ସୁବର୍ଣ୍ଣପୁର: ଜିଲ୍ଲା ବେହେରାମାଲ ପଞ୍ଚାୟତର ପିପିଲି ପାଲି ଗାଁରେ ଖରିଫ ଧାନ ଚାଷରେ ଚକଡା ଲାଗିଛି। ପ୍ରାୟ ସପ୍ତାହେରୁ ଅଧିକ ହେଲା ପାଣିପାଗ ମେଘୁଆ ଓ ବେଳେ ବେଳେ ଝିପିଝିପି ବର୍ଷା ହେଉଥିବାରୁ ରୋଗପୋକରୁ ଧାନକୁ ସୁରକ୍ଷା ଦେବାରେ ଚାଷୀ ବିଫଳ ହୋଇଛି । ବିଶେଷକରି ଚକଡା ଲାଗୁଥିବା ଅଞ୍ଚଳରେ ଧାନ ଗଛ ଶୁଖି ଯାଉଛି । ଫଳରେ ଚାଷୀ ମୁଣ୍ଡରେ ଚକଡା ଚଡକ ହୋଇ ପଡିଛି।
ଚକଡା ପାଇଁ କୌଣସି କୀଟନାଶକ ଔଷଧ କାମକୁ ଆସୁନାହିଁ। ଗୋଟିଏ ଧାନ କିଆରୀରୁ ଅନ୍ୟ କିଆରୀ ଗୁଡିକୁ ଚାହୁଁ ଚାହୁଁ ଚକଡା ମାଡି ଯାଉଛି । ଫଳରେ ଗତ ବର୍ଷ ଭଳି ଚଳିତବର୍ଷ ମଧ୍ୟ ଚକଡାରେ ଚାଷୀ ବେଶ କ୍ଷତିଗ୍ରସ୍ତ ହେବା ଆଶା କରାଯାଉଛି । ଚାଷୀମାନେ ଜିଲ୍ଲା କୃଷି ବିଭାଗକୁ ଚକଡା ଦମନ ପାଇଁ ଆବଶ୍ୟକ କୃଷି ପରାମର୍ଶ ସହିତ ରିହାତି ଦରରେ କୀଟନାଶକ ଔଷଧ ଯୋଗାଇ ଦେବା ପାଇଁ ଦାବି କରିଛନ୍ତି। ଜିଲ୍ଲା କୃଷି ବିଭାଗର କୃଷି ଅଧିକାରୀ ଓ କୃଷି ବୈଜ୍ଞାନିକ ମାନେ ବିଭିନ୍ନ ଅଞ୍ଚଳ ପରିଦର୍ଶନ କରି ଖରିଫ ଧାନ ଚାଷର ସମୀକ୍ଷା କରିଛନ୍ତି।
ହେଲେ ଚକଡ଼ା ପାଇଁ କୃଷି ବୈଜ୍ଞାନିକ ମାନେ ମଧ୍ୟ ନାଚାର । ତେବେ ପାଣିପାଗ ପରିବର୍ତ୍ତନ ନ ହେଲେ ଚାଷୀ ଆଗକୁ ଆହୁରି କ୍ଷତିଗ୍ରସ୍ତ ହେବ ଏଥିରେ ସନ୍ଦେହ ନାହିଁ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
