ਨਵੀਂ ਦਿੱਲੀ: ਰੱਖਿਆ ਮਾਮਲਿਆਂ ਦੀ ਸੰਸਦੀ ਸਥਾਈ ਕਮੇਟੀ ਨੇ ਪੂਰਬੀ ਲੱਦਾਖ ਖੇਤਰ ਦੀ ਗਲਵਾਨ ਵੈਲੀ ਅਤੇ ਪੈਨਗੋਂਗ ਝੀਲ ਦਾ ਦੌਰਾ ਕਰਨ ਦਾ ਫੈਸਲਾ ਕੀਤਾ ਹੈ। ਇਹ ਉਹ ਖੇਤਰ ਹੈ ਜਿਥੇ ਭਾਰਤ ਅਤੇ ਚੀਨ ਦੀਆਂ ਫੌਜਾਂ ਵਿਚਾਲੇ ਹਿੰਸਕ ਟਕਰਾਅ ਹੋਇਆ ਸੀ। ਰਾਹੁਲ ਗਾਂਧੀ ਵੀ ਇਸ ਕਮੇਟੀ ਦੇ ਮੈਂਬਰ ਹਨ।
ਸੂਤਰਾਂ ਨੇ ਕਿਹਾ ਕਿ ਇਨ੍ਹਾਂ ਖੇਤਰਾਂ ਦਾ ਦੌਰਾ ਕਰਨ ਦਾ ਫੈਸਲਾ ਪੈਨਲ ਦੀ ਆਖਰੀ ਬੈਠਕ ਵਿੱਚ ਲਿਆ ਗਿਆ ਸੀ, ਜਿਸ ਵਿੱਚ ਰਾਹੁਲ ਗਾਂਧੀ ਸ਼ਾਮਲ ਨਹੀਂ ਸਨ, ਕਿਉਂਕਿ ਪੈਨਲ ਐਲਏਸੀ ਦਾ ਦੌਰਾ ਕਰਨਾ ਚਾਹੁੰਦਾ ਹੈ। ਅਸਲ ਕੰਟਰੋਲ ਰੇਖਾ 'ਤੇ ਜਾਣ ਲਈ ਕਮੇਟੀ ਨੂੰ ਸਰਕਾਰ ਤੋਂ ਮਨਜ਼ੂਰੀ ਲੈਣੀ ਹੋਵੇਗੀ।
ਦੂਜੇ ਪਾਸੇ, ਪੂਰਬੀ ਲੱਦਾਖ ਵਿੱਚ ਪੈਨਗੋਗ ਤਸੋ (ਝੀਲ) ਖੇਤਰ ਵਿੱਚ ਚੀਨ ਨਾਲ ਫੌਜਾਂ ਨੂੰ ਹਟਾਉਣ ਦੇ ਸਮਝੌਤੇ ਤੋਂ ਬਾਅਦ, ਬੀਜਿੰਗ ਅਤੇ ਭਾਰਤੀ ਫੌਜ ਇਸ ਖੇਤਰ ਵਿੱਚ ਫੌਜਾਂ ਦੀ ਗਿਣਤੀ ਵਿੱਚ ਲਗਾਤਾਰ ਕਮੀ ਕਰ ਰਹੀਆਂ ਹਨ ਅਤੇ ਬਖਤਰਬੰਦ ਵਾਹਨਾਂ ਨੂੰ ਪਿੱਛੇ ਧੱਕ ਰਹੀਆਂ ਹਨ। ਫੌਜੀ ਸੂਤਰਾਂ ਨੇ ਸ਼ੁੱਕਰਵਾਰ ਨੂੰ ਇਹ ਜਾਣਕਾਰੀ ਦਿੱਤੀ।
ਹਟਾਏ ਜਾ ਰਹੇ ਲੜਾਕੂ ਟੈਂਕ ਤੇ ਬਖਤਰਬੰਦ ਵਾਹਨ
ਉਨ੍ਹਾਂ ਕਿਹਾ ਕਿ ਪੈਨਗੋਂਗ ਤਸੋ ਦੇ ਦੱਖਣੀ ਕੰਡੇ ’ਤੇ ਟੱਕਰ ਦੀ ਥਾਂ ਤੋਂ ਲੜਾਕੂ ਟੈਂਕ ਅਤੇ ਬਖਤਰਬੰਦ ਵਾਹਨਾਂ ਨੂੰ ਹਟਾਇਆ ਜਾ ਰਿਹਾ ਹੈ, ਜਦੋਂ ਕਿ ਫੌਜਾਂ ਨੂੰ ਉੱਤਰੀ ਤੱਟ ਦੇ ਇਲਾਕਿਆਂ ਤੋਂ ਵਾਪਸ ਬੁਲਾਇਆ ਜਾ ਰਿਹਾ ਹੈ।
ਸੂਤਰਾਂ ਨੇ ਇਹ ਵੀ ਕਿਹਾ ਕਿ ਬਖਤਰਬੰਦ ਵਾਹਨਾਂ ਦੀ ਵਾਪਸੀ ਲਗਭਗ ਪੂਰੀ ਹੋ ਚੁੱਕੀ ਹੈ ਅਤੇ ਅਗਲੇ ਕੁਝ ਦਿਨਾਂ ਵਿੱਚ ਦੋਵਾਂ ਪਾਸਿਆਂ ਵੱਲੋਂ ਬਣਾਏ ਗਏ ਆਰਜ਼ੀ ਢਾਂਚੇ ਢਹਿ ਜਾਣਗੇ।
ਇਸ ਸਬੰਧ ਵਿੱਚ ਇਕ ਸੂਤਰ ਨੇ ਕਿਹਾ, "ਰਿਟਰੀਟ ਕਰਨ ਦੀ ਪ੍ਰਕਿਰਿਆ ਵਿੱਚ ਸਮਾਂ ਲੱਗੇਗਾ, ਕਿਉਂਕਿ ਦੋਵੇਂ ਧਿਰਾਂ ਮਿਲ ਕੇ ਫੌਜਾਂ ਅਤੇ ਫੌਜੀ ਵਾਹਨਾਂ ਨੂੰ ਵਾਪਸ ਬੁਲਾਉਣ ਲਈ ਤਸਦੀਕ ਪ੍ਰਕਿਰਿਆ ਨੂੰ ਪੂਰਾ ਕਰ ਰਹੀਆਂ ਹਨ।"
ਸੂਤਰਾਂ ਨੇ ਦੱਸਿਆ ਕਿ ਸੈਨਿਕਾਂ ਅਤੇ ਬਖਤਰਬੰਦ ਵਾਹਨਾਂ ਦੀ ਵਾਪਸੀ ਸਿਰਫ ਉਨ੍ਹਾਂ ਥਾਵਾਂ ਤੋਂ ਆ ਰਹੀ ਹੈ ਜਿੱਥੇ ਟੱਕਰ ਦੇ ਪੁਆਇੰਟ ਬਿਲਕੁਲ ਆਹਮਣੇ-ਸਾਹਮਣੇ ਸਨ।
