ସୁନ୍ଦରଗଡ: ଜିଲ୍ଲାର ତିନୋଟି ପୌରପାଳିକାର ପୌରପରିଷଦ ନିର୍ବାଚନର ଫଳାଫଳ ପ୍ରକାଶ ପାଇଛି । ଜିଲ୍ଲାର ରାଜଗାଙ୍ଗପୁର ଓ ବୀରମିତ୍ରପୁର ପୌରପାଳିକାର ଚେୟାରମ୍ୟାନ ଆସନରେ ବିଜେଡି ବାଜି ମାରିଥିବା ବେଳେ ସୁନ୍ଦରଗଡ ଆସନ ବିଜେପି ଅକ୍ତିଆର କରିଛି । ସୁନ୍ଦରଗଡ ଜିଲ୍ଲାର ଏହି ତିନୋଟି ପୌରପରିଷଦ ନିର୍ବାଚନ ଫଳାଫଳ କଡା ସୁରକ୍ଷା ମଧ୍ୟରେ ଘୋଷଣା କରାଯାଇଛି । ଜିଲ୍ଲା ପ୍ରଶାସନ ଓ ଜିଲ୍ଲା ପୋଲିସ ଶାନ୍ତି ଶୃଙ୍ଖଳା ପାଇଁ ବ୍ୟାପକ ପୋଲିସ ମୂତୟନ କରି ଏହି ଗଣନାକୁ ଶେଷ କରିଛି । ଏହି ସମସ୍ତ ପୌରପରିଷଦର ଅଧ୍ୟକ୍ଷ କିଏ ହେବ ସେ ନେଇ ଲୋକଙ୍କ ମନରେ ଥିବା କଳ୍ପନା ଜଳ୍ପନାର ଆଜି ଅନ୍ତ ହୋଇଛି । ଜନତା ଜନାର୍ଦ୍ଦନଙ୍କ ମତଦାନର ଫଳାଫଳ ଆଜି ଘୋଷିତ ହୋଇଛି ।
ରାଜଗାଙ୍ଗପୁର ମ୍ୟୁନିସିପାଲିଟିର ପୌରାଧ୍ୟକ୍ଷ ପଦରେ ବିଜୁ ଜନତା ଦଳର ମାଧୁରୀ ଲୁଗୁନ 10919 ଖଣ୍ଡ ଭୋଟ ପାଇ ବିଜୟୀ ହୋଇଛନ୍ତି । ଭାରତୀୟ ଜନତା ପାର୍ଟିର କୁଲଦୀପ ସିଂ 7417 ଖଣ୍ଡ ଭୋଟ ପାଇଛନ୍ତି । ସେହିପରି ରାଜଗାଙ୍ଗପୁର ପୌରପରିଷଦର 20 କାଉନସିଲର(ୱାର୍ଡ)ରୁ ବିଜେଡି- 12ଟି ଆସନରେ ବିଜୟୀ ହୋଇଥିବା ବେଳେ କଂଗ୍ରେସ 4ଟି ଆସନ ଅକ୍ତିଆର କରିଛି, ବିଜେପି – 3 ଟି ଓ ସ୍ବାଧୀନ ଗୋଟିଏ ଆସନ ପାଇଛନ୍ତି । ବୀରମିତ୍ରପୁର ପୌରପରିଷଦ ଅଧ୍ୟକ୍ଷ ଭାବେ ମତଦାତା ବିଜେଡିର ସନ୍ଦୀପ ମିଶ୍ରଙ୍କୁ ବିଜୟୀ କରାଇଛନ୍ତି , ସନ୍ଦୀପ ମିଶ୍ର 7044 ଖଣ୍ଡ ଭୋଟ ପାଇ ବିଜୟୀ ହୋଇଥିବା ବେଳେ ତାଙ୍କ ନିକଟତମ ପ୍ରତିଦ୍ବନ୍ଦୀ ଭାବେ ବିଜେପିର ସୁନୀଲ ତିୱାରୀ 4072 ଭୋଟ ପାଇଛନ୍ତି । ତେବେ ବୀରମିତ୍ରପୁର ମ୍ୟୁନସିପାଲିଟିର 11ଟି ୱାର୍ଡରୁ ବିଜୁ ଜନତା ଦଳ 9ଟିରେ ବିଜୟୀ ହୋଇଛି ଓ ବିଜେପି ଓ କଂଗ୍ରେସ ଖାତାକୁ ଗୋଟିଏ ଲେଖାଏଁ ଆସନ ଯାଇଛି ।
