ସମ୍ବଲପୁର: ଫେଲ ମାରିଛି ଜିଲ୍ଲାର ଗ୍ରୀନ ମହାନଦୀ କ୍ୟାମ୍ପେନ । ମହାନଦୀ କୂଳର ସୁରକ୍ଷା ଓ ସୌନ୍ଦର୍ଯ୍ୟକରଣ ପାଇଁ ଗତ ବର୍ଷ ନଦୀ କୂଳରେ 1 ଲକ୍ଷ 50 ହଜାର ଗଛ ଲଗାଯାଇଥିଲା । ଜିଲ୍ଲାର ରେଙ୍ଗାଳୀର ସପନେଇ ସେତୁ ରୁ ଧମା ପର୍ଯ୍ୟନ୍ତ 1 କିମି ଦୂରତା ଭିତରେ ଉଭୟ ପାର୍ଶ୍ଵରେ ଏହି ଗଛ ସବୁ ଲଗାଯାଇଥିଲା । ଆଉ ଏହି ଅଭିଯାନରେ ବହୁ ସ୍ବେଚ୍ଛାସେବୀ ଅନୁଷ୍ଠାନ ସାମିଲ ହୋଇଥିଲେ । ତେବେ ବର୍ଷେ ନ ପୂରୁଣୁ ରିଂ ରୋଡ଼ରେ ଲଗାଯାଇଥିବା ଅଧିକାଂଶ ଗଛ ନଷ୍ଟ ହୋଇଥିବା ଦେଖିବାକୁ ମିଳିଛି । ଏଥିପାଇଁ ସାଧାରଣ ଲୋକ ମାନଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି ।
ଏପଟେ ସମ୍ବଲପୁର ଡିଏଫଓ ଏହା ସ୍ୱୀକାର କରିଛନ୍ତି ଯେ, ଲଗାଯାଇଥିବା ଚାରା ମଧ୍ୟରୁ 25 ପ୍ରତିଶତ ଗଛ ନଷ୍ଟ ହୋଇଛି । ତେବେ ଗ୍ରାମଞ୍ଚଳରେ ଅଧିକ ଗଛ ବଞ୍ଚିଥିବା ବେଳେ ରିଂ ରୋଡ଼ ରେ ଅଧିକ ଚାରା ଗାଈଗୋରୁଙ୍କ ଦ୍ୱାରା ନଷ୍ଟ ହୋଇଛି। ହେଲେ ଚଳିତ ବର୍ଷ ନଷ୍ଟ ହୋଇଥିବା ଚାରା ବଦଳରେ ନୂଆ ଗଛ ଲଗାଯିବ ବୋଲି ଡିଏଫଓ କହିଛନ୍ତି।
ଗ୍ରୀନ ମହାନଦୀ ଅଭିଯାନକୁ ସ୍ଥାନୀୟ ଲୋକେ ସମର୍ଥନ କରିଛନ୍ତି । ତେବେ ଏହା କେବଳ ପ୍ରଚାର ପ୍ରସାରରେ ସୀମିତ ନରହି ବାସ୍ତବିକ ରୂପ ନେଉ ବୋଲି ଲୋକେ କହିଛନ୍ତି ।
ସମ୍ବଲପୁରରୁ ବାଦଶାହା ଜୁସ୍ମନ ରଣା, ଇଟିଭି ଭାରତ
