ਚੰਡੀਗੜ੍ਹ: ਜਲੰਧਰ ਦੇ ਸਾਬਕਾ ਯੂਥ ਕਾਂਗਰਸ ਪ੍ਰਧਾਨ ਰਵਿੰਦਰਪਾਲ ਸਿੰਘ ਸੇਠੀ ਨੇ ਮੋਗਾ ਦੇ ਐੱਸ.ਐੱਸ.ਪੀ ਹਰਮਨਬੀਰ ਸਿੰਘ ਗਿੱਲ 'ਤੇ ਚੰਡੀਗੜ੍ਹ ਦੇ ਸੈਕਟਰ 34 ਤੋਂ ਅਗਵਾ ਕਰ ਤਸ਼ੱਦਦ ਕਰਨ ਦੇ ਇਲਜ਼ਾਮ ਲਗਾਏ ਹਨ। ਇਸ ਸੰਬੰਧ 'ਚ ਉਕਤ ਨੌਜਵਾਨ ਵਲੋਂ ਹਾਈ ਕੋਰਟ 'ਚ ਪਟੀਸ਼ਨ ਦਾਖ਼ਲ ਕਰ ਆਪਣੀ ਜਾਨ ਦੀ ਸੁਰੱਖਿਆ ਯਕੀਨੀ ਬਣਾਉਣ ਦੀ ਮੰਗ ਕੀਤੀ ਗਈ ਹੈ। ਪਟੀਸ਼ਨ ਦੀ ਪਹਿਲੀ ਸੁਣਵਾਈ ਤੋਂ ਬਾਅਦ ਜਸਟਿਸ ਅਰਵਿੰਦ ਸਿੰਘ ਸਾਂਗਵਾਨ ਨੇ ਚੰਡੀਗੜ੍ਹ ਅਤੇ ਪੰਜਾਬ ਦੇ ਡੀਜੀਪੀ ਨੂੰ ਇਸ ਮਾਮਲੇ 'ਚ ਨੋਟਿਸ ਜਾਰੀ ਕਰਕੇ ਜਵਾਬ ਮੰਗਿਆ ਹੈ।
ਇਸ ਘਟਨਾ ਦੀ ਸ਼ਿਕਾਇਤ ਪਟੀਸ਼ਨਰ ਦੇ ਨਾਲ ਉਸ ਸਮੇਂ ਉਸ ਦੇ ਦੋਸਤ ਪਰਮਿੰਦਰ ਸਿੰਘ ਚੀਮਾ ਨੇ ਸੈਕਟਰ 34 ਪੁਲਿਸ ਥਾਣੇ 'ਚ ਦਿੱਤੀ ਸੀ। ਸੇਠੀ ਨੇ ਪਟੀਸ਼ਨ 'ਚ ਕਿਹਾ ਕਿ ਮੋਗਾ ਦੇ ਐੱਸ.ਐੱਸ.ਪੀ ਹਰਮਨਬੀਰ ਸਿੰਘ ਗਿੱਲ ਦੀ ਜਾਣ ਪਹਿਚਾਣ ਵਾਲੀ ਇੱਕ ਮਹਿਲਾ ਉਸ ਦੇ ਸੰਪਰਕ 'ਚ ਆਈ ਸੀ, ਉਸ ਮਹਿਲਾ ਨੂੰ ਐੱਸ.ਐੱਸ.ਪੀ ਆਪਣੀ ਭੈਣ ਦੱਸਦੇ ਸੀ। ਮਹਿਲਾ ਦੇ ਨਾਲ ਫੋਨ 'ਤੇ ਸੰਪਰਕ ਨੂੰ ਲੈਕੇ ਐੱਸ.ਐੱਸ.ਪੀ ਨੇ ਸੇਠੀ ਨੂੰ ਫੋਨ 'ਤੇ ਧਮਕੀ ਦਿੱਤੀ ਅਤੇ ਦੋਵਾਂ 'ਚ ਕਾਫੀ ਝਗੜਾ ਵੀ ਹੋਇਆ।
