ਨਵੀਂ ਦਿੱਲੀ: ਪੈਟਰੋਲ ਅਤੇ ਡੀਜ਼ਲ ਦੀਆਂ ਕੀਮਤਾਂ ਦੇ ਵਧਣ ਦਾ ਸਿਲਸਿਲਾ ਮੰਗਲਵਾਰ ਨੂੰ ਲਗਾਤਾਰ ਤੀਜੇ ਦਿਨ ਵੀ ਜਾਰੀ ਰਿਹਾ। ਦਿੱਲੀ ਵਿੱਚ ਪੈਟਰੋਲ ਦੀ ਕੀਮਤ 73 ਰੁਪਏ ਪ੍ਰਤੀ ਲੀਟਰ, ਡੀਜ਼ਲ ਦੀ ਕੀਮਤ 71.17 ਰੁਪਏ ਹੋ ਗਈ ਹੈ। ਪੈਟਰੋਲ ਇਨ੍ਹਾਂ 3 ਦਿਨਾਂ 'ਚ ਦਿੱਲੀ ਵਿੱਚ 1.74 ਰੁਪਏ ਪ੍ਰਤੀ ਲੀਟਰ ਮਹਿੰਗਾ ਹੋ ਗਿਆ ਅਤੇ ਡੀਜ਼ਲ ਦੀ ਕੀਮਤ ਵਿੱਚ 1.78 ਰੁਪਏ ਪ੍ਰਤੀ ਲੀਟਰ ਦਾ ਵਾਧਾ ਹੋਇਆ ਹੈ।
ਉਧਰ ਅੰਤਰਰਾਸ਼ਟਰੀ ਬਾਜ਼ਾਰ ਵਿੱਚ ਕੱਚੇ ਤੇਲ ਦੀ ਕੀਮਤ ਵਿੱਚ ਇੱਕ ਦਿਨ ਦੀ ਗਿਰਾਵਟ ਤੋਂ ਬਾਅਦ ਫਿਰ ਤੇਜ਼ੀ ਦੇਖੀ ਜਾ ਰਹੀ ਹੈ, ਜਿਸ ਕਾਰਨ ਤੇਲ ਦੀ ਕੀਮਤ ਵਿੱਚ ਹੋਰ ਵਾਧਾ ਹੋਣ ਦੀ ਸੰਭਾਵਨਾ ਹੈ। ਪਿਛਲੇ ਸੈਸ਼ਨ ਵਿੱਚ ਮੁਨਾਫਾ ਵਸੂਲੀ ਦੇ ਕਾਰਨ ਬੈਂਚਮਾਰਕ ਕੱਚੇ ਤੇਲ ਦੀ ਬ੍ਰੈਂਟ ਕਰੂਡ ਦੀ ਕੀਮਤ ਵਿੱਚ 5.89% ਦੀ ਗਿਰਾਵਟ ਆਈ ਸੀ।
ਪੈਟਰੋਲ ਦੀਆਂ ਕੀਮਤਾਂ ਪ੍ਰਤੀ ਲੀਟਰ
- ਦਿੱਲੀ- 73 ਰੁਪਏ
- ਕੋਲਕਾਤਾ- 74.98 ਰੁਪਏ
- ਮੁੰਬਈ- 80.01 ਰੁਪਏ
- ਚੇੱਨਈ- 77.08 ਰੁਪਏ
ਡੀਜ਼ਲ ਦੀਆਂ ਕੀਮਤਾਂ ਪ੍ਰਤੀ ਲੀਟਰ
- ਦਿੱਲੀ- 71.17 ਰੁਪਏ
- ਕੋਲਕਾਤਾ- 67.23 ਰੁਪਏ
- ਮੁੰਬਈ- 69.92 ਰੁਪਏ
- ਚੇੱਨਈ- 69.74 ਰੁਪਏ
ਇਹ ਵੀ ਪੜ੍ਹੋ: ‘ਜੀਰੋ’ ਜੀਐਸਟੀ ਰਿਟਰਨ ਭਰਨ ਵਾਲਿਆਂ ਲਈ ਐਸਐਮਐਸ ਸੇਵਾ, 22 ਲੱਖ ਟੈਕਸ ਭਰਨ ਵਾਲਿਆਂ ਨੂੰ ਹੋਵੇਗਾ ਲਾਭ
ਮੰਗਲਵਾਰ ਨੂੰ ਦਿੱਲੀ, ਕੋਲਕਾਤਾ, ਮੁੰਬਈ ਅਤੇ ਚੇੱਨਈ ਵਿੱਚ ਪੈਟਰੋਲ ਦੀਆਂ ਕੀਮਤਾਂ ਕ੍ਰਮਵਾਰ 54 ਪੈਸੇ, 63 ਪੈਸੇ, 52 ਪੈਸੇ ਅਤੇ 48 ਪੈਸੇ ਵਧੀਆਂ। ਇਸ ਦੇ ਨਾਲ ਹੀ ਡੀਜ਼ਲ ਦੀਆਂ ਕੀਮਤਾਂ ਵਿੱਚ 4 ਮਹਾਂਨਗਰਾਂ 'ਚ ਕ੍ਰਮਵਾਰ 58 ਪੈਸੇ, 62 ਪੈਸੇ, 55 ਪੈਸੇ ਅਤੇ 49 ਪੈਸੇ ਦਾ ਵਾਧਾ ਕੀਤਾ ਗਿਆ ਹੈ।
