ହାଇଦ୍ରାବାଦ: ନିକଟରେ ହୃଦ୍ଘାତର ଶିକାର ହୋଇଥିଲେ ଦେଶର ପ୍ରଥମ ବ୍ରହ୍ମାଣ୍ଡ ସୁନ୍ଦରୀ ତଥା ବଲିଉଡ୍ ଅଭିନେତ୍ରୀ ସୁସ୍ମିତା ସେନ । ଗୁରୁବାର(ମାର୍ଚ୍ଚ 2)ରେ ଏନେଇ ସୋସିଆଲ ମିଡିଆରେ ଏକ ପୋଷ୍ଟ୍ କରି ଜଣାଇଥିଲେ ସୁସ୍ମିତା । ହୃଦୟ ଆମ ପାଇଁ କେତେ ଗୁରୁତ୍ବପୂର୍ଣ୍ଣ ଏବଂ ତା'ର ଯତ୍ନ ନେବାର ଆବଶ୍ୟକତା ରହିଛି ଇତ୍ୟାଦି ବୁଝାଇ ସେ ଏକ ଭାବପୂର୍ଣ୍ଣ ପୋଷ୍ଟ କରିଥିଲେ । ତାଙ୍କର ଆଞ୍ଜିଓପ୍ଲାଷ୍ଟି ଚାଲିଥିବାର ମଧ୍ୟ ସେ ଉଲ୍ଲେଖ କରିଥିଲେ ।
ପିତାଙ୍କ ସହ ଏକ ଫଟୋ ସେୟାର କରି ସେ ଲେଖିଥିଲେ ଯେ, 'ମୋର କିଛି ଦିନ ପୂର୍ବରୁ ହୃଦଘାତ ଆସିଥିଲା, ଆଞ୍ଜିଓପ୍ଲାଷ୍ଟି କରାଯାଇଛି । ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ମୋର ହୃଦ୍ରୋଗ ବିଶେଷଜ୍ଞ କହିଛନ୍ତି ଯେ, ମୋ ହୃଦୟ ବିଶାଳ ।' ତେବେ ସ୍ବାସ୍ଥ୍ୟକୁ ନେଇ ସୁସ୍ମିତାଙ୍କର ଏହା ପ୍ରଥମ ପୋଷ୍ଟ୍ ନୁହେଁ । ସେ ଏହା ପୂର୍ବରୁ ମଧ୍ୟ 2020ରେ ଏକ ପୋଷ୍ଟ୍ କରିଥିଲେ, ଯେଉଁଥିରେ ତାଙ୍କର ଆଡିସନ୍ ରୋଗ ଥିବା କହିଥିଲେ । 2014ରେ ତାଙ୍କର ଏହି ରୋଗ ଦେଖାଦେଇଥିଲା । ତେବେ ଏହି ଆଡିସନ୍ ରୋଗ କଣ, ଏହା ହୃଦ୍ଘାତର କାରଣ ସାଜେ କି, ଯାହା ପରବର୍ତ୍ତୀ ସମୟରେ ସୁସ୍ମିତାଙ୍କ କ୍ଷେତ୍ରରେ ଦେଖାଦେଇଛି, ଜାଣନ୍ତୁ ରୋଗ ବାବଦରେ ସମ୍ପୂର୍ଣ୍ଣ ବିବରଣୀ ।
ଆଡିସନ୍ ରୋଗ କ'ଣ ?
ଆଡିସନ୍ ରୋଗ ଏକ ଅଟୋଇମ୍ୟୁୋନ ରୋଗ । ଏହାକୁ ମଧ୍ୟ ଆଡ୍ରେନାଲ୍ ଇନ୍ସଫିସିଏନ୍ସି କୁହାଯାଏ । ଏହି ରୋଗ ଅତ୍ୟନ୍ତ ଗମ୍ଭୀର ଏବଂ ବିପଜ୍ଜନକ । ଡାକ୍ତରଙ୍କ କହିବା ଅନୁସାରେ, ଏହି ରୋଗ ସାଧାରଣତଃ ମହିଳାମାନଙ୍କଠାରେ ଦେଖାଯାଏ ଏବଂ ରୋଗ ପ୍ରତିରୋଧକ ଶକ୍ତି ଦୁର୍ବଳ ହେଲେ ଏହି ରୋଗ ଲକ୍ଷଣ ଦେଖାଯାଏ । ଏହାର ସ୍ୱାସ୍ଥ୍ୟ ଉପରେ ଅଧିକ ପ୍ରଭାବ ପଡିଥାଏ । ଆଡିସନ୍ ରୋଗରେ, ଆଡ୍ରେନାଲ୍ ଗ୍ରନ୍ଥିଗୁଡିକ କମ୍ କର୍ଟିସୋଲ୍ ତିଆରି କରନ୍ତି ।
ଏହା ମଧ୍ୟ ପଢନ୍ତୁ:- ହୃଦଘାତର ଶିକାର ହୋଇଥିଲେ ମିସ୍ ୟୁନିଭର୍ସ ସୁସ୍ମିତା, ସୋସିଆଲ ମିଡିଆରେ ଦେଲେ ସୂଚନା
ଆଡିସନ୍ ରୋଗ ଏବଂ ହୃଦଘାତ ମଧ୍ୟରେ ଏକ ସଂଯୋଗ ଅଛି କି ?
