world cup 2023: ପୁନେରେ ଟିମ୍ ଇଣ୍ଡିଆ, 19ରେ ବାଂଲାଦେଶ ବିପକ୍ଷରେ ମୁକାବିଲା

ପୁନେ: ICC ଦିନିକିଆ କ୍ରିକେଟ୍‌ ବିଶ୍ବକପ 2023ରେ ଏଯାବତ ଭାରତ ଅପରାଜେୟ ରହିଛି । ପ୍ରଥମେ ଅଷ୍ଟ୍ରେଲିଆ, ପରେ ଆଫଗାନିସ୍ତାନ ଓ ତୃତୀୟ ମ୍ୟାଚରେ ପାରମ୍ପରିକ ପ୍ରତିନ୍ଦ୍ବନ୍ଦୀ ପାକିସ୍ତାନକୁ ମାତ ଦେଇ ଲଗାତାର ହ୍ୟାଟ୍ରିକ ବିଜୟ ହାସଲ କରିଛି ରୋହିତ ସେନା । ଆସନ୍ତା 19 ତାରିଖରେ ବାଂଲାଦେଶ ବିପକ୍ଷରେ ଖେଳିବ ଭାରତ । ଏନେଇ ଟିମ୍‌ ଇଣ୍ଡିଆ ପୁନେରେ ପହଞ୍ଚିଛି । ପାକିସ୍ତାନ ବିପକ୍ଷ ମ୍ୟାଚ୍‌ ଅହମ୍ମଦାବାଦରେ ଖେଳାଯାଇଥିଲା । ଅହମ୍ମଦାବାଦରୁ ପୁନେରେ ପହଞ୍ଚିଛି ରୋହିତ ସେନା । ଦଳର ସମସ୍ତ ଖେଳାଳି, ମୁଖ୍ୟ କୋଚ ରାହୁଲ ଦ୍ରାବିଡ ଓ ଷ୍ଟାଫ ସମସ୍ତେ ପୁନେରେ ପହଞ୍ଚିଛନ୍ତି । ବାଂଲାଦେଶ ବିପକ୍ଷ ମୁକାବିଲା ପାଇଁ ମଝିରେ ଆଉ 2 ଦିନ ରହିଛି । ମହାରାଷ୍ଟ୍ର କ୍ରିକେଟ ଷ୍ଟାଡିୟମରେ ଏହି ମ୍ୟାଚ ଖେଳାଯିବ । ଦୁଇ ଦିନ ଦଳ ଜୋରଦାର ଅଭ୍ୟାସ କରିବ । ପାକିସ୍ତାନକୁ ହରାଇ ଦୃଢ ମନୋବଳରେ ଥିବା ଭାରତ ବାଂଲାଦେଶକୁ ହରାଇ ଚତୁର୍ଥ ବିଜୟ ଲକ୍ଷ୍ୟରେ ରହିଛି ।