ਸ਼ਿਮਲਾ/ਕੁੱਲੂ/ਲਾਹੌਲ ਸਪੀਤੀ: ਹਿਮਾਚਲ ਪ੍ਰਦੇਸ਼ 'ਚ ਬਰਫਬਾਰੀ ਅਤੇ ਲਗਾਤਾਰ ਹੋ ਰਹੀ ਬਾਰਿਸ਼ ਕਾਰਨ ਪੂਰਾ ਸੂਬਾ ਸੀਤ ਲਹਿਰ ਦੀ ਚਪੇਟ 'ਚ ਆ ਗਿਆ ਹੈ। ਉੱਥੇ ਹੀ ਕਿਨੌਰ 'ਚ ਬਰਫਬਾਰੀ ਕਾਰਨ ਠੰਡ ਨਾਲ ਤਿੰਨ ਸੈਲਾਨੀਆਂ ਦੀ ਮੌਤ ਹੋ ਗਈ ਹੈ। ਇਹ ਸੈਲਾਨੀ ਗੋਆ ਅਤੇ ਮੁੰਬਈ ਦੇ ਦੱਸੇ ਜਾ ਰਹੇ ਹਨ। ਮ੍ਰਿਤਕਾਂ ਦੀ ਪਛਾਣ ਦੀਪਕ ਨਰਾਇਣ (58), ਰਾਜੇਂਦਰ ਪਾਠਕ (65) ਅਤੇ ਅਸ਼ੋਕ ਮਧੂਕਰ (64) ਵਜੋਂ ਹੋਈ ਹੈ। ਦੱਸ ਦਈਏ ਕਿ ਬਰਫਬਾਰੀ ਦੇ ਕਾਰਨ ਤਾਪਮਾਨ ਵਿੱਚ ਛੇ ਤੋਂ ਸੱਤ ਡਿਗਰੀ ਸੈਲਸੀਅਸ ਦੀ ਗਿਰਾਵਟ ਦਰਜ ਕੀਤੀ ਗਈ ਹੈ। ਮਨਾਲੀ-ਲੇਹ ਸੜਕ, ਗ੍ਰੈਨਫੂ-ਕਾਜ਼ਾ-ਸਮਦੋ ਸੜਕ ਕੁੱਲੂ, ਸ਼ਿਮਲਾ ਅਤੇ ਚੰਬਾ ਜ਼ਿਲ੍ਹਿਆਂ ਸਮੇਤ ਲਾਹੌਲ-ਸਪੀਤੀ, ਕਿੰਨੌਰ ਦੇ ਉੱਚੇ ਇਲਾਕਿਆਂ ਵਿੱਚ ਬਰਫਬਾਰੀ ਕਾਰਨ ਆਵਾਜਾਈ ਲਈ 67 ਸੜਕਾਂ ਬੰਦ ਕਰ ਦਿੱਤੀਆਂ ਗਈਆਂ ਹਨ।
ਇਕੱਲੇ ਲਾਹੌਲ ਸਪਿਤੀ ਵਿੱਚ 56 ਸੜਕਾਂ ਹਨ, ਕੁੱਲੂ ਵਿੱਚ 1 ਅਤੇ ਚੰਬਾ ਵਿੱਚ 7 ਸੜਕਾਂ ਦੀ ਆਵਾਜਾਈ ਲਈ ਬੰਦ ਹਨ। ਸੂਬੇ ਦੇ ਜ਼ਿਆਦਾਤਰ ਹਿੱਸਿਆਂ 'ਚ ਤੇਜ਼ ਹਵਾਵਾਂ ਅਤੇ ਹਨੇਰੀ ਨੇ ਵੀ ਲੋਕਾਂ ਦੀਆਂ ਮੁਸ਼ਕਿਲਾਂ ਵਧਾ ਦਿੱਤੀਆਂ ਹਨ। ਸ਼ਿਮਲਾ ਅਤੇ ਸਿਰਮੌਰ ਦੀਆਂ ਉੱਚੀਆਂ ਚੋਟੀਆਂ 'ਤੇ ਇਸ ਸਾਲ ਪਹਿਲੀ ਵਾਰ ਬਰਫਬਾਰੀ ਹੋਈ ਹੈ। ਮੌਸਮ ਵਿਭਾਗ ਦੇ ਮੁਤਾਬਿਕ ਗੋਂਦਲਾ ਵਿੱਚ 18 ਸੈਂਟੀਮੀਟਰ, ਹੰਸਾ ਵਿੱਚ 10 ਅਤੇ ਕੀਲੰਗ ਵਿੱਚ 3 ਸੈਂਟੀਮੀਟਰ ਤਾਜ਼ਾ ਬਰਫ਼ਬਾਰੀ ਦਰਜ ਕੀਤੀ ਗਈ ਹੈ। ਡਲਹੌਜ਼ੀ ਵਿੱਚ 77 ਮਿਲੀਮੀਟਰ ਅਤੇ ਓਲਿੰਡਾ ਵਿੱਚ 60 ਮਿਲੀਮੀਟਰ ਮੀਂਹ ਦਰਜ ਕੀਤਾ ਗਿਆ। ਚੰਬਾ ਦੇ ਖੇੜੀ ਵਿੱਚ 57, ਊਨਾ ਵਿੱਚ 53, ਬੰਗਾਨਾ ਵਿੱਚ 50, ਨਗਰੋਟਾ ਸੂਰੀਆਂ ਵਿੱਚ 41, ਸਲੂਨੀ ਵਿੱਚ 36, ਧਰਮਸ਼ਾਲਾ ਵਿੱਚ 16, ਕਸੌਲੀ ਵਿੱਚ 14, ਨਦੌਨ ਵਿੱਚ 11 ਅਤੇ ਭਰਮੌਰ ਵਿੱਚ 10 ਮਿਲੀਮੀਟਰ ਮੀਂਹ ਪਿਆ।
