ହାଇଦ୍ରାବାଦ: ଭାରତରେ ଗତ କିଛି ବର୍ଷ ମଧ୍ୟରେ ମଧୁମେହ(ଡାଇବେଟିସ) ରୋଗୀଙ୍କ ସଂଖ୍ୟା ବହୁତ ବୃଦ୍ଧି ପାଇଛି । ଡାଇବେଟିସ୍ ରୋଗ ହେଉଛି ଏକ ମେଟାବୋଲିକ୍ ଡିସଅର୍ଡର । ଯାହା ଶରୀରରେ ଯଥେଷ୍ଟ ଇନସୁଲିନ୍ ତିଆରି କରିପାରେ ନାହିଁ କିମ୍ବା ଏହାକୁ ସଠିକ୍ ଭାବରେ ବ୍ୟବହାର କରିବାରେ ଅସୁବିଧା ହୁଏ । ଫଳସ୍ୱରୂପ ଶରୀରରେ ଇନସୁଲିନ୍ ଅଭାବ ହେତୁ ସୁଗାର ସ୍ତର ବଢିବାରେ ଲାଗେ, ଯାହା କିଡନୀ, ଚର୍ମ, ହାର୍ଟ, ଆଖି ଏବଂ ପୁରା ସ୍ୱାସ୍ଥ୍ୟ ଉପରେ ପ୍ରଭାବ ପକାଇଥାଏ ।
ମଧୁମେହ ରୋଗ ଯେକୌଣସି ବୟସରେ ହୋଇପାରେ । ଶିଶୁ, କିଶୋର ଏବଂ ଯୁବା ବୟସ୍କମାନେ ଟାଇପ୍ 1 ଡାଇବେଟିସ୍ ଦ୍ୱାରା ଅଧିକ ପ୍ରଭାବିତ ହେଉଥିବା ବେଳେ 40 ବର୍ଷ ବୟସ ପରେ ବୟସ୍କମାନଙ୍କ ଠାରେ ଟାଇପ୍ 2 ଡାଇବେଟିସ୍ ଅଧିକ ଦେଖାଯାଏ । ଶରୀରରେ ରକ୍ତରେ ଶର୍କରା ବଢିଥାଏ ଏବଂ କମିଥାଏ । କିନ୍ତୁ ଏହା ଆମେ ଅନୁଭବ କରିପାରୁନାହୁଁ । ଫଳରେ ଡାଇବେଟିସର ଶିକାର ହୋଇଥାଉ । ଏହି ରୋଗ କିଡନୀ ଏବଂ ହୃଦରୋଗର ମଧ୍ୟ କାରଣ ହୋଇଥାଏ ।
ମଧୁମେହ ହେବାର ଆଶଙ୍କା ଥିବା ଲକ୍ଷ୍ମଣଗୁଡ଼ିକୁ ଚିହ୍ନି ଏହାକୁ ରୋକା ଯାଇପାରିବ । ବେଳେବେଳେ ଏହି ଲକ୍ଷଣଗୁଡିକ ଏତେ ସୂକ୍ଷ୍ମ ଯେ ସେମାନଙ୍କୁ ଚିହ୍ନିବା କଷ୍ଟକର ହୋଇଥାଏ । ଆମ ମଧ୍ୟରୁ ଅନେକ ଲୋକ ଏହା ମଧ୍ୟ ଜାଣନ୍ତି ନାହିଁ ଯେ ଆମ ଶରୀର ସକାଳେ ଅନେକ ସଙ୍କେତ ଦେଇଥାଏ, ଯାହା ରକ୍ତରେ ବ୍ଲକ ସୁଗାର ସହ ଜଡିତ । ଆସନ୍ତୁ ଜାଣିବା, ସକାଳେ ଦେଖାଯାଉଥିବା ମଧୁମେହର ଏହି ଲକ୍ଷଣଗୁଡ଼ିକ କ’ଣ
1. ପାଟି ଏବଂ ଗଳା ଶୁଖିବା
ଯଦି ସକାଳୁ ଉଠିବା ପରେ ତୁରନ୍ତ ଶୋଷ ଲାଗେ, ତେବେ ଏହା ମଧୁମେହର ଲକ୍ଷଣ ହୋଇପାରେ । ଯଦି ପ୍ରତିଦିନ ଶୋଷ ଲାଗେ ଏବଂ ପାଣି ପିଇବାର ଇଚ୍ଛା ଥାଏ, ତେବେ ତୁମ ସୁଗାର ସ୍ତରକୁ ଯାଞ୍ଚ କରିବାକୁ ପଡିବ । ଶୁଖିଲା ପାଟି କିମ୍ବା ଗଳା ମଧୁମେହ ରୋଗର ପ୍ରାରମ୍ଭିକ ଲକ୍ଷଣ ହୋଇପାରେ ।
