ସୁବର୍ଣ୍ଣପୁର: ନିର୍ବାଚନ ତାରିଖ ଘୋଷଣା ହେବା ପରେ ସମଗ୍ର ଦେଶରେ ଲାଗୁ ହୋଇଛି ଆଚରଣ ବିଧି । ଏହାର ପ୍ରଭାବ ଓଡିଶାରେ ମଧ୍ୟ ଦେଖିବାକୁ ମିଳିଛି । କିନ୍ତୁ ଏହାକୁ ଅବମାନନା କରିଛି ସୁବର୍ଣ୍ଣପୁର ଜିଲ୍ଲା । ଆଚରଣ ବିଧି ଲାଗୁ ହେବା ସତ୍ତ୍ବେ ବିଜେଡି ଏହାକୁ ଉଲ୍ଲଙ୍ଘନ କରିଥିବା ବିଜେପି ଅଭିଯୋଗ କରିଛି । 2019 ସାଧାରଣ ନିର୍ବାଚନ ପାଇଁ ଆଚରଣ ବିଧି ଲାଗୁ ହୋଇଥିବା ବେଳେ ସାଂସଦଙ୍କ ନାମ ଫଳକ ଥାଇ ଗାଁ ଗାଁରେ ସୋଲାର ଲାଇଟ୍ ସଂଯୋଗ ଚାଲିଛି ।
ସୂଚନା ଅନୁସାରେ, ଜିଲ୍ଲାର ବୀରମହାରାଜପୁର ନିର୍ବାଚନ ମଣ୍ଡଳୀ ଅନ୍ତର୍ଗତ ଭଜବଳପୁର ଗାଁରେ ସୋଲାର ଲାଇଟ୍ ଲଗାଯାଉଥିବା ସମୟରେ ନିର୍ବାଚନ ଆଚରଣ ବିଧି ଲାଗୁ ହୋଇସାରିଥିଲା । କିନ୍ତୁ ଏହାକୁ ଉଲ୍ଲଙ୍ଘନ କରିଛି ବିଜେଡି । ଏହାକୁ ବିରୋଧ କରିଛନ୍ତି ବିଜେପି କାର୍ଯ୍ୟକର୍ତ୍ତାମାନେ । ଆଚରଣ ବିଧିକୁ ଖୋଲାଖୋଲି ଭାବେ ବିଜେଡି ଦଳ ଉଲ୍ଲଙ୍ଘନ କରି ଭୋଟ ହାତେଇବାର ପ୍ରୟାସ କରୁଥିବା ଅଭିଯୋଗ କରିଛନ୍ତି ।
ବଲାଙ୍ଗୀର ଲୋକସଭା ସାଂସଦ କଳିକେଶ ନାରାୟଣ ସିଂ ଦେଓଙ୍କ ନାମ ଫଳକ ଲଗାଇ ସୋଲାର ଲାଇଟ ଯୋଗାଇ ଦିଆଯାଉଛି । ଏନେଇ ଫୋନ ଯୋଗେ ସ୍ଥାନୀୟ ଥାନାରେ ଅଭିଯୋଗ ସହ ନିର୍ବାଚନ ଅଧିକାରୀଙ୍କ ନିକଟରେ ବିଜେପି ଅଭିଯୋଗ କରିଛି । ବଲାଙ୍ଗୀର ଲୋକସଭା ସାଂସଦ ପ୍ରତିନିଧିଙ୍କ ନିର୍ଦ୍ଦେଶରେ ଏହି ଲାଇଟ୍ ଗାଁ ଗାଁରେ ଲଗାଯାଉଥିବା ବିଜେପି କାର୍ଯ୍ୟକର୍ତ୍ତାମାନେ ଅଭିଯୋଗ କରିଛନ୍ତି ।
160ଟି ଲାଇଟ ବୀରମହାରାଜପୁର ବିଧାନସଭା ନିର୍ବାଚନ ମଣ୍ଡଳୀ ପାଇଁ ମଞ୍ଜୁର ହୋଇଥିବା ଜଣାପଡିଛି । ଅପରପକ୍ଷରେ ଏହାର ତଦନ୍ତ କରି ଆବଶ୍ୟକ କାର୍ଯ୍ୟାନୁଷ୍ଠାନ ନିଆଯିବ ବୋଲି ଜିଲ୍ଲାପାଳ ମଧୂସୂଦନ ମିଶ୍ର କହିଛନ୍ତି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
