨ। ਪੈਸੇ ਲੈ ਕੇ ਵੀ ਉਸ ਨੇ ਫਿਲਮ 'ਦੇਸੀ ਮੈਜਿਕ' ਵਿੱਚ ਕੰਮ ਨਹੀਂ ਕੀਤਾ।
2.5 ਕਰੋੜ ਦਾ ਚੈੱਕ ਹੋਇਆ ਬਾਊਂਸ: ਸਮਝੌਤੇ ਦੇ ਆਧਾਰ 'ਤੇ ਸਾਲ 2018 'ਚ ਜਦੋਂ ਫਿਲਮ ਰਿਲੀਜ਼ ਨਹੀਂ ਹੋ ਸਕੀ ਤਾਂ ਅਜੇ ਨੇ ਪੈਸਿਆਂ ਦੀ ਮੰਗ ਕੀਤੀ। ਇਸ 'ਤੇ ਅਮੀਸ਼ਾ ਪਟੇਲ ਟਾਲ-ਮਟੋਲ ਕਰਨ ਲੱਗੀ। ਦਬਾਅ ਬਣਾਉਣ 'ਤੇ ਉਸ ਨੇ 2.5 ਕਰੋੜ ਰੁਪਏ ਦਾ ਚੈੱਕ ਦਿੱਤਾ, ਜੋ ਬਾਊਂਸ ਹੋ ਗਿਆ। ਇਸ ਤੋਂ ਬਾਅਦ ਅਜੈ ਸਿੰਘ ਨੇ ਅਦਾਲਤ ਵਿੱਚ ਕੇਸ ਦਾਇਰ ਕੀਤਾ ਸੀ। ਜਿਸ ਵਿੱਚ ਅਦਾਲਤ ਨੇ ਅਮੀਸ਼ਾ ਪਟੇਲ ਨੂੰ ਜ਼ਮਾਨਤ ਦੇ ਦਿੱਤੀ ਹੈ। ਮਾਮਲੇ ਦੀ ਅਗਲੀ ਸੁਣਵਾਈ 21 ਜੂਨ ਨੂੰ ਹੋਵੇਗੀ। ਹੁਣ ਦੇਖਣਾ ਹੋਵੇਗਾ ਕਿ 21 ਜੂਨ ਨੂੰ ਅਦਾਲਤ 'ਚ ਕੀ ਹੁੰਦਾ ਹੈ।