2. ଥକ୍କାପଣ
ସକାଳେ ଉଠିବା ପରେ ଆମକୁ ସତେଜ ଅନୁଭବ କରିବା ଉଚିତ୍ । କିନ୍ତୁ ଯଦି ସବୁବେଳେ କ୍ଳାନ୍ତ ଅନୁଭବ କରନ୍ତି, ତେବେ ଏହା ମଧୁମେହର ଲକ୍ଷଣ ହୋଇପାରେ । ଥକ୍କାପଣ, ନିଦ୍ରାହୀନତା ଏବଂ ଦୁର୍ବଳ ଅନୁଭବ କରିବା ମଧୁମେହର ଲକ୍ଷଣ ହୋଇପାରେ । ତେଣୁ ଏସବୁକୁ ଆଦୌ ଅବହେଳା କରିବା ଉଚିତ ନୁହେଁ ।
ଏହା ମଧ୍ୟ ପଢନ୍ତୁ: ମଧୁମେହ ରୋଗୀଙ୍କ ଆଖି ସମସ୍ୟା କରାଇପାରେ ଡାଇବେଟିକ୍ ରେଟିନୋପାଥୀ
3. ଅସ୍ପଷ୍ଟ ଦେଖାଯିବା
ମଧୁମେହ ଆଖି ଉପରେ ନକାରାତ୍ମକ ପ୍ରଭାବ ପକାଇଥାଏ । ଏପରି ପରିସ୍ଥିତିରେ ଯଦି ସକାଳେ ସ୍ପଷ୍ଟ ଦେଖିବାରେ ଅସୁବିଧା ଅନୁଭବ କରନ୍ତି, ତେବେ ଏହା ଉଚ୍ଚ ରକ୍ତ ଶର୍କରାର ସଙ୍କେତ ହୋଇପାରେ । ଡାକ୍ତରମାନେ କହିଛନ୍ତି ଯେ, ମଧୁମେହ ଲେନ୍ସର ଆକାରକୁ ବଢାଇପାରେ, ଯଦ୍ୱାରା ସ୍ପଷ୍ଟ ଦେଖିହୁଏ ନାହିଁ । ଏହି ଲକ୍ଷଣଗୁଡିକ ଦେଖାଯିବା ମାତ୍ରେ ଏହାକୁ ଅଣଦେଖା ନ କରି ତୁରନ୍ତ ରକ୍ତରେ ଶର୍କରା ଯାଞ୍ଚ କରିବା ଉଚିତ୍ ।
4. କୁଣ୍ଡେଇ ହେବା
ଶରୀରରେ କୁଣ୍ଡେଇ ହେବା ମଧ୍ୟ ମଧୁମେହର ଅନ୍ୟତମ ଲକ୍ଷଣ ହୋଇପାରେ । ଯଦି ସକାଳୁ ଉଠିବା ପରେ ଶରୀରରେ କୁଣ୍ଡିଆ ଅନୁଭବ କରନ୍ତି, ତେବେ ଏହାକୁ ଅଣଦେଖା କରନ୍ତୁ ନାହିଁ । ମଧୁମେହ ରୋଗ ହେଲେ ସକାଳେ ଉଠିବା ପରେ ଚର୍ମ, ପାଟି, ଯୌନାଙ୍ଗରେ କୁଣ୍ଡେଇ ହୋଇପାରେ ।
5. ଝିମଝିମ ଲାଗିବା
ଯଦି ସକାଳେ ଉଠିବା ପରେ ଶରୀରରେ ଝିମଝିମ ଅନୁଭବ ହୁଏ, ତେବେ ଏହାକୁ ମଧୁମେହର ଲକ୍ଷଣ ଭାବରେ ମଧ୍ୟ ବିବେଚନା କରାଯାଇପାରେ । ବାସ୍ତବରେ, ରକ୍ତରେ ସୁଗାର ସ୍ତର ବୃଦ୍ଧି ଦ୍ୱାରା ସ୍ନାୟୁ ସିଷ୍ଟମ ପ୍ରଭାବିତ ହୁଏ । ଫଳରେ ଶରୀରର କିଛି ଅଙ୍ଗରେ ଝିମଝିମ ଅନୁଭବ ହୁଏ । ଏପରି ସ୍ଥିତିରେ ମଧୁମେହ ରୋଗୀମାନେ ସକାଳେ ହାତ କିମ୍ବା ପାଦରେ ଝିମଝିମ ଅନୁଭବ କରିପାରନ୍ତି । ଏହାକୁ ଡାଇବେଟିସ୍ ନ୍ୟୁରୋପାଥି କୁହାଯାଏ ।
