ସୁନ୍ଦରଗଡ଼: ମାନସିକ ବିକୃତ ସାନ ଭାଇର ଉନ୍ମତ କାଣ୍ଡ । ଟାଙ୍ଗିଆରେ ହାଣି ବଡ଼ ଭାଇର ମୁଣ୍ଡ ଗଣ୍ଡିକୁ ଅଲଗା କଲା ସାନଭାଇ। ଖାଲି ସେତିକି ନୁହେଁ, ବଡ଼ ଭାଇର ମୃତ୍ୟୁ ପରେ ତାଙ୍କ ଗୋଡ଼ ହାଣି ଏଣେତେଣେ ପକାଇ ଦେଇଥିବା ସୂଚନା ମିଳିଛି। ସୁନ୍ଦରଗଡ଼ ଜିଲ୍ଲା ବଡ଼ଗାଁ ଥାନା ଅଞ୍ଚଳରେ ଏଭଳି ଏକ ଲୋମ ଟାଙ୍କୁରା ହତ୍ୟାକାଣ୍ଡ ଘଟିଛି ।
ବଡ଼ଗାଁ ଥାନା ଅଞ୍ଚଳ ଟିମନା ପଞ୍ଚାୟତର ଘୁଗରୀବେର୍ନା ଗାଁ ବାସିନ୍ଦା ହେଉଛନ୍ତି ଜର୍ଜ ଲାକ୍ରା ଓ ସରୋଜ ଲାକ୍ରା। 33 ବର୍ଷ ବୟସ୍କ ସରୋଜ ଲାକ୍ରା ଜଣେ ମାନସିକ ରୋଗୀ। ବଡ଼ ଜର୍ଜ ଲାକ୍ରାଙ୍କ ସହ ରହି ଆସୁଥିଲେ । ଗତାକାଲି(ସୋମବାର) ବିଳମ୍ବିତ ରାତିରେ କୌଣସି କାରଣରୁ ଜର୍ଜ ଲାକ୍ରାଙ୍କୁ ଟାଙ୍ଗିଆରେ ଆକ୍ରମଣ କରିଥିଲେ ସରୋଜ ଲାକ୍ରା। ବଡ଼ ଭାଇଙ୍କୁ ବୀଭତ୍ସ ଭାବରେ ହତ୍ୟା କରି ମୁଣ୍ଡ ଗଣ୍ଡି ଅଲଗା କରିଥିଲା ସରୋଜ ।
ଏହାପରେ ଜର୍ଜଙ୍କ ଗୋଡ଼ ଦୁଇଟିକୁ ନିର୍ଦ୍ଦୟ ଭାବରେ ହାଣି ଏଣେତେଣେ ପକାଇ ଦେଇଥିବା ସୂଚନା ମିଳିଛି। ଘଟଣାସ୍ଥଳରେ ବଡ଼ ଥାନା ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି । ଅଭିଯୁକ୍ତ ସରୋଜକୁ ଅଟକ ରଖାଯାଇଛି । ଏହାସହ ସାଇଣ୍ଟିଫିକ ଟିମ ରାଜଗାଙ୍ଗପୁର ଏସଡିପିଓ ଘଟଣାସ୍ଥଳରେ ପହଞ୍ଚି ଛାନଭିନ ଆରମ୍ଭ କରିଛନ୍ତି । ଏହି ହତ୍ୟାକାଣ୍ଡର ପ୍ରକୃତ କାରଣ ଅସ୍ପଷ୍ଟ ରହିଛି । ବଡ଼ଥାନାରୁ 35 କିମି ଦୂରରେ ଏକ ଅପହଞ୍ଚ ଅଞ୍ଚଳରେ ଘୁଗରୀବେର୍ନା ଗାଁ ରହିଥିବା ସୂଚନା ମିଳିଛି ।
ସୁନ୍ଦରଗଡ଼ରୁ ହରିହର ଦାସମହାପାତ୍ର, ଇଟିଭି ଭାରତ
