ਪਟਨਾ: ਕਾਂਗਰਸੀ ਨੇਤਾ ਰਾਹੁਲ ਗਾਂਧੀ ਨੇ ਅੱਜ ਤੋਂ ਬਿਹਾਰ ਵਿਧਾਨ ਸਭਾ ਚੋਣਾਂ ਲਈ ਪ੍ਰਚਾਰ ਸ਼ੁਰੂ ਕਰ ਦਿੱਤਾ ਹੈ। ਗਾਂਧੀ ਰਾਜ ਵਿੱਚ ਆਪਣੇ ਗੱਠਜੋੜ ਲਈ ਕਈ ਰੈਲੀਆਂ ਕਰ ਰਹੇ ਹਨ। ਪਹਿਲਾਂ ਰਾਹੁਲ ਨੇ ਹਿਸੁਆ, ਨਵਾਦਾ ਵਿੱਚ ਇੱਕ ਰੈਲੀ ਨੂੰ ਸੰਬੋਧਿਤ ਕੀਤਾ। ਆਪਣੇ ਸੰਬੋਧਨ ਵਿੱਚ ਰਾਹੁਲ ਨੇ ਪ੍ਰਧਾਨ ਮੰਤਰੀ ਨੂੰ ਨਿਸ਼ਾਨਾ ਬਣਾਇਆ ਅਤੇ ਕਿਹਾ ਕਿ ਜਦੋਂ ਬਿਹਾਰ ਦੇ ਫ਼ੌਜੀ ਸ਼ਹੀਦ ਹੋਏ ਸਨ, ਪ੍ਰਧਾਨ ਮੰਤਰੀ ਨੇ ਕੀ ਕੀਤਾ ਸੀ। ਉਨ੍ਹਾਂ ਕਿਹਾ ਕਿ ਲੱਦਾਖ ਵਿੱਚ ਬਿਹਾਰ ਦੇ ਨੌਜਵਾਨ ਆਪਣੇ ਲਹੂ ਅਤੇ ਪਸੀਨੇ ਨਾਲ ਦੇਸ਼ ਦੀ ਰੱਖਿਆ ਕਰਦੇ ਹਨ।
ਰਾਹੁਲ ਨੇ ਲੋਕਾਂ ਨੂੰ ਸਵਾਲ ਕੀਤਾ ਕਿ ਨਿਤੀਸ਼ ਸਰਕਾਰ ਕਿਵੇਂ ਲੱਗੀ , ਪ੍ਰਧਾਨ ਮੰਤਰੀ ਦੇ ਭਾਸ਼ਣ ਕਿਹੋ ਜਿਹੇ ਲੱਗੇ। ਰਾਹੁਲ ਨੇ ਕਿਹਾ ਕਿ ਪੂਰੀ ਕੌਮ ਬਿਹਾਰ ਦੇ ਸ਼ਹੀਦਾਂ ਅੱਗੇ ਸਿਰ ਝੁਕਾਉਂਦੀ ਹੈ ਪਰ ਸਵਾਲ ਸਿਰ ਝੁਕਉਣਾ ਨਹੀਂ ਬਲਕਿ ਹੋਰ ਹੈ। ਜਦੋਂ ਬਿਹਾਰ ਦੇ ਨੌਜਵਾਨ ਫ਼ੌਜੀਆਂ ਨੂੰ ਸ਼ਹੀਦ ਕਰ ਦਿੱਤਾ ਗਿਆ ਸੀ, ਉਸ ਦਿਨ ਭਾਰਤ ਦੇ ਪ੍ਰਧਾਨ ਮੰਤਰੀ ਨੇ ਕੀ ਕਿਹਾ ਅਤੇ ਕੀ ਕੀਤਾ ਸੀ।
ਮੈਂ ਲੱਦਾਖ ਗਿਆ ਹਾਂ। ਲੱਦਾਖ ਵਿੱਚ ਭਾਰਤ ਦੀ ਸਰਹੱਦ ਹੈ ਅਤੇ ਬਿਹਾਰ, ਯੂ ਪੀ ਅਤੇ ਹੋਰ ਰਾਜਾਂ ਦੇ ਨੌਜਵਾਨ ਉਨ੍ਹਾਂ ਨੂੰ ਲਹੂ ਅਤੇ ਪਸੀਨਾ ਦੇ ਕੇ ਭਾਰਤ ਦੀ ਧਰਤੀ ਦੀ ਰੱਖਿਆ ਕਰਦੇ ਹਨ। ਲੱਦਾਖ ਵਿੱਚ ਉਹ ਥਾਵਾਂ ਹਨ ਜਿੱਥੇ ਸਿਪਾਹੀਆਂ ਨੂੰ ਚੌਕੀ ਤੱਕ ਪਹੁੰਚਣ ਲਈ ਲੰਮਾ ਪੈਂਡਾ ਤੈਅ ਕਰਨਾ ਪੈਂਦਾ ਹੈ।
