ਮੁਹਾਲੀ : ਕੋਰੋਨਾ ਮਹਾਮਾਰੀ ਵਿਚਾਲੇ ਲੋਕ ਦਮ ਤੋੜ ਰਹੇ ਨੇ। ਸਰਕਾਰਾਂ ਦੇ ਪ੍ਰਬੰਧ ਅਧੂਰੇ ਜਾਪਦੇ ਹਨ। ਇੱਕ ਪਾਸੇ ਆਕਸੀਜਨ ਦੀ ਵੱਡੀ ਕਿੱਲਤ ਹੈ ਤਾਂ ਦੂਜੇ ਪਾਸੇ ਬੈੱਡ ਨਾ ਮਿਲਣ ਕਰਕੇ ਚਿੰਤਾਵਾਂ ਹੋਰ ਵਧ ਰਹੀਆਂ ਨੇ।
ਅਜਿਹੇ ਮੌਕੇ ਬਹੁਤ ਲਾਜ਼ਮੀ ਹੋ ਜਾਂਦਾ ਹੈ ਸਮਾਜ ਸੇਵੀ ਲੋਕਾਂ ਦਾ ਅੱਗੇ ਆਉਣਾ। ਡੇਰਾਬੱਸੀ ਤੋਂ ਵਿਧਾਇਕ ਐਨ.ਕੇ. ਸ਼ਰਮਾ ਨੇ ਆਪਣਾ ਫਾਰਮ ਹਾਊਸ ਕੋਰੋਨਾ ਮਰੀਜ਼ਾਂ ਦੇ ਲੇਖੇ ਕਰ ਦਿੱਤਾ ਹੈ। ਸ਼ੁਰੂਆਤੀ ਤੌਰ ਤੇ 100 ਬੈੱਡ ਦਾ ਆਈਸੋਲੇਸ਼ਨ ਸੈਂਟਰ ਸ਼ੁਰੂ ਕੀਤਾ ਗਿਆ। ਜਿਥੇ ਕੋਰੋਨਾ ਮਰੀਜ਼ਾਂ ਦਾ ਮੁਫਤ ਇਲਾਜ ਹੋਵੇਗਾ ਤੇ ਉਥੇ ਹੀ ਉਨ੍ਹਾਂ ਲਈ ਖਾਣ ਪੀਣ ਦੀ ਵਿਵਸਥਾ ਵੀ ਜਾਰੀ ਰਹੇਗੀ।
ਹੋਵੇਗਾ ਮੁਫ਼ਤ ਇਲਾਜ, ਮਿਲੇਗਾ ਮੁਫ਼ਤ ਖਾਣਾ
ਜਿਹੜੇ ਮਰੀਜ਼ਾਂ ਦੀ ਹਾਲਾਤ ਠੀਕ ਨਹੀਂ ਜਾਂ ਆਕਸੀਜਨ ਦੀ ਲੋੜ ਹੈ ਉਨ੍ਹਾਂ ਲਈ 20 ਬੈੱਡ ਵੱਖਰੇ ਰੱਖੇ ਗਏ ਹਨ। 24 ਘੰਟੇ ਮੈਡੀਕਲ ਸਟਾਫ ਹਸਪਤਾਲ ਵਿੱਚ ਹਾਜ਼ਰ ਰਹੇਗਾ। ਇਸ ਦੇ ਨਾਲ ਹੀ ਦੋ ਐਂਬੂਲੈਸ ਵੀ ਤੈਨਾਤ ਰਹਿਣਗੀਆਂ।
ਇਸ ਮੌਕੇ ਵਿਧਾਇਕ ਸ਼ਰਮਾ ਨੇ ਕਿਹਾ ਕਿ ਹਲਕੇ ਵਿੱਚ ਵਧ ਰਹੇ ਕੇਸਾਂ ਨੂੰ ਵੇਖਦਿਆਂ ਉਨ੍ਹਾਂ ਨੇ ਛੋਟੀ ਜਿਹੀ ਕੋਸ਼ਿਸ਼ ਕੀਤੀ ਹੈ। ਹਾਲਾਂਕਿ ਉਨ੍ਹਾਂ ਨੇ ਇਲਜ਼ਾਮ ਵੀ ਲਗਾਇਆ ਕਿ ਸਥਾਨਕ ਪ੍ਰਸ਼ਾਸਨ ਵਲੋਂ ਉਨ੍ਹਾਂ ਨੂੰ ਸਹਿਯੋਗ ਨਹੀਂ ਮਿਲ ਰਿਹਾ।