ਭਾਰੀ ਬਰਫਬਾਰੀ ਨੇ ਲਾਹੌਲ-ਸਪੀਤੀ ਨੂੰ ਪ੍ਰਭਾਵਿਤ ਕੀਤਾ ਹੈ, ਜਿਸ ਕਾਰਨ ਘਾਟੀ ਵਿੱਚ ਮਨਾਲੀ ਅਤੇ ਕੇਲਾਂਗ ਦੇ ਵਿਚਕਾਰ ਵਾਹਨਾਂ ਦੀ ਆਵਾਜਾਈ ਰੁਕ ਗਈ ਹੈ ਅਤੇ ਪ੍ਰਸ਼ਾਸਨ ਨੇ ਘਾਟੀ ਵਿੱਚ ਯਾਤਰੀ ਵਾਹਨਾਂ ਦੀ ਆਵਾਜਾਈ 'ਤੇ ਪੂਰੀ ਤਰ੍ਹਾਂ ਰੋਕ ਲਗਾ ਦਿੱਤੀ ਹੈ। ਰੋਹਤਾਂਗ ਦੱਰੇ 'ਚ 3 ਫੁੱਟ ਤੋਂ ਜ਼ਿਆਦਾ ਬਰਫ ਦੀ ਮੋਟੀ ਪਰਤ ਜੰਮ ਗਈ ਹੈ, ਜਦਕਿ ਅਟਲ ਸੁਰੰਗ ਰੋਹਤਾਂਗ ਦੇ ਦੋਵੇਂ ਸਿਰਿਆਂ 'ਤੇ ਅੱਧਾ ਫੁੱਟ ਦੇ ਕਰੀਬ ਬਰਫ ਜਮ੍ਹਾ ਹੋ ਗਈ ਹੈ। ਇਸ ਲਈ ਲਾਹੌਲ-ਸਪੀਤੀ ਪ੍ਰਸ਼ਾਸਨ ਨੇ ਸਾਵਧਾਨੀ ਦੇ ਤੌਰ 'ਤੇ ਘਾਟੀ 'ਚ ਸੈਲਾਨੀਆਂ ਦੇ ਵਾਹਨਾਂ ਦੀ ਆਵਾਜਾਈ 'ਤੇ ਪਾਬੰਦੀ ਲਗਾ ਦਿੱਤੀ ਹੈ। ਇਸ ਦੇ ਨਾਲ ਹੀ ਡਿਪਟੀ ਕਮਿਸ਼ਨਰ ਕਿਨੌਰ ਅਪੂਰਵਾ ਦੇਵਗਨ ਨੇ ਸੈਲਾਨੀਆਂ ਅਤੇ ਸਥਾਨਕ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਜਦੋਂ ਤੱਕ ਮੌਸਮ ਆਮ ਵਾਂਗ ਨਹੀਂ ਹੋ ਜਾਂਦਾ ਉਦੋਂ ਤੱਕ ਪਹਾੜ ਦੇ ਨੇੜੇ ਨਾ ਜਾਣ।
ਵਰਤਮਾਨ ਵਿੱਚ, ਘਾਟੀ ਦੇ ਸੀਸੂ ਵਿੱਚ 3 ਤੋਂ 4 ਇੰਚ ਤਾਜ਼ੀ ਬਰਫਬਾਰੀ ਹੋਈ ਹੈ, ਟਾਂਡੀ ਵਿੱਚ 2 ਇੰਚ, ਜ਼ਿਲ੍ਹਾ ਹੈਡਕੁਆਟਰ ਕੀਲੌਂਗ ਵਿੱਚ ਇੱਕ ਤੋਂ ਦੋ ਇੰਚ, ਜਦਕਿ ਉਦੈਪੁਰ ਖੇਤਰ ਵਿੱਚ ਵੀ ਬਰਫਬਾਰੀ ਜਾਰੀ ਹੈ। ਇਸ ਤੋਂ ਇਲਾਵਾ ਕੇਲਾਂਗ ਤੋਂ ਅੱਗੇ ਮਨਾਲੀ-ਲੇਹ ਸੜਕ 'ਤੇ ਵਾਹਨਾਂ ਦੀ ਆਵਾਜਾਈ ਨੂੰ ਰੋਕ ਦਿੱਤਾ ਗਿਆ ਹੈ ਕਿਉਂਕਿ ਬਰਫ਼ਬਾਰੀ ਕਾਰਨ ਘਾਟੀ ਦੀਆਂ ਸੜਕਾਂ ਤਿਲਕਣ ਹੋ ਗਈਆਂ ਹਨ। ਮੌਸਮ ਵਿਭਾਗ ਨੇ ਅਗਲੇ 24 ਘੰਟਿਆਂ ਵਿੱਚ ਸੂਬੇ ਵਿੱਚ ਮੀਂਹ ਅਤੇ ਬਰਫ਼ਬਾਰੀ ਦੀ ਭਵਿੱਖਬਾਣੀ ਕੀਤੀ ਹੈ। ਇਸ ਦੇ ਨਾਲ ਹੀ ਮੌਸਮ ਵਿਭਾਗ ਨੇ 28 ਅਕਤੂਬਰ ਤੱਕ ਸਾਫ ਮੌਸਮ ਦੀ ਭਵਿੱਖਬਾਣੀ ਜਾਰੀ ਕੀਤੀ ਹੈ।
ਦੱਸ ਦਈਏ ਕਿ ਸਰਕਾਰ ਨੇ ਹਿਮਾਚਲ ਪ੍ਰਦੇਸ਼ ਵਿੱਚ ਮਾਨਸੂਨ ਕਾਰਨ 1161 ਕਰੋੜ ਰੁਪਏ ਦੇ ਨੁਕਸਾਨ ਦੀ ਰਿਪੋਰਟ ਕੇਂਦਰ ਨੂੰ ਭੇਜੀ ਹੈ। 13 ਜੂਨ ਤੋਂ 8 ਅਕਤੂਬਰ ਤੱਕ ਰਾਜ ਵਿੱਚ ਮਾਨਸੂਨ ਦੌਰਾਨ ਰਾਜ ਵਿੱਚ ਚੱਲ ਅਤੇ ਅਚੱਲ ਸੰਪਤੀ ਨੂੰ ਭਾਰੀ ਨੁਕਸਾਨ ਪਹੁੰਚਿਆ ਹੈ। ਮਾਨਸੂਨ ਦੌਰਾਨ ਕੁਦਰਤੀ ਦੁਰਘਟਨਾਵਾਂ ਵਿੱਚ 481 ਲੋਕਾਂ ਦੀ ਮੌਤ ਹੋ ਗਈ ਹੈ, ਜਦਕਿ 627 ਲੋਕ ਜ਼ਖਮੀ ਵੀ ਹੋਏ ਹਨ। 13 ਲੋਕ ਅਜੇ ਵੀ ਲਾਪਤਾ ਦੱਸੇ ਜਾ ਰਹੇ ਹਨ। ਮੀਂਹ ਕਾਰਨ ਰਾਜ ਵਿੱਚ 794 ਪਸ਼ੂਆਂ ਦਾ ਵੀ ਨੁਕਸਾਨ ਹੋਇਆ ਹੈ। ਇਸ ਦੌਰਾਨ 1104 ਘਰਾਂ ਨੂੰ ਵੀ ਅੰਸ਼ਕ ਅਤੇ ਪੂਰੀ ਤਰ੍ਹਾਂ ਨੁਕਸਾਨ ਪਹੁੰਚਿਆ ਹੈ। ਭਾਰੀ ਮੀਂਹ ਕਾਰਨ 18 ਦੁਕਾਨਾਂ, 8 ਪੁਲ ਅਤੇ 756 ਗਊਸ਼ਾਲਾਵਾਂ ਮੀਂਹ ਦੇ ਪਾਣੀ ਵਿੱਚ ਢਹਿ ਗਈਆਂ ਹਨ। ਮਾਨਸੂਨ ਵਿੱਚ ਲੋਕ ਨਿਰਮਾਣ ਵਿਭਾਗ ਨੂੰ 686.95 ਕਰੋੜ ਰੁਪਏ ਦਾ ਨੁਕਸਾਨ ਹੋਇਆ ਹੈ।
ਉੱਥੇ ਹੀ ਜਲ ਸ਼ਕਤੀ ਵਿਭਾਗ ਨੂੰ 346.76 ਕਰੋੜ, ਬਿਜਲੀ ਵਿਭਾਗ ਨੂੰ 60.8 ਕਰੋੜ ਦਾ ਨੁਕਸਾਨ ਹੋਇਆ ਹੈ। ਸਿਹਤ ਵਿਭਾਗ ਨੂੰ ਵੀ 60 ਲੱਖ ਦਾ ਨੁਕਸਾਨ ਹੋਇਆ ਹੈ। ਸਿੱਖਿਆ ਵਿਭਾਗ ਨੂੰ 64 ਲੱਖ, ਪੇਂਡੂ ਵਿਕਾਸ ਵਿਭਾਗ ਨੂੰ 30.6 ਕਰੋੜ, ਸ਼ਹਿਰੀ ਵਿਕਾਸ ਵਿਭਾਗ ਨੂੰ 102.1 ਕਰੋੜ ਦਾ ਨੁਕਸਾਨ ਹੋਇਆ ਹੈ।