ਉਨ੍ਹਾਂ ਕਿਹਾ ਕਿ ਚੀਨੀ ਫ਼ੌਜ ਭਾਰਤ ਦੇ ਅੰਦਰ ਹੈ। ਜਦੋਂ ਚੀਨ ਸਾਡੀ ਧਰਤੀ 'ਤੇ ਆਇਆ, ਸਾਡੇ ਪ੍ਰਧਾਨ ਮੰਤਰੀ ਨੇ ਇਹ ਕਹਿੰਦੇ ਹੋਏ ਫ਼ੌਜ ਦਾ ਅਪਮਾਨ ਕਿਉਂ ਕੀਤਾ ਕਿ ਕੋਈ ਸਾਡੀ ਸਰਹੱਦ 'ਤੇ ਨਹੀਂ ਆਇਆ। ਤੁਸੀਂ ਭਾਰਤ ਵਿੱਚ ਬੈਠੇ ਚੀਨੀ ਫ਼ਜੀਆਂ ਨੂੰ ਕਦੋਂ ਬਾਹਰ ਕੱਢੋਗੇ? ਸਵਾਲ ਇਹ ਹੈ।
ਗਾਂਧੀ ਨੇ ਕਿਹਾ ਕਿ ਪਿਛਲੀਆਂ ਚੋਣਾਂ ਵਿੱਚ ਉਨ੍ਹਾਂ ਨੇ 2 ਕਰੋੜ ਨੌਜਵਾਨਾਂ ਨੂੰ ਰੁਜ਼ਗਾਰ ਦੇਣ ਦਾ ਵਾਅਦਾ ਕੀਤਾ ਸੀ। ਕੀ ਕਿਸੇ ਨੂੰ ਮਿਲਿਆ?
ਰਾਹੁਲ ਭਾਗਲਪੁਰ, ਕਾਹਲਗਾਓਂ ਵਿੱਚ ਦੋ ਰੈਲੀਆਂ ਨੂੰ ਸੰਬੋਧਿਤ ਕਰਨਗੇ।
ਇਸ ਤੋਂ ਪਹਿਲਾਂ, ਰਾਹੁਲ ਨੇ ਟਵੀਟ ਕਰ ਕੇ ਕਿਹਾ, ਬਿਹਾਰ ਦਾ ਮੌਸਮ ਤੁਹਾਡੇ ਦਾਅਵਿਆਂ ਵਿੱਚ ਗੁਲਾਬੀ ਹੈ ਪਰ ਇਹ ਅੰਕੜੇ ਝੂਠੇ ਹਨ, ਇਹ ਦਾਅਵਾ ਕਾਗਜ਼ੀ ਹੈ। ਕੋਰੋਨਾ ਹੋਵੇ ਜਾਂ ਬੇਰੁਜ਼ਗਾਰੀ, ਪੂਰਾ ਦੇਸ਼ ਝੂਠੇ ਅੰਕੜਿਆਂ ਤੋਂ ਪ੍ਰੇਸ਼ਾਨ ਹੈ। ਅੱਜ ਮੈਂ ਬਿਹਾਰ ਵਿੱਚ ਤੁਹਾਡੇ 'ਚ ਰਹਾਂਗਾ। ਆਓ, ਇਸ ਝੂਠ ਅਤੇ ਕੁਸ਼ਾਸਨ ਤੋਂ ਛੁਟਕਾਰਾ ਪਾਈਏ।
ਮਹਾਂਗੱਠਜੋੜ ਤੋਂ ਮੁੱਖ ਮੰਤਰੀ ਅਹੁਦੇ ਦੇ ਉਮੀਦਵਾਰ ਤੇਜਸ਼ਵੀ ਯਾਦਵ ਹਿਸੁਆ ਵਿੱਚ ਰਾਹੁਲ ਗਾਂਧੀ ਦੇ ਨਾਲ ਮੌਜੂਦ ਸਨ। ਹਿਸੁਆ ਵਿੱਚ ਕਾਂਗਰਸ ਉਮੀਦਵਾਰ ਨੀਤੂ ਸਿੰਘ ਦਾ ਸਾਹਮਣਾ ਭਾਜਪਾ ਦੇ ਮੌਜੂਦਾ ਵਿਧਾਇਕ ਅਨਿਲ ਸਿੰਘ ਨਾਲ ਹੈ। ਕਾਹਲਗਾਓਂ ਵਿੱਚ, ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਰਾਹੁਲ ਗਾਂਧੀ ਸ਼ਕਤੀ ਸਿੰਘ ਗੋਹਿਲ ਅਤੇ ਪਾਰਟੀ ਦੇ ਹੋਰ ਸੀਨੀਅਰ ਨੇਤਾ ਵੀ ਹੋਣਗੇ।
ਵਿਰੋਧੀ ਧਿਰ ਵਿੱਚ, ਰਾਜਦ ਨੇਤਾ ਤੇਜਸ਼ਵੀ ਯਾਦਵ ਆਪਣੇ ਪਿਤਾ ਲਾਲੂ ਪ੍ਰਸਾਦ ਦੀ ਗ਼ੈਰਹਾਜ਼ਰੀ ਵਿੱਚ ਚੋਣ ਮੈਦਾਨ ਵਿੱਚ ਉੱਤਰੇ ਹਨ। ਤੇਜਸ਼ਵੀ ਹਰ ਰੋਜ਼ ਅੱਠ-ਨੌਂ ਰੈਲੀਆਂ ਨੂੰ ਸੰਬੋਧਿਤ ਕਰਦਿਆਂ ਆਪਣੀ ਪਾਰਟੀ ਅਤੇ ਕਾਂਗਰਸ ਅਤੇ ਹੋਰ ਗੱਠਜੋੜ ਪਾਰਟੀਆਂ ਦੇ ਲਈ ਸਮਰਥਨ ਮੰਗ ਰਹੇ ਹਨ।
ਚੋਣ ਮੈਦਾਨ ਵਿੱਚ ਡਟੀਆਂ ਹੋਈਆਂ ਹਨ ਸਾਰੀਆਂ ਪਾਰਟੀਆਂ
ਬਿਹਾਰ ਦੀ 243 ਮੈਂਬਰੀ ਵਿਧਾਨ ਸਭਾ ਲਈ ਤਿੰਨ ਪੜਾਅ ਦੀਆਂ ਚੋਣਾਂ ਲਈ ਵੋਟਿੰਗ 28 ਅਕਤੂਬਰ, 3 ਨਵੰਬਰ ਅਤੇ 7 ਨਵੰਬਰ ਨੂੰ ਹੋਵੇਗੀ, ਜਦੋਂਕਿ ਵੋਟਾਂ ਦੀ ਗਿਣਤੀ 10 ਨਵੰਬਰ ਨੂੰ ਹੋਵੇਗੀ। ਪਹਿਲੇ ਪੜਾਅ ਵਿੱਚ 28 ਨਵੰਬਰ ਨੂੰ 71 ਵਿਧਾਨ ਸਭਾ ਸੀਟਾਂ ਲਈ ਵੋਟਿੰਗ ਹੋਵੇਗੀ, ਜਦਕਿ ਦੂਜੇ ਪੜਾਅ ਵਿੱਚ 3 ਨਵੰਬਰ ਨੂੰ 94 ਅਤੇ ਆਖਰੀ ਪੜਾਅ ਵਿੱਚ 7 ਨਵੰਬਰ ਨੂੰ 78 ਸੀਟਾਂ ਲਈ ਵੋਟਿੰਗ ਹੋਵੇਗੀ। ਇਸ ਚੋਣ ਵਿੱਚ, ਜਿੱਥੇ ਰਾਜਦ ਕਾਂਗਰਸ ਅਤੇ ਖੱਬੀਆਂ ਪਾਰਟੀਆਂ ਨਾਲ ਚੋਣ ਮੈਦਾਨ ਵਿੱਚ ਹੈ, ਉਥੇ ਭਾਜਪਾ ਅਤੇ ਜੇਡੀਯੂ ਸਮੇਤ ਚਾਰੇ ਪਾਰਟੀਆਂ ਚੋਣ ਮੈਦਾਨ ਵਿੱਚ ਡਟੀਆਂ ਹੋਈਆਂ ਹਨ।
