ਨਵੀਂ ਦਿੱਲੀ: ਧਰਮ ਇਕ ਨਿੱਜੀ ਮਾਮਲਾ ਹੁੰਦਾ ਹੈ ਅਤੇ ਹਰ ਕਿਸੇ ਨੂੰ ਆਪਣੀ ਪਸੰਦ ਦੇ ਧਰਮ ਦਾ ਪਾਲਣ ਕਰਨ ਦਾ ਅਧਿਕਾਰ ਵੀ ਹੈ। ਕ੍ਰਿਕਟਰ ਵੀ ਕਿਸੇ ਨਾ ਕਿਸੇ ਧਰਮ ਦਾ ਪਾਲਣ ਕਰਦੇ ਹਨ। ਪਰ ਕੁਝ ਕ੍ਰਿਕਟਰ ਪਿਆਰ, ਆਸਥਾ ਜਾਂ ਨਿੱਜੀ ਤਰਜੀਹ ਕਾਰਨ ਆਪਣਾ ਧਰਮ ਬਦਲ ਚੁੱਕੇ ਹਨ। ਇੱਥੇ ਅਸੀਂ ਕੁਝ ਅਜਿਹੇ ਹੀ ਕ੍ਰਿਕਟਰਾਂ ਬਾਰੇ ਦੱਸਣ ਜਾ ਰਹੇ ਹਾਂ।
ਵਿਨੋਦ ਕਾਂਬਲੀ (ਭਾਰਤ)
ਭਾਰਤੀ ਟੀਮ ਦੇ ਸਾਬਕਾ ਬੱਲੇਬਾਜ਼ ਵਿਨੋਦ ਕਾਂਬਲੀ ਦਾ ਜਨਮ ਪੁਣੇ, ਮਹਾਰਾਸ਼ਟਰ ਵਿੱਚ ਇੱਕ ਹਿੰਦੂ ਪਰਿਵਾਰ ਵਿੱਚ ਹੋਇਆ ਸੀ, ਪਰ ਬਾਅਦ ਵਿੱਚ ਉਨ੍ਹਾਂ ਨੇ ਇੱਕ ਈਸਾਈ ਲੜਕੀ ਨਾਲ ਵਿਆਹ ਕਰਨ ਤੋਂ ਬਾਅਦ 2010 ਵਿੱਚ ਈਸਾਈ ਧਰਮ ਅਪਣਾ ਲਿਆ। ਵਿਨੋਦ ਸਚਿਨ ਤੇਂਦੁਲਕਰ ਦੇ ਬਚਪਨ ਦੇ ਦੋਸਤ ਵੀ ਹਨ। ਉਨ੍ਹਾਂ ਨੇ ਭਾਰਤ ਲਈ 17 ਟੈਸਟ ਅਤੇ 105 ਵਨਡੇ ਖੇਡੇ। ਜਿਸ ਵਿੱਚ ਉਨ੍ਹਾਂ ਨੇ ਕੁੱਲ 3561 ਦੌੜਾਂ ਬਣਾਈਆਂ।
ਮੁਹੰਮਦ ਯੂਸਫ਼ (ਪਾਕਿਸਤਾਨ)
ਇੱਕ ਈਸਾਈ ਪਰਿਵਾਰ ਵਿੱਚ ਜਨਮੇ, ਪਾਕਿਸਤਾਨ ਦੇ ਸਾਬਕਾ ਬੱਲੇਬਾਜ਼ ਮੁਹੰਮਦ ਯੂਸਫ ਦਾ ਪਹਿਲਾ ਨਾਮ ਯੂਸਫ ਯੋਹਾਨਾ ਸੀ। ਉਨ੍ਹਾਂ ਨੇ 2005-06 ਵਿੱਚ ਇਸਲਾਮ ਕਬੂਲ ਕੀਤਾ ਅਤੇ 2010 ਤੱਕ ਪਾਕਿਸਤਾਨ ਲਈ ਖੇਡਦਾ ਰਹੇ। ਉਹ ਪਾਕਿਸਤਾਨ ਕ੍ਰਿਕਟ ਦੇ ਇਤਿਹਾਸ ਦੇ ਸਭ ਤੋਂ ਸਫਲ ਬੱਲੇਬਾਜ਼ਾਂ ਵਿੱਚੋਂ ਇੱਕ ਹਨ। ਉਨ੍ਹਾਂ ਨੇ 90 ਟੈਸਟ, 288 ਵਨਡੇ ਅਤੇ 3 ਟੀ-20 ਮੈਚ ਖੇਡੇ ਹਨ, ਕੁੱਲ ਮਿਲਾ ਕੇ 17,000 ਤੋਂ ਵੱਧ ਦੌੜਾਂ ਬਣਾਈਆਂ ਹਨ।
