ହାଇଦ୍ରାବାଦ: ଅନେକ କାରଣ ଯୋଗୁଁ ଶୋଇବା ସମୟରେ ଘୁଙ୍ଗୁଡି ହୋଇଥାଏ । ତେବେ ଛୋଟ ଛୁଆ ଏବଂ ଯୁବପିଢ଼ିଙ୍କ ମଧ୍ୟରେ ଏହି ସମସ୍ୟା ବୃଦ୍ଧି ପାଇବାରେ ଲାଗିଛି । ତେବେ ଏନେଇ ହାଇଦ୍ରାବାଦର ଜଣାଶୁଣା ହସ୍ପିଟାଲ ପକ୍ଷରୁ ଏହି ରିସର୍ଚ୍ଚ କରାଯାଇଥିଲା । ଡାକ୍ତରମାନଙ୍କ କହିବା ଅନୁସାରେ, ପ୍ରତିବର୍ଷ ଘୁଙ୍ଗୁଡ଼ି ସମସ୍ୟା ନେଇ 360ରୁ 450 ଜଣ ବ୍ୟକ୍ତି ହସ୍ପିଟାଲକୁ ଆସି ଥାଆନ୍ତି । ପ୍ରତି 100 ଜଣଙ୍କ ମଧ୍ୟରେ 30ରୁ 40 ଜଣଙ୍କ ମଧ୍ୟରେ ଏହି ସମସ୍ୟା ରହିଥାଏ ବୋଲି ଡାକ୍ତରମାନେ କହିଛନ୍ତି । ତେବେ ସେଥିମଧ୍ୟରୁ 20 ପ୍ରତିଶତଙ୍କର ସ୍ଲିପ୍ ଆପ୍ନିଆ ସମସ୍ୟା ରହିଥାଏ । ବାୟୁପଥ ଅବରୋଧ ହେବା ସହିତ ନିଶ୍ବାସ ନେବାରେ ମଧ୍ୟ କଷ୍ଟ ହୋଇଥାଏ । ଫୁସ୍ଫୁସ୍ରେ ଅମ୍ଳଜାନର ଅଭାବ ଦେଖାଯାଇଥାଏ । ଫଳରେ ରକ୍ତରେ ଅମ୍ଳଜାନ କମି ଯାଇଥାଏ । ତେବେ ସ୍ବାସ୍ଥ୍ୟ ବିଶେଷଜ୍ଞଙ୍କ କହିବା ଅନୁସାରେ, ସ୍ଲିପ୍ ଆପ୍ନିଆ ସମସ୍ୟା ଦୀର୍ଘଦିନ ପର୍ଯ୍ୟନ୍ତ ରହିଲେ ଅନେକ ପ୍ରକାର ସ୍ବାସ୍ଥ୍ୟ ସମସ୍ୟା ଦେଖାଯାଇପାରେ ବୋଲି କୁହାଯାଇଛି ।
ତେବେ କଣ ଏହି ସ୍ଲିପ୍ ଆପ୍ନିଆ: ସ୍ଲିପ୍ ଆପ୍ନିଆ ହେଉଛି ଏକ ନିଦ ସମ୍ବନ୍ଧୀୟ ରୋଗ । ଏଥିରେ ଆକ୍ରାନ୍ତ ହେବା ଫଳରେ ଜଣେ ବ୍ୟକ୍ତି ଶୋଇବା ସମୟରେ ନିଶ୍ବାସ ହଠାତ ବନ୍ଦ ହୋଇଥାଇଥାଏ ବା କିଛି ସମୟ ପାଇଁ ଅଟକି ଯାଇଥାଏ । ତେବେ କିଛି ସମୟ ପରେ ପୁଣି ଥରେ ଠିକ ହୋଇଯାଇଥାଏ । ସ୍ଲିପ୍ ଆପ୍ନିଆ 2 ପ୍ରକାର ହୋଇଥାଏ । ଗୋଟିଏ ହେଉଛି ଅବଷ୍ଟ୍ରାକ୍ଟିଭହ ସ୍ଲିଭ୍ ଆପ୍ନିଆ । ଯେତେବେଳେ ଗଳାର ମାଂସପେଶୀ ବଢ଼ିଯାଇଥାଏ ଏବଂ ଫୁସ୍ଫୁସ୍ରେ ଏୟାର ସର୍କୁଲେସନ୍ ଠିକ ହୋଇନଥାଏ, ସେତେବେଳେ ଏହି ସମସ୍ୟା ହୋଇଥାଏ । ଦ୍ୱିତୀୟଟି ହେଉଛି ସେଣ୍ଟ୍ରାଲ୍ ସ୍ଲିପ ଆପ୍ନିଆ । ଯାହା ମସ୍ତିଷ୍କ ଶ୍ୱାସକ୍ରିୟାକୁ ନିୟନ୍ତ୍ରଣ କରୁଥିବା ମାଂସପେଶୀକୁ ସଠିକ୍ ଭାବରେ ସଙ୍କେତ ଦେଇନଥାଏ । ଏହି ଦୁଇଟି ଅବସ୍ଥାରେ ଶୋଇବା ସମୟରେ ପ୍ରାୟ 10 ସେକେଣ୍ଡ୍ କିମ୍ବା ଅଧିକ ସମୟ ପାଇଁ ନିଶ୍ୱାସ ବନ୍ଦ ହୋଇଯାଇଥାଏ ।
ଖରାପ ଜୀବନଶୈଳୀ ଯୋଗୁଁ ଅନେକ ମେଦବହୁଳତାର ଶିକାର ହୋଇଥାଆନ୍ତି । ଫଳରେ ଘୁଙ୍ଗୁଡି ସମସ୍ୟା ଦେଖାଯାଇଥାଏ । ଏହି କାରଣ ଯୋଗୁଁ ମଧ୍ୟ ସ୍ଲିପ୍ ଆପ୍ନିଆ ମଧ୍ୟ ହୋଇଥାଏ । ଅନେକ କ୍ଷେତ୍ରରେ ଧୂମ୍ରପାନ ଏବଂ ଆଲକହଲ ସେବନ ମଧ୍ୟ ଏହାର ଏକ କାରଣ ବୋଲି କୁହାଯାଇଛି । ଚେହେରା, ବେକ ଏବଂ ଛାତିରେ ଅଧିକ ପରିମାଣରେ ଚର୍ବି ଜମା ହେବା କାରଣରୁ ବାୟୁପଥ ପ୍ରଭାବିତ ହୋଇଥାଏ। କେତେକ କ୍ଷେତ୍ରରେ ଟନିସିଲ ମଧ୍ୟ ବୃଦ୍ଧି ପାଇଥାଏ।
ଏହା ମଧ୍ୟ ପଢନ୍ତୁ: Snoring Problem: କାହିଁକି ହୁଏ ଘୁଙ୍ଗୁଡି ସମସ୍ୟା, ଜାଣନ୍ତୁ କାରଣ
ଛୋଟ ଛୁଆଙ୍କ କ୍ଷେତ୍ରରେ ଟନସିଲ ଏବଂ ଆଡେନୋଏଡ୍ସ ବୃଦ୍ଧି ଯୋଗୁଁ ଘୁଙ୍ଗୁଡି ଏବଂ ସ୍ଲିପ ଆପ୍ନିଆ ସମସ୍ୟା ବୃଦ୍ଧି ପାଇଥାଏ। ଫଳରେ ଛୁଆଙ୍କୁ ନିଶ୍ବାସ ନେବାରେ ସମସ୍ୟା ହୋଇଥାଏ । ତେବେ ଛୋଟ ଛୁଆଙ୍କ କ୍ଷେତ୍ରରେ ଏଭଳି ସମସ୍ୟା ହେଲେ ଏହାକୁ ଅଣଦେଖା କରିବା ଉଚିତ ନୁହେଁ ବୋଲି କଣ୍ଟିନେଣ୍ଟାଲ ହସ୍ପିଟାଲର ପ୍ଲୁମୋନୋଲୋଜିଷ୍ଟ ଡାକ୍ତର ଏନ ନଳୀନି କହିଛନ୍ତି । ତାଙ୍କର କହିବା ଅନୁସାରେ, "ଜୀବନଶୈଳୀରେ ପରିବର୍ତ୍ତନ ଯୋଗୁଁ ଏହି ସମସ୍ୟା କିଛି ମାତ୍ରାରେ କମ୍ ହୋଇପାରେ । ତେବେ ସ୍ଲିପ୍ ଆପ୍ନିଆରେ ପୀଡ଼ିତ ଥିଲେ ମଧ୍ୟ ପରୀକ୍ଷଣ ଦ୍ବାରା ଏହି ସମସ୍ୟାରୁ ମୁକ୍ତି ପାଇପାରିବେ । ଓଜନ ହ୍ରାସ କରିବା, ପୋଜିସନାଲ ଥେରାପୀ ମଧ୍ୟ ସମସ୍ୟାରୁ ମୁକ୍ତି ପାଇବାର ଏକ ଉପାୟ ଅଟେ । ତେବେ ଗମ୍ଭୀର ସ୍ଥିତିରେ ସିପାପ୍ ଏବଂ ବିପାପ୍ ଡିଭାଇରସର ଆବଶ୍ୟକତା ରହିଥାଏ ।"
ବ୍ୟୁରୋ ରିପୋର୍ଟ, ଇଟିଭି ଭାରତ