ଶରୀରରେ କ୍ରନିକ୍ କର୍ଟିସୋଲ୍ ଅଭାବ ହେତୁ ଆଡିସନ୍ ରୋଗୀମାନେ ହୃଦ୍ରୋଗରେ ଆକ୍ରାନ୍ତ ହୁଅନ୍ତି । କର୍ଟିସୋଲ ହେଉଛି ଏକ ହରମୋନ୍, ଯାହା ପ୍ରତିରକ୍ଷା ପ୍ରଣାଳୀର ସ୍ତର ଏବଂ ପ୍ରଦାହକୁ ନିୟନ୍ତ୍ରଣ କରିଥାଏ । ଏହାର ଅଭାବ ଏହି ପ୍ରଣାଳୀରେ ଅସନ୍ତୁଳନ ସୃଷ୍ଟି କରିପାରେ, ଯାହା ଉଚ୍ଚ ରକ୍ତଚାପ, ଉଚ୍ଚ କୋଲେଷ୍ଟ୍ରଲ ଏବଂ ଆଥେରୋସ୍କ୍ଲେରୋସିସ୍ ହୋଇପାରେ । ଏହିସବୁ ରୋଗ ହୃଦରୋଗ ପାଇଁ ବିପଦ ସଙ୍କେତ । ଆଡିସନ୍ ରୋଗରେ ଆକ୍ରାନ୍ତ ବ୍ୟକ୍ତିଙ୍କୁ ସଠିକ୍ ହରମୋନ୍ ରିପ୍ଲେସମେଣ୍ଟ ଥେରାପି କରିବାକୁ ପଡିଥାଏ । ନିୟମିତ ଯାଞ୍ଚ ଏବଂ ସଠିକ୍ ଜୀବନଶୈଳୀ ହୃଦୟ ସ୍ୱାସ୍ଥ୍ୟ ଉପରେ ସୁପ୍ରଭାବ ପକାଇବାରେ ଗୁରୁତ୍ବପୂର୍ଣ୍ଣ ଭୂମିକା ଗ୍ରହଣ କରିପାରିବ ।
ଏହି ଲକ୍ଷଣଗୁଡ଼ିକୁ ଅଣଦେଖା କରନ୍ତୁ ନାହିଁ
ଆଡିସନ୍ ରୋଗ ଭାରତରେ ପ୍ରାୟ 10,000 ରୁ 20,000 ଲୋକଙ୍କୁ ପ୍ରଭାବିତ କରିଥାଏ, ସେମାନଙ୍କ ମଧ୍ୟରୁ ଅଧିକାଂଶ ମହିଳା ଥାଆନ୍ତି । ରୋଗର ଲକ୍ଷଣ ତୁରନ୍ତ ଚିହ୍ନଟ କରିବାର ଆବଶ୍ୟକତା ରହିଛି, ନଚେତ୍ ଏହା ପରବର୍ତ୍ତୀ ସମୟରେ ଗମ୍ଭୀର ସମସ୍ୟା ସୃଷ୍ଟି କରିପାରେ । ଏହି ରୋଗ ହେଲେ ରୋଗୀଙ୍କ କ୍ଷେତ୍ରରେ ପ୍ରାୟତଃ ଥକା, ମାଂସପେଶୀ ଦୁର୍ବଳତା, ଓଜନ ହ୍ରାସ ଭଳି ସମସ୍ୟା ଦେଖାଯାଏ । ଆହୁରି ମଧ୍ୟ, ରୋଗୀଙ୍କ ଚର୍ମର ରଙ୍ଗ କଳା ପଡି ଯାଇପାରେ । କେତେକ ରୋଗୀ ପେଟରେ ଯନ୍ତ୍ରଣା, ବାନ୍ତି, ଝାଡ଼ା ଏବଂ ଲୁଣିଆ ଖାଦ୍ୟ ଖାଇବାକୁ ଇଚ୍ଛା କରିଥାନ୍ତି । ଆଡିସନ୍ ରୋଗରେ ଆକ୍ରାନ୍ତ ବ୍ୟକ୍ତିମାନଙ୍କର ମନୋବଳ ପରିବର୍ତ୍ତନ ସାଙ୍ଗକୁ ମାନସିକ ଚିନ୍ତା ମଧ୍ୟ କରିପାରନ୍ତି ।
Disclaimer: ଉପରିସ୍ଥ ସମସ୍ତ ବିବରଣୀ କେବଳ ସାଧାରଣ ସୂଚନା ଉପରେ ଆଧାରିତ । କୌଣସି ସ୍ବାସ୍ଥ୍ୟ ସମସ୍ୟା ପାଇଁ ଡାକ୍ତରଙ୍କ ପରାମର୍ଶ ଅତ୍ୟନ୍ତ ଆବଶ୍ୟକ ।
