ସୁବର୍ଣ୍ଣପୁର: ମହଙ୍ଗା ପଡିଲା ନଦୀ ବ୍ରିଜରେ ଚଢି ସେଲଫି ନେବା । ସହରର ବିଜୁ ପଟ୍ଟନାୟକ ସେତୁରେ ଜଣେ ଯୁବକ ସେଲଫି ନେଉଥିବା ବେଳେ ମହାନଦୀରେ ପଡିଯାଇଛନ୍ତି । ଚିକିତ୍ସା ପାଇଁ ତାଙ୍କୁ ବୁର୍ଲା ବଡ ମେଡିକାଲରେ ଭର୍ତ୍ତି କରାଯାଇଛି ।
ତେବେ ଗୁରୁତର ଯୁବକ ହେଲେ 24 ବର୍ଷୀୟ ଜିତୁ ନାୟକ । ଆଜି(ଗୁରୁବାର) ଜିତୁ ତାଙ୍କ 2ଜଣ ସାଙ୍ଗଙ୍କ ସହ ସହରରୁ ହିକୁଡି ଆଡକୁ ଯାଉଥିବା ବେଳେ ମହାନଦୀ ପୋଲ ଉପରେ ଅଟକିଥିଲେ । ସେଠାରେ କିଛି ସମୟ କଥା ହେବା ପରେ ନିଜ ମୋବାଇଲରେ ସେଲଫି ନେଲେ । ଏହାପରେ ଜିତୁ ସେଲଫି ନେବା ପାଇଁ ବ୍ରିଜର ବାଡକୁ ଚଢିଥିଲେ । ହେଲେ ନିୟନ୍ତ୍ରଣ ହରାଇ ପୋଲ ତଳକୁ ପଡିଯାଇଥିଲେ ।
ଅଗ୍ନିଶମ ବିଭାଗ ଘଟଣା ସ୍ଥଳରେ ପହଞ୍ଚି ଜିତୁକୁ ଉଦ୍ଧାର କରି ପ୍ରଥମେ ଜିଲ୍ଲା ମୁଖ୍ୟ ଚିକିତ୍ସାଳୟ ଓ ପରେ ବୁର୍ଲା ବଡ ଡାକ୍ତରଖାନାକୁ ସ୍ଥାନାନ୍ତର କରିଛନ୍ତି । ଏବେ ଜିତୁର ସ୍ବାସ୍ଥ୍ୟ ଅବସ୍ଥା ଗମ୍ଭୀର ଥିବା ଜଣାପଡ଼ିଛି ।
ପ୍ରାୟ 40 ଫୁଟ ତଳକୁ କଚାଡି ହୋଇ ପଡିବାରୁ ଶରୀରର ବିଭିନ୍ନ ସ୍ଥାନରେ ଆଘାତ ପାଇଥିବା ଜଣାପଡିଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
