ਨਵੀਂ ਦਿੱਲੀ: ਮਹਿਲਾ ਟੀ-20 ਵਿਸ਼ਵ ਕੱਪ 2024 ਨੂੰ ਲੈ ਕੇ ਇੱਕ ਵੱਡੀ ਖ਼ਬਰ ਸਾਹਮਣੇ ਆਈ ਹੈ। ਪਾਕਿਸਤਾਨ ਕ੍ਰਿਕਟ ਬੋਰਡ (ਪੀ.ਸੀ.ਬੀ.) ਵਲੋਂ ਜਾਰੀ ਬਿਆਨ 'ਚ ਕਿਹਾ ਗਿਆ ਹੈ ਕਿ ਪਾਕਿਸਤਾਨ ਦੀ ਕਪਤਾਨ ਫਾਤਿਮਾ ਸਨਾ ਵਤਨ ਪਰਤੇਗੀ। ਫਾਤਿਮਾ ਸਨਾ ਦੇ ਪਿਤਾ ਦਾ ਦਿਹਾਂਤ ਹੋ ਗਿਆ ਹੈ। ਪਿਤਾ ਦੇ ਦਿਹਾਂਤ ਦੀ ਖਬਰ ਮਿਲਦੇ ਹੀ ਫਾਤਿਮਾ ਪਾਕਿਸਤਾਨ ਪਰਤਣ ਲਈ ਤਿਆਰ ਹੈ। ਉਹ ਜਲਦੀ ਹੀ ਯੂਏਈ ਤੋਂ ਪਾਕਿਸਤਾਨ ਲਈ ਉਡਾਣ ਭਰੇਗੀ।
ਮਹਿਲਾ ਟੀ-20 ਵਿਸ਼ਵ ਕੱਪ 2024 'ਚ ਪਾਕਿਸਤਾਨ ਦਾ ਅਗਲਾ ਮੈਚ ਸ਼ੁੱਕਰਵਾਰ ਨੂੰ ਦੁਬਈ ਇੰਟਰਨੈਸ਼ਨਲ ਸਟੇਡੀਅਮ 'ਚ ਮੌਜੂਦਾ ਚੈਂਪੀਅਨ ਆਸਟ੍ਰੇਲੀਆ ਨਾਲ ਹੋਵੇਗਾ, ਇਸ ਲਈ ਫਾਤਿਮਾ ਇਸ ਮੈਚ 'ਚ ਨਹੀਂ ਖੇਡ ਸਕੇਗੀ। ਉਨ੍ਹਾਂ ਦੀ ਜਗ੍ਹਾ ਵਿਕਟਕੀਪਰ ਬੱਲੇਬਾਜ਼ ਮੁਨੀਬਾ ਅਲੀ ਟੀਮ ਦੀ ਕਮਾਨ ਸੰਭਾਲ ਸਕਦੇ ਹਨ।
ਸੋਸ਼ਲ ਮੀਡੀਆ 'ਤੇ ਟੀਮ ਮੈਂਬਰ ਫਾਤਿਮਾ ਸਨਾ ਨੂੰ ਇਸ ਮੁਸ਼ਕਿਲ ਸਮੇਂ 'ਚ ਹਿੰਮਤ ਦੇ ਰਹੀ ਹੈ। ਅਨੁਭਵੀ ਆਫ ਸਪਿਨ ਆਲਰਾਊਂਡਰ ਨਿਦਾ ਡਾਰ ਨੇ ਲਿਖਿਆ, 'ਤੁਹਾਡੇ ਪਿਤਾ ਦੇ ਦਿਹਾਂਤ ਦੀ ਖਬਰ ਸੁਣ ਕੇ ਬਹੁਤ ਦੁੱਖ ਹੋਇਆ, ਪੂਰੀ ਟੀਮ ਦੀ ਤਰਫੋਂ, ਕਿਰਪਾ ਕਰਕੇ ਸਾਡੇ ਦਿਲੋਂ ਸੰਵੇਦਨਾ ਸਵੀਕਾਰ ਕਰੋ। ਸ਼ਰਧਾਂਜਲੀ'।
