ਨਵੀਂ ਦਿੱਲੀ: ਭਾਰਤ ਦੇ ਸਟਾਰ ਆਫ ਸਪਿਨਰ ਰਵੀਚੰਦਰਨ ਅਸ਼ਵਿਨ ਨੇ ਹਾਲ ਹੀ 'ਚ ਅੰਤਰਰਾਸ਼ਟਰੀ ਕ੍ਰਿਕਟ ਤੋਂ ਸੰਨਿਆਸ ਲੈ ਲਿਆ ਹੈ। ਜਦੋਂ ਉਨ੍ਹਾਂ ਦੇ ਸਾਥੀ ਰਵਿੰਦਰ ਜਡੇਜਾ ਨੂੰ ਅਸ਼ਵਿਨ ਦੇ ਸੰਨਿਆਸ ਬਾਰੇ ਪੁੱਛਿਆ ਗਿਆ ਤਾਂ ਉਨ੍ਹਾਂ ਨੇ ਅਜਿਹਾ ਜਵਾਬ ਦਿੱਤਾ ਜਿਸ ਨੇ ਸਭ ਨੂੰ ਹੈਰਾਨ ਕਰ ਦਿੱਤਾ। ਇਹ ਦੋਵੇਂ ਇੱਕ ਦਹਾਕੇ ਤੋਂ ਵੱਧ ਸਮੇਂ ਤੋਂ ਭਾਰਤੀ ਟੀਮ ਵਿੱਚ ਸਪਿਨ ਪਾਰਟਨਰ ਦੀ ਭੂਮਿਕਾ ਨਿਭਾ ਚੁੱਕੇ ਹਨ।
ਜਡੇਜਾ ਨੂੰ ਨਹੀਂ ਸੀ ਅਸ਼ਵਿਨ ਦੇ ਸੰਨਿਆਸ ਦੀ ਜਾਣਕਾਰੀ
ਜਡੇਜਾ ਨੇ ਮੈਲਬੋਰਨ ਕ੍ਰਿਕਟ ਗਰਾਊਂਡ (MCG) 'ਚ ਪੱਤਰਕਾਰਾਂ ਨੂੰ ਕਿਹਾ, 'ਮੈਨੂੰ ਆਖਰੀ ਸਮੇਂ 'ਤੇ ਉਨ੍ਹਾਂ ਦੇ ਸੰਨਿਆਸ ਬਾਰੇ ਪਤਾ ਲੱਗਾ। ਮੈਨੂੰ ਪ੍ਰੈੱਸ ਕਾਨਫਰੰਸ ਤੋਂ ਪੰਜ ਮਿੰਟ ਪਹਿਲਾਂ ਪਤਾ ਲੱਗਾ। ਇਹ ਹੈਰਾਨ ਕਰਨ ਵਾਲਾ ਸੀ। ਅਸੀਂ ਪੂਰਾ ਦਿਨ ਇਕੱਠੇ ਬਿਤਾਇਆ ਅਤੇ ਉਨ੍ਹਾਂ ਨੇ ਮੈਨੂੰ ਇਸ ਦਾ ਕੋਈ ਸੰਕੇਤ ਵੀ ਨਹੀਂ ਦਿੱਤਾ। ਅਸੀਂ ਸਾਰੇ ਜਾਣਦੇ ਹਾਂ ਕਿ ਅਸ਼ਵਿਨ ਦਾ ਦਿਮਾਗ ਕਿਵੇਂ ਕੰਮ ਕਰਦਾ ਹੈ'।
ਰਵਿੰਦਰ ਜਡੇਜਾ ਨੇ ਅੱਗੇ ਕਿਹਾ, 'ਸਾਡੇ ਬਹੁਤ ਸਾਰੇ ਸਾਥੀ ਰਹੇ ਹਨ। ਅਸ਼ਵਿਨ ਮੇਰੇ ਗੁਰੂ ਦੇ ਵਾਂਗ ਹਨ। ਮੈਂ ਉਨ੍ਹਾਂ ਦੇ ਸੁਝਾਵਾਂ, ਸਲਾਹਾਂ ਅਤੇ ਮੈਦਾਨ 'ਤੇ ਉਨ੍ਹਾਂ ਨਾਲ ਮੇਰੀ ਸਾਂਝੇਦਾਰੀ ਨੂੰ ਯਾਦ ਕਰਾਂਗਾ। ਅਸੀਂ ਬੱਲੇਬਾਜ਼ਾਂ ਦੇ ਖਿਲਾਫ ਯੋਜਨਾਵਾਂ ਬਣਾਉਂਦੇ ਸੀ। ਮੈਂ ਬਹੁਤ ਸਾਰੀਆਂ ਚੀਜ਼ਾਂ ਨੂੰ ਯਾਦ ਕਰਾਂਗਾ। ਉਮੀਦ ਹੈ ਕਿ ਜਲਦੀ ਹੀ ਅਸ਼ਵਿਨ ਦੀ ਜਗ੍ਹਾ ਬਿਹਤਰ ਸਪਿਨਰ ਅਤੇ ਆਲਰਾਊਂਡਰ ਲੈਣਗੇ'।
