ରାଉରକେଲା: ଷ୍ଟିଲ ସିଟି ଏୟାରପୋର୍ଟରେ ଛିଡା ହୋଇଛି 2ଟି ନ୍ୟୁଜିଲାଣ୍ଡ ଏୟାରକ୍ରାଫ୍ଟ । ଏହି 2ଟି ଏୟାରକ୍ରାଫ୍ଟ 20 ତାରିଖରେ ଆସି ରାଉରକେଲାରେ ପହଞ୍ଚିଥିଲା । ଯେତେବେଳେ ଭାରତ ସହ ସାରା ବିଶ୍ବ କୋରୋନା ବିପକ୍ଷରେ ଲଢ଼ୁଛି ସେତେବେଳେ 2ଟି ବିଦେଶୀ ଏଆରକ୍ରାଫ୍ଟ ରାଉରକେଲାରେ ଅବତରଣ କରି ସହରବାସୀଙ୍କ ମଧ୍ୟରେ ଡର ସୃଷ୍ଟି କରିଛି । ଏ ବାବଦରେ ପ୍ରଶାସନ ମଧ୍ୟ କିଛି ସ୍ପଷ୍ଟ କରିନଥିବା ବେଳେ ରାଉରକେଲା ଇସ୍ପାତ କାରଖାନା କର୍ତ୍ତୃପକ୍ଷ ମଧ୍ୟ କୌଣସି ସୂଚନା ଦେଇନଥିଲେ ।
ଏନେଇ ଗଣମାଧ୍ୟମ ଅନୁସନ୍ଧାନ ପରେ ଆର୍ଏସ୍ପି କର୍ତ୍ତୃପକ୍ଷ କହିଛନ୍ତି ଯେ, ଜିଓଲୋଜିକାଲ ସର୍ଭେ ଅଫ ଇଣ୍ଡିଆ ପକ୍ଷରୁ ଓଡିଶା , ଝାରଖଣ୍ଡ , ଛତିଶଗଡ ଏବଂ ପଶ୍ଚିମବଙ୍ଗରେ ସର୍ଭେ ଲାଗି ଏକ କମ୍ପାନୀଙ୍କୁ ଭାରତ ସରକାର ନିଯୁକ୍ତ କରିଥିଲେ । ଉକ୍ତ କମ୍ପାନୀ ଏହି 4ଟି ରାଜ୍ୟରେ ସର୍ଭେ ଲାଗି ନ୍ୟୁଜିଲାଣ୍ଡରୁ ଏହି ଦୁଇଟି ସ୍ବତନ୍ତ୍ର ପ୍ଲେନ ଆଣିଥିଲେ ଯେଉଁଥିରେ ସର୍ଭେ ଲାଗି ସମସ୍ତ ଯନ୍ତ୍ରପାତି ଥିଲା । ଗୋଟିଏ ପ୍ଲେନ 19 ତାରିଖରେ ଓ ଆଉ ଗୋଟିଏ 20 ତାରିଖରେ 7ଜଣିଆ ସଦସ୍ୟଙ୍କୁ ନେଇ ରାଉରକେଲା ଆସିଥିଲା । ତେବେ କୋରୋନା ଲାଗି ନ୍ୟୁଜିଲାଣ୍ଡରୁ ତାଙ୍କ ନାଗରିକଙ୍କୁ ଫେରି ଆସିବାକୁ କୁହାଯାଇଥିଲା । ଫଳରେ ପାଇଲଟ ସହ 7 ବିଦେଶୀ ଝାରସୁଗୁଡା ଦେଇ ତାଙ୍କ ଦେଶକୁ ଫେରି ଯାଇଥିବା RSP କର୍ତ୍ତୃପକ୍ଷ କହିଛନ୍ତି ।
ଗତ 20 ତାରିଖରେ ବିମାନ ଚଳାଚଳ ବନ୍ଦ ହୋଇନଥିବା ବେଳେ ରାଉରକେଲାରେ ଏୟାରକ୍ରାଫ୍ଟ କାହିଁକି ଛାଡି ଦେଇଗଲେ ତାହା ପ୍ରଶ୍ନବାଚୀ ସୃଷ୍ଟି କରିଛି । ସେପଟେ ସମସ୍ତ ଘଟଣା 10 ଦିନ ପରେ ଲୋକଲୋଚନକୁ ଆସିଥିବାରୁ ଏହାର ଏକ ଯାଞ୍ଚ କରି ଲୋକଙ୍କ ସନ୍ଦେହ ଦୂର କରିବାକୁ ଦାବି ହେଉଛି । ଏପଟେ ଆର୍ଏସ୍ପି କର୍ତ୍ତୃପକ୍ଷ କହିଛନ୍ତି ଯେ, ସମସ୍ତଙ୍କ ଡାକ୍ତରୀ ଯାଞ୍ଚ ଆଇଜିଏଚ୍ରେ କରାଯାଇଥିଲା ଏବଂ ରିପୋର୍ଟ ନେଗେଟିଭ ଥିଲା ।
ରାଉରକେଲାରୁ ରାଜେନ୍ଦ୍ର ନାଥ ମିଶ୍ର, ଇଟିଭି ଭାରତ