ਵੇਨ ਪਾਰਨੇਲ (ਦੱਖਣੀ ਅਫਰੀਕਾ)
ਦੱਖਣੀ ਅਫ਼ਰੀਕਾ ਦੇ ਸਾਬਕਾ ਤੇਜ਼ ਗੇਂਦਬਾਜ਼ ਵੇਨ ਪਾਰਨੇਲ ਨੇ ਈਸਾਈ ਧਰਮ ਛੱਡ ਕੇ 2011 ਵਿੱਚ ਇਸਲਾਮ ਕਬੂਲ ਕਰ ਲਿਆ ਅਤੇ ਆਪਣਾ ਨਾਂ ਬਦਲ ਕੇ ਵਲੀਦ ਪਾਰਨੇਲ ਰੱਖ ਲਿਆ। ਪਾਰਨੇਲ 2009 ਤੋਂ 2017 ਤੱਕ ਆਪਣੇ ਦੇਸ਼ ਲਈ ਖੇਡੇ। ਉਨ੍ਹਾਂ ਨੇ ਦੱਖਣੀ ਅਫਰੀਕਾ ਲਈ 4 ਟੈਸਟ, 65 ਵਨਡੇ ਅਤੇ 40 ਟੀ-20 ਮੈਚ ਖੇਡੇ ਹਨ, ਜਿਸ ਵਿੱਚ ਉਨ੍ਹਾਂ ਨੇ ਕੁੱਲ 127 ਵਿਕਟਾਂ ਲਈਆਂ ਹਨ।
ਤਿਲਕਰਤਨੇ ਦਿਲਸ਼ਾਨ (ਸ਼੍ਰੀਲੰਕਾ)
ਸ਼੍ਰੀਲੰਕਾ ਦੇ ਮਹਾਨ ਬੱਲੇਬਾਜ਼ ਤਿਲਕਰਤਨੇ ਦਿਲਸ਼ਾਨ ਦਾ ਜਨਮ ਇੱਕ ਮੁਸਲਿਮ ਪਰਿਵਾਰ ਵਿੱਚ ਹੋਇਆ ਸੀ। ਪਰ ਬਾਅਦ ਵਿੱਚ ਆਪਣੇ ਮਾਤਾ-ਪਿਤਾ ਤੋਂ ਵੱਖ ਹੋਣ ਤੋਂ ਬਾਅਦ ਉਨ੍ਹਾਂ ਨੇ 16 ਸਾਲ ਦੀ ਉਮਰ ਵਿੱਚ ਬੁੱਧ ਧਰਮ ਅਪਣਾ ਲਿਆ। ਉਨ੍ਹਾਂ ਦਾ ਪੁਰਾਣਾ ਨਾਮ ਤਾਇਵਾਨ ਮੁਹੰਮਦ ਦਿਲਸ਼ਾਨ ਸੀ। ਦਿਲਸ਼ਾਨ ਸ਼੍ਰੀਲੰਕਾ ਕ੍ਰਿਕਟ ਦੇ ਇਤਿਹਾਸ ਦੇ ਸਭ ਤੋਂ ਵਿਸਫੋਟਕ ਬੱਲੇਬਾਜ਼ਾਂ ਵਿੱਚੋਂ ਇੱਕ ਰਹੇ ਹਨ। ਉਨ੍ਹਾਂ ਨੇ 87 ਟੈਸਟ, 330 ਵਨਡੇ ਅਤੇ 80 ਟੀ-20 ਮੈਚ ਖੇਡੇ, ਜਿਸ ਵਿੱਚ ਉਨ੍ਹਾਂ ਨੇ 17,000 ਤੋਂ ਵੱਧ ਦੌੜਾਂ ਬਣਾਈਆਂ ਅਤੇ ਕੁੱਲ ਮਿਲਾ ਕੇ 150 ਤੋਂ ਵੱਧ ਵਿਕਟਾਂ ਲਈਆਂ।
ਏ.ਜੀ. ਕਿਰਪਾਲ ਸਿੰਘ (ਭਾਰਤ)