💬💬 R Ashwin played with me like an on-field mentor#TeamIndia all-rounder Ravindra Jadeja reminisces about his partnership with R Ashwin. 👌👌#ThankyouAshwin | #AUSvIND | @imjadeja pic.twitter.com/3QGQFYztmB
— BCCI (@BCCI) December 21, 2024
ਸੀਰੀਜ਼ ਦੇ ਬਾਰੇ 'ਚ ਜਡੇਜਾ ਨੇ ਕਿਹਾ, 'ਅਸੀਂ ਚੰਗੀ ਸਥਿਤੀ 'ਚ ਹਾਂ, ਤਿੰਨ ਮੈਚਾਂ ਤੋਂ ਬਾਅਦ ਵੀ ਇਹ 1-1 ਨਾਲ ਬਰਾਬਰੀ 'ਤੇ ਹੈ। ਜੇਕਰ ਅਸੀਂ ਅਗਲੇ ਦੋ ਮੈਚਾਂ ਵਿੱਚੋਂ ਇੱਕ ਵੀ ਜਿੱਤ ਲੈਂਦੇ ਹਾਂ ਤਾਂ ਵੀ ਅਸੀਂ ਲੜੀ ਬਰਕਰਾਰ ਰੱਖਾਂਗੇ ਕਿਉਂਕਿ ਅਸੀਂ ਇੱਥੇ ਪਿਛਲੇ ਦੋ ਮੈਚ ਜਿੱਤੇ ਹਨ। ਮੈਲਬੌਰਨ ਵਿੱਚ ਆਪਣੇ ਆਪ ਨੂੰ ਅੱਗੇ ਵਧਾਉਣ ਅਤੇ ਚੰਗਾ ਪ੍ਰਦਰਸ਼ਨ ਕਰਨ ਦਾ ਇਹ ਇੱਕ ਚੰਗਾ ਮੌਕਾ ਹੈ। ਫਿਲਹਾਲ ਸਾਡਾ ਧਿਆਨ ਬਾਕਸਿੰਗ ਡੇ ਟੈਸਟ 'ਤੇ ਹੈ। ਇਹ ਸਾਡੇ ਲਈ ਅਹਿਮ ਮੈਚ ਹੈ'।
ਦੋਵਾਂ ਨੇ ਇਕੱਠਿਆਂ ਹੀ 587 ਵਿਕਟਾਂ ਲਈਆਂ
ਅਸ਼ਵਿਨ ਅਤੇ ਜਡੇਜਾ ਨੇ ਇਕੱਠੇ 58 ਟੈਸਟ ਖੇਡੇ ਹਨ। ਇਨ੍ਹਾਂ ਦੋਵਾਂ ਨੇ ਮਿਲ ਕੇ 587 ਵਿਕਟਾਂ ਲਈਆਂ ਹਨ। ਦੋਵਾਂ ਨੇ 501 ਵਿਕਟਾਂ ਲੈਣ ਵਾਲੇ ਅਨਿਲ ਕੁੰਬਲੇ ਅਤੇ ਹਰਭਜਨ ਸਿੰਘ ਦੀ ਮਹਾਨ ਜੋੜੀ ਨੂੰ ਪਿੱਛੇ ਛੱਡ ਦਿੱਤਾ ਹੈ। ਅਸ਼ਵਿਨ ਦੇ ਅਚਾਨਕ ਸੰਨਿਆਸ ਲੈਣ ਤੋਂ ਪੂਰਾ ਕ੍ਰਿਕਟ ਜਗਤ ਹੈਰਾਨ ਹੈ, ਭਾਰਤ ਅਤੇ ਆਸਟ੍ਰੇਲੀਆ ਵਿਚਾਲੇ 26 ਦਸੰਬਰ ਨੂੰ ਐੱਮਸੀਜੀ, ਮੈਲਬੋਰਨ 'ਚ ਚੌਥਾ ਟੈਸਟ ਮੈਚ ਖੇਡਿਆ ਜਾ ਰਿਹਾ ਹੈ।