ਐੱਸ.ਐੱਸ.ਪੀ 'ਤੇ ਲਗਾਏ ਅਗਵਾ ਕਰਨ ਦੇ ਇਲਜ਼ਾਮ
ਇਸ ਤੋਂ ਬਾਅਦ ਪਟੀਸ਼ਨਰ ਨੇ ਇਸ ਸਾਰੇ ਮਾਮਲੇ ਦੀ ਜਾਣਕਾਰੀ ਇੱਕ ਵੀਡੀਓ ਮੈਸੇਜ ਦੇ ਰਾਹੀ ਵਾਇਰਲ ਕਰ ਦਿੱਤੀ। ਪਟੀਸਨਰ ਵਲੋਂ ਪਟੀਸ਼ਨ 'ਚ ਕਿਹਾ ਗਿਆ ਕਿ ਇਸ ਘਟਨਾ ਤੋਂ ਪ੍ਰੇਸ਼ਾਨ ਐੱਸ.ਐੱਸ.ਪੀ ਨੇ ਅੱਠ ਮਾਰਚ ਨੂੰ ਦੇਰ ਸ਼ਾਮ 30-32 ਪੁਲਿਸ ਮੁਲਾਜ਼ਮਾਂ ਨੂੰ ਭੇਜ ਉਸਨੂੰ ਚੰਡੀਗੜ੍ਹ ਸੈਕਟਰ 34 ਤੋਂ ਅਗਵਾ ਕਰ ਲਿਆ।
ਐੱਸ.ਐੱਸ.ਪੀ ਨੂੰ ਕੀਤਾ ਜਾਵੇ ਬਰਖ਼ਾਸਤ
ਉਕਤ ਪਟੀਸ਼ਨਰ ਦਾ ਕਹਿਣਾ ਕਿ ਉਸ ਨੂੰ ਮੋਗਾ ਲਿਜਾ ਕੇ ਪੁਲਿਸ ਥਾਣੇ 'ਚ ਕਾਫੀ ਤਸ਼ੱਦਦ ਕੀਤਾ ਗਿਆ। ਥਾਣੇ 'ਚ ਉਸਦੀ ਇਤਰਾਜ਼ਯੋਗ ਵੀਡੀਓ ਵੀ ਬਣਾਈ ਗਈ ਅਤੇ ਅਗਲੇ ਦਿਨ ਸ਼ਾਮ ਨੂੰ ਉਸ ਨੂੰ ਰਾਜਨੀਤਿਕ ਰਸੂਖ ਦੇ ਚੱਲਦਿਆਂ ਛੱਡ ਦਿੱਤਾ ਗਿਆ। ਪਟੀਸ਼ਨਰ ਨੇ ਕਿਹਾ ਕਿ ਉਸ ਦੀ ਜਾਨ ਦੀ ਸੁਰੱਖਿਆ ਯਕੀਨੀ ਬਣਾਈ ਜਾਵੇ ਅਤੇ ਐੱਸ.ਐੱਸ.ਪੀ ਮੋਗਾ ਨੂੰ ਉਸਦੀਆਂ ਸੇਵਾਵਾਂ ਤੋਂ ਬਰਖ਼ਾਸਤ ਕੀਤਾ ਜਾਵੇ। ਇਸ ਦੇ ਨਾਲ ਹੀ ਸੈਕਟਰ 34 ਤੋਂ ਅਗਵਾ ਕਰਨ ਦੀ ਸੀ.ਸੀ.ਟੀ.ਵੀ ਫੁਟੇਜ ਨੂੰ ਲਿਆ ਜਾਵੇ, ਤਾਂ ਜੋ ਇਸ ਸਾਰੇ ਮਾਮਲੇ ਦਾ ਖੁਲਾਸਾ ਹੋ ਸਕੇ।
