ਚੰਡੀਗੜ੍ਹ: ਜੀ5 'ਤੇ ਰਿਲੀਜ਼ ਹੋਈ ਵੈੱਬ ਸੀਰੀਜ਼ ‘ਯੂਨਾਈਟਡ ਕੱਚੇ’ ਨੂੰ ਇੰਨੀਂ ਦਿਨੀਂ ਦਰਸ਼ਕਾਂ ਦਾ ਭਰਪੂਰ ਹੁੰਗਾਰਾ ਮਿਲ ਰਿਹਾ ਹੈ, ਜਿਸ ਤੋਂ ਉਤਸ਼ਾਹਿਤ ਹੋਏ ਇਸ ਫਿਲਮ ਦੇ ਲੀਡ ਐਕਟਰ ਸੁਨੀਲ ਗਰੋਵਰ ਹੁਣ ਆਪਣੇ ਅਗਲੇ ਉਦੇਸ਼ ਲਈ ਯੂ.ਐਸ.ਏ ਟੂਰ ਦੀਆਂ ਤਿਆਰੀਆਂ ਵਿਚ ਜੁੱਟ ਚੁੱਕੇ ਹਨ, ਜੋ ਜੂਨ ਮਹੀਨੇ ਕਰਵਾਇਆ ਜਾ ਰਿਹਾ ਹੈ।
ਅਮਰੀਕਾ ਦੇ ਵੱਡੇ ਅਤੇ ਇੰਟਰਟੇਨਮੈਂਟ ਸੋਅਜ਼ ਲਈ ਜਾਣੇ ਜਾਂਦੇ ਅਮਿਤ ਜੇਟਲੀ ਅਤੇ ਉਨ੍ਹਾਂ ਦੇ ਸਾਥੀਆਂ ਵੱਲੋਂ ਕਰਵਾਏ ਜਾ ਰਹੇ ਇਸ ਲਾਈਵ ਸੋਅਜ਼ ਅਧੀਨ ਅਦਾਕਾਰ ਸੁਨੀਲ ਗਰੋਵਰ ਆਪਣੇ ਨਿਭਾਏ ਹੁਣ ਤੱਕ ਦੇ ਵੱਖ ਵੱਖ ਅਤੇ ਮਕਬੂਲ ਚਰਿੱਤਰ ਰੰਗਾਂ ਨੂੰ ਦਿਲਚਸਪ ਰੂਪ ਵਿਚ ਉਥੋਂ ਦੇ ਦਰਸ਼ਕਾਂ ਦੇ ਸਾਹਮਣੇ ਪੇਸ਼ ਕਰਨਗੇ।
ਜੂਨ ਮਹੀਨੇ ਦੀ 17 ਤਾਰੀਖ਼ ਨੂੰ ਸ਼ਾਮ 8 ਵਜੇ ਸ਼ੁਰੂ ਹੋਣ ਵਾਲੇ ਇਸ ਪਹਿਲੇ ਸ਼ੋਅ ਨੂੰ ਕਰਵਾਉਣ ਵਿਚ ਮਾਨਸੀ, ਸੁਮਿਤ ਤੋਂ ਇਲਾਵਾ ਕੁਨਾਲ ਜੋਸ਼ੀ ਵੀ ਵਿਸ਼ੇਸ਼ ਪ੍ਰਬੰਧਕੀ ਸਹਿਯੋਗ ਦੇ ਰਹੇ ਹਨ। ਇਸ ਸ਼ੋਅ ਦਾ ਪ੍ਰਬੰਧ ਸੰਭਾਲ ਰਹੀ ਟੀਮ ਅਨੁਸਾਰ ਮੰਨੋਰੰਜਨ ਦੀ ਦੁਨੀਆਂ ਵਿਚ ਕੁਝ ਵੱਖਰਾ ਕਰਨ ਦੀ ਤਾਂਘ ਅਧੀਨ ਕਰਵਾਏ ਜਾ ਰਹੇ ਇਸ ਸ਼ੋਅ ਵਿਚ ਅਦਾਕਾਰ ਸੁਨੀਲ ਗਰੋਵਰ, ਜੋ ਆਪਣੇ ਕਿਰਦਾਰ ਗੁੱਥੀ ਤੋਂ ਇਲਾਵਾ ਡਾ. ਮਸ਼ਹੂਰ ਗੁਲਾਟੀ ਨੂੰ ਲਾਈਵ ਰੂਪ ਵਿਚ ਮੁੜ ਜੀਵੰਤ ਕਰਨਗੇ।
ਉਨ੍ਹਾਂ ਦੱਸਿਆ ਕਿ ਅਮਰੀਕਾ ਤੋਂ ਇਲਾਵਾ ਨਾਰਥ ਅਮਰੀਕਾ ਅਤੇ ਕੈਨੇਡਾ ਤੋਂ ਵੀ ਦਰਸ਼ਕ ਇਸ ਸ਼ੋਅ ਦਾ ਆਨੰਦ ਮਾਣਨ ਲਈ ਪਹੁੰਚ ਰਹੇ ਹਨ, ਜਿੰਨ੍ਹਾਂ ਦੀਆਂ ਆਸ਼ਾਵਾਂ ਨੂੰ ਹੋਰ ਉਤਸ਼ਾਹ ਦੇਣ ਲਈ ਇਸ ਸ਼ੋਅ ਵਿਚ ਉੱਘੀ ਕਾਮੇਡੀਅਨ ਜੋੜੀ ਸੰਕੇਤ ਭੋਸਲੇ ਅਤੇ ਸੁਗੰਧਾ ਮਿਸ਼ਰਾ ਨੂੰ ਵੀ ਸ਼ਾਮਿਲ ਕੀਤਾ ਗਿਆ ਹੈ, ਜੋ ‘ਦਿ ਕਪਿਲ ਸ਼ਰਮਾ ਸ਼ੋਅ’ ਤੋਂ ਇਲਾਵਾ ਬਾਲੀਵੁੱਡ ਦੇ ਕਈ ਅਹਿਮ ਪ੍ਰੋਜੈਕਟਾਂ ਅਤੇ ਰਿਐਲਟੀ ਸੋਅਜ਼ ਦਾ ਹਿੱਸਾ ਬਣ ਚੁੱਕੇ ਹਨ।
ਉਨ੍ਹਾਂ ਦੱਸਿਆ ਕਿ ਇਹ ਸ਼ੋਅਜ ਪੂਰੀ ਤਰ੍ਹਾਂ ਚੰਗੀ ਕਾਮੇਡੀ ਉਪਰ ਆਧਾਰਿਤ ਹੋਵੇਗਾ, ਜਿਸ ਨੂੰ ਵੇਖਣ ਆਇਆ ਹਰ ਪਰਿਵਾਰ ਇਕੱਠਿਆਂ ਇਸ ਦਾ ਪੂਰਾ ਆਨੰਦ ਮਾਣ ਸਕੇਗਾ। ਉਨ੍ਹਾਂ ਦੱਸਿਆ ਕਿ ਇਸ ਸੋਅਜ਼ ਦੀਆਂ ਪੂਰੀਆਂ ਤਿਆਰੀਆਂ ਮੁਕੰਮਲ ਕਰ ਲਈਆਂ ਗਈਆਂ ਹਨ, ਜਿਸ ਮੱਦੇਨਜ਼ਰ ਪੂਰਨ ਸੁਰੱਖਿਆ ਇੰਤਜ਼ਾਮ ਵੀ ਅਮਲ ਵਿਚ ਲਿਆਂਦੇ ਜਾ ਰਹੇ ਹਨ ਤਾਂ ਕਿ ਹਰ ਦਰਸ਼ਕ ਨਿਰਵਿਘਨ ਇਸ ਦਾ ਲੁਤਫ਼ ਉਠਾ ਸਕੇ।
