ସୁବର୍ଣ୍ଣପୁର: ଜିଲ୍ଲାର ତରଭା ତହସିଲଦାରଙ୍କ ମନମୁଖୀ ