ସୁନ୍ଦରଗଡ଼: ରବିବାର ବାଲିଶଙ୍କରା ବ୍ଲକ ଇବ ନଦୀର ଘୋଗର ପିକନିକ୍ ସ୍ପଟରେ ଘଟିଥିଲା ଏକ ଲୋମଟାଙ୍କୁରା ଘଟଣା । ସୁନ୍ଦରଗଡ ଜିଲ୍ଲା ରାଜଗାଙ୍ଗପୁର କୁମ୍ଭାରପଡାର ରିତୁ ଓରଫ ଅନୁପମା ପ୍ରଜାପତି ନାମକ ଜଣେ 24 ବର୍ଷ ବୟସ୍କ ଯୁବତୀ ନିଜର ସେଲଫି ଉତ୍ତୋଳନ କରୁଥିବା ବେଳେ ଘୋଗର ଝରଣାରେ ଖସି ପଡିଥିଲେ । ନିଜ ପରିବାରଙ୍କ ସମ୍ମୁଖରେ ଘଟିଥିଲା ଏହି ଘଟଣା । ସବୁ ସରିଗଲା ନିମିଶକ ମଧ୍ୟରେ । ପରିବାର ଲୋକେ ତାଙ୍କୁ ବଞ୍ଚାଇ ପାରିନଥିଲେ ।
ଜଳର ପ୍ରବଳ ସ୍ରୋତରେ ସେ ସଲୀଳ ସମାଧି ନେଇଥିଲେ । ଘଟଣା ଘଟିବା ଖବର ପ୍ରଚାରିତ ହେବା କ୍ଷଣି ବାଲିଶଙ୍କରା ଅଗ୍ନିଶମ ବିଭାଗ, ଓଡ୍ରାଫ ଟିମ ଓ ସ୍ଥାନୀୟ ପୋଲିସ ଯୁବତୀଙ୍କୁ ଉଦ୍ଧାର କରିବାପାଇଁ ଚେଷ୍ଟା କରି ବିଫଳ ହୋଇଥିଲା । ତେବେ ଆଜି (ସୋମବାର) ଅପରାହ୍ନରେ ତାଙ୍କ ମୃତଦେହ ଉଦ୍ଧାର କରାଯାଇଥିଲା । ମୃତକଙ୍କ ପରିବାର ଲୋକେ ଏନେଇ ଥାନାରେ କୌଣସି ମାମଲା ନକରି ମୃତଦେହକୁ ନେଇ ଘରକୁ ଫେରିଛନ୍ତି । ଅନୁପମା ନିଜ ପରିବାର ଲୋକଙ୍କ ସହ ହସ ଖୁସି କରିବାପାଇଁ ଘୋଗର ଆସିଥିଲେ । ହେଲେ ତାଙ୍କର ହସ ଖୁସି ସବୁଦିନ ପାଇଁ ଘୋଗରରେ ଲୀନ ହୋଇଗଲା ।
ସୁନ୍ଦରଗଡ଼ରୁ ହରିହରଦାସ ମହାପାତ୍ର, ଇଟିଭା ଭାରତ
