ଶାବର ଶ୍ରୀକ୍ଷେତ୍ରରୁ ଗଡ଼ିଲା ଜଗନ୍ନାଥଙ୍କ ଅର୍ପଣ ରଥ

Arpan Rath in koraput: କୋରାପୁଟ: ଶ୍ରୀମନ୍ଦିର ପରିକ୍ରମା ପ୍ରକଳ୍ପର ଶୁଭ ଉଦଘାଟନ ଆସନ୍ତା ୧୭ ତାରିଖରେ ଅନୁଷ୍ଠିତ ହେବ । ତେଣୁ ଏହି ଐତିହାସିକ କାର୍ଯ୍ୟକ୍ରମ ପାଇଁ ସମଗ୍ର ରାଜ୍ୟରେ ଶ୍ରୀଜଗନ୍ନାଥ ଅର୍ପଣ ରଥ ଗତ ଶନିବାରଠାରୁ ଗାଁରୁ ସହର ଯାଏଁ ବୁଲିବା ଆରମ୍ଭ କରିଛି । ଏହି ଅର୍ପଣ ରଥ ଦ୍ୱାରା ରାଜ୍ୟରେ ପ୍ରତ୍ୟେକ ଗାଁରୁ ଚାଉଳ ଓ ଗୁଆ ସଂଗୃହିତ ହେବ । ଏହି ଅବସରରେ ଆଜି (ସୋମବାର) ଶାବର ଶ୍ରୀକ୍ଷେତ୍ର ଜଗନ୍ନାଥଙ୍କ ପାଖରେ ପୂଜାର୍ଚ୍ଚନା କରାଯାଇ ଜଗନ୍ନାଥ ଅର୍ପଣ ରଥର ଶୁଭ ଉଦଘାଟନ କରାଯାଇଛି l 2ଟି ରଥ କୋରାପୁଟ ପୌର ପରିଷଦ ଓ ଆଉ 2ଟି ରଥ ବ୍ଲକର ବିଭିନ୍ନ ପଞ୍ଚାୟତ ବୁଲିବ l ଏହି ଭ୍ରମ୍ୟମାଣ ରଥରେ ଜଗନ୍ନାଥଙ୍କ ଭଜନ ଓ ଜଣାଣ ବାଜିବା ସହ ଶୋଭାଯାତ୍ରାରେ ସଂକୀର୍ତ୍ତନ ମଣ୍ଡଳୀ ସହିତ ସହରବାସୀ ସାମିଲ ହୋଇଥିଲେ l ତେବେ ଏହି ଜୟ ଜଗନ୍ନାଥ ଅର୍ପଣ ରଥ ସକୀର୍ତ୍ତନ ମଣ୍ଡଳୀ ସହ ପରିକ୍ରମା କରି ପ୍ରତ୍ୟେକ ଗୃହରୁ ଭକ୍ତମାନଙ୍କଠାରୁ ଅରୁଆ ଚାଉଳ ଓ ଗୁଆ ସଂଗ୍ରହ କରାଯିବ l ଯାହା ପରିକ୍ରମା ପ୍ରକଳ୍ପ କାର୍ଯ୍ୟରେ ବ୍ୟବହାର ହେବ । ତେବେ ପ୍ରଭୁ ଜଗନ୍ନାଥଙ୍କ ସଂସ୍କୃତି ପରମ୍ପରାକୁ ପ୍ରତ୍ୟେକ ଓଡ଼ିଆମାନଙ୍କ ପାଖରେ ପହଞ୍ଚାଇବା ପାଇଁ ଏ ହେଉଛି ଏକ ପ୍ରୟାସ l 

ଇଟିଭି ଭାରତ, କୋରାପୁଟ