ਏ.ਜੀ. ਕ੍ਰਿਪਾਲ ਸਿੰਘ ਇੱਕ ਭਾਰਤੀ ਬੱਲੇਬਾਜ਼ ਸੀ, ਜੋ 1955 ਤੋਂ 1964 ਤੱਕ ਆਪਣੇ ਦੇਸ਼ ਲਈ ਖੇਡੇ। ਉਹਨਾਂ ਦਾ ਜਨਮ ਇੱਕ ਸਿੱਖ ਪਰਿਵਾਰ ਵਿੱਚ ਹੋਇਆ ਸੀ ਅਤੇ ਉਹਨਾਂ ਦਾ ਨਾਮ ਅਮਰਜੀਤ ਸਿੰਘ ਕ੍ਰਿਪਾਲ ਸੀ। ਪਰ ਉਨ੍ਹਾਂ ਨੇ 1960 ਵਿੱਚ ਈਸਾਈ ਧਰਮ ਅਪਣਾ ਲਿਆ ਅਤੇ ਆਪਣਾ ਨਾਮ ਬਦਲ ਕੇ ਐਂਥਨੀ ਜਾਰਜ ਕ੍ਰਿਪਾਲ ਸਿੰਘ ਰੱਖ ਲਿਆ। ਉਨ੍ਹਾਂ ਨੇ ਭਾਰਤ ਲਈ 14 ਟੈਸਟ ਮੈਚ ਖੇਡੇ, ਜਿਸ ਵਿੱਚ ਉਨ੍ਹਾਂ ਨੇ 422 ਦੌੜਾਂ ਬਣਾਈਆਂ ਅਤੇ ਕੁੱਲ 6 ਵਿਕਟਾਂ ਲਈਆਂ।
ਸੂਰਜ ਰਣਦੀਵ (ਸ਼੍ਰੀਲੰਕਾ)
ਸ਼੍ਰੀਲੰਕਾ ਦੇ ਸਾਬਕਾ ਆਫ ਸਪਿਨਰ ਸੂਰਜ ਰਣਦੀਵ ਦਾ ਜਨਮ ਇੱਕ ਮੁਸਲਿਮ ਪਰਿਵਾਰ ਵਿੱਚ ਹੋਇਆ ਸੀ। ਉਨ੍ਹਾਂ ਦਾ ਪੁਰਾਣਾ ਨਾਮ ਮੁਹੰਮਦ ਮਸਰੂਕ ਸੂਰਜ ਸੀ, ਬਾਅਦ ਵਿੱਚ ਉਨ੍ਹਾਂ ਨੇ 2010 ਵਿੱਚ ਬੁੱਧ ਧਰਮ ਅਪਣਾ ਲਿਆ ਅਤੇ ਆਪਣਾ ਨਾਮ ਬਦਲ ਕੇ ਸੂਰਜ ਰਣਦੀਵ ਰੱਖ ਲਿਆ। ਉਨ੍ਹਾਂ ਨੇ 2009 ਤੋਂ 2016 ਤੱਕ ਆਪਣੇ ਦੇਸ਼ ਲਈ ਕ੍ਰਿਕਟ ਖੇਡਿਆ। ਜਿਸ ਵਿੱਚ 12 ਟੈਸਟ, 31 ਵਨਡੇ ਅਤੇ 7 ਟੀ-20 ਮੈਚ ਸ਼ਾਮਲ ਹਨ।
ਰੌਬਿਨ ਉਥੱਪਾ (ਭਾਰਤ)
ਰੌਬਿਨ ਉਥੱਪਾ ਤੀਜੇ ਭਾਰਤੀ ਕ੍ਰਿਕਟਰ ਹਨ ਜਿਨ੍ਹਾਂ ਨੇ ਧਰਮ ਬਦਲਿਆ ਹੈ। ਉਥੱਪਾ ਦਾ ਜਨਮ ਇੱਕ ਹਿੰਦੂ ਪਰਿਵਾਰ ਵਿੱਚ ਹੋਇਆ ਸੀ ਪਰ 2011 ਵਿੱਚ ਉਨ੍ਹਾਂ ਨੇ ਈਸਾਈ ਧਰਮ ਅਪਣਾ ਲਿਆ ਅਤੇ ਹੁਣ ਉਹ ਈਸਾਈ ਰੀਤੀ ਰਿਵਾਜਾਂ ਦਾ ਪਾਲਣ ਕਰਦੇ ਹਨ। ਉਥੱਪਾ ਨੇ ਭਾਰਤ ਲਈ 46 ਵਨਡੇ ਅਤੇ 13 ਟੀ-20 ਮੈਚ ਖੇਡੇ ਹਨ।