ਬੱਲੇਬਾਜ਼ ਸਿਦਰਾ ਅਮੀਨ ਨੇ ਲਿਖਿਆ, 'ਬਹੁਤ ਦੁੱਖ ਦੇ ਨਾਲ ਇਹ ਸੂਚਿਤ ਕੀਤਾ ਜਾਂਦਾ ਹੈ ਕਿ ਫਾਤਿਮਾ ਸਨਾ ਦੇ ਪਿਤਾ ਦਾ ਦਿਹਾਂਤ ਹੋ ਗਿਆ ਹੈ, ਕਿਰਪਾ ਕਰਕੇ ਉਨ੍ਹਾਂ ਲਈ ਪ੍ਰਾਰਥਨਾ ਕਰੋ। ਪ੍ਰਮਾਤਮਾ ਉਨ੍ਹਾਂ ਨੂੰ ਸਵਰਗ ਵਿੱਚ ਉੱਚਾ ਸਥਾਨ ਦੇਵੇ'।
ਫਾਤਿਮਾ ਦੀ ਗੈਰਹਾਜ਼ਰੀ ਪਾਕਿਸਤਾਨੀ ਟੀਮ ਲਈ ਵੱਡਾ ਝਟਕਾ ਹੈ, ਕਿਉਂਕਿ ਸੈਮੀਫਾਈਨਲ 'ਚ ਪਹੁੰਚਣ ਲਈ ਉਨ੍ਹਾਂ ਨੂੰ ਗਰੁੱਪ-ਏ ਦੇ ਆਪਣੇ ਬਾਕੀ ਦੋਵੇਂ ਮੈਚ ਜਿੱਤਣੇ ਹੋਣਗੇ। ਪਾਕਿਸਤਾਨ ਫਿਲਹਾਲ ਸ਼੍ਰੀਲੰਕਾ 'ਤੇ ਜਿੱਤ ਅਤੇ ਭਾਰਤ ਤੋਂ ਹਾਰਨ ਤੋਂ ਬਾਅਦ ਗਰੁੱਪ ਏ 'ਚ ਤੀਜੇ ਸਥਾਨ 'ਤੇ ਹੈ। ਸਤੰਬਰ 'ਚ ਅਗਵਾਈ ਦੀ ਜ਼ਿੰਮੇਵਾਰੀ ਸੰਭਾਲਣ ਵਾਲੀ ਫਾਤਿਮਾ ਮੌਜੂਦਾ ਮਹਿਲਾ ਟੀ-20 ਵਿਸ਼ਵ ਕੱਪ 'ਚ ਸਭ ਤੋਂ ਨੌਜਵਾਨ ਕਪਤਾਨ ਹੈ। ਸ਼੍ਰੀਲੰਕਾ ਦੇ ਖਿਲਾਫ ਆਪਣੇ ਹਰਫਨਮੌਲਾ ਪ੍ਰਦਰਸ਼ਨ ਦੇ ਕਾਰਨ, ਉਨ੍ਹਾਂ ਨੂੰ ਪਲੇਅਰ ਆਫ ਦ ਮੈਚ ਦਾ ਪੁਰਸਕਾਰ ਮਿਲਿਆ।
ਇਸ ਤੋਂ ਬਾਅਦ ਉਨ੍ਹਾਂ ਨੇ ਦੁਬਈ 'ਚ ਦੁਪਹਿਰ ਦੇ ਮੈਚ 'ਚ ਜੇਮੀਮਾ ਰੌਡਰਿਗਜ਼ ਅਤੇ ਰਿਚਾ ਘੋਸ਼ ਨੂੰ ਲਗਾਤਾਰ ਆਊਟ ਕਰਕੇ ਭਾਰਤ ਨੂੰ ਕੁਝ ਪਰੇਸ਼ਾਨੀ ਖੜ੍ਹੀ ਕੀਤੀ ਅਤੇ ਇਹ ਯਕੀਨੀ ਬਣਾਇਆ ਕਿ ਪਾਕਿਸਤਾਨ ਦੀ ਨੈੱਟ ਰਨ ਰੇਟ 'ਤੇ ਕੋਈ ਗੰਭੀਰ ਪ੍ਰਭਾਵ ਨਾ ਪਵੇ। ਆਸਟ੍ਰੇਲੀਆ ਖਿਲਾਫ ਮੈਚ ਤੋਂ ਬਾਅਦ ਪਾਕਿਸਤਾਨ ਸੋਮਵਾਰ ਨੂੰ ਦੁਬਈ 'ਚ ਨਿਊਜ਼ੀਲੈਂਡ ਖਿਲਾਫ ਆਪਣੇ ਗਰੁੱਪ-ਏ ਦੀ ਮੁਹਿੰਮ ਦੀ ਸਮਾਪਤੀ ਕਰੇਗਾ।
