ସୁନ୍ଦରଗଡ: କୋଇଡା ଥାନା ଅନ୍ତର୍ଗତ ମାଲଦା ପଞ୍ଚାୟତର କାହ୍ନୁସାହିରେ ଘଟିଛି ଏହି ଦୁର୍ଘଟଣା । ଟ୍ରାକ୍ଟର ଚକା ତଳେ ଚାପି ହୋଇ ଡ୍ରାଇଭରର ମୃତ୍ୟୁ ହୋଇଥିବା ଜଣା ପଡଛି । ମୃତ ଟ୍ରାକ୍ଟର ଡ୍ରାଇଭରଙ୍କ ନାଁ ରାଜେନ୍ଦ୍ର ବେହେରା ବୋଲି ଜଣା ପଡିଛି ।
ରାଜେନ୍ଦ୍ରଙ୍କ ଟ୍ରାକ୍ଟରରେ ହେଲପର ଭାବେ କାମ କରୁଥିବା ବ୍ୟକ୍ତିଙ୍କୁ ଟ୍ରାକ୍ଟର ଚଳାଇବାକୁ ଦେଇ ରାଜେନ୍ଦ୍ର ରାଜେନ୍ଦ୍ର ପାଖ ସିଟରେ ବସିଥିଲେ । ତେବେ କାହ୍ନୁସାହି ସ୍କୁଲ ସମ୍ମୁଖ ଥିବା ଏକ ହମ୍ପସ ପାର କରୁଥିବା ବେଳେ ଟ୍ରାକ୍ଟରଟି ନିୟନ୍ତ୍ରଣ ହରାଇ ଓଲଟି ପଡିଥିଲା । ସେହି ସ୍ଥାନରେ ରାଜେନ୍ଦ୍ର ଟ୍ରାକ୍ଟର ତଳକୁ ଛିଟିକି ପଡିଥିଲା ଓ ଟ୍ରାକ୍ଟର ଚକା ଚାପି ହୋଇଯାଇଥିଲା ବୋଲି କୋଇଡା ପୋଲିସ କହିଛି ।
ପରେ ତାଙ୍କୁ ଟ୍ରାକକ୍ଟର ତଳୁ ଉଦ୍ଧାର କରାଯାଇଥିଲେ ସୁଦ୍ଧା ତାଙ୍କର ମୃତ୍ୟୁ ହୋଇଯାଇଥିବା ଜଣା ପଡିଥିଲା । ଦୁର୍ଘଟଣା ଘଟିବା ପରେ ଗାଡି ଚଳାଉଥିବା ହେଲପର ଘଟଣାସ୍ଥଳରୁ ଫେରାର ହୋଇଯାଇଛି । କୋଇଡା ପୋଲିସ ଘଟଣା ସ୍ଥଳରେ ପହଞ୍ଚି ମୃତଦେହ ସହ ଟ୍ରାକ୍ଟରକୁ ଜବତ କରି ତଦନ୍ତ ଚଳାଇଛି ।
ସୁନ୍ଦରଗଡରୁ ହରିହର ଦାସ ମହାପାତ୍ର, ଇଟିଭି ଭାରତ
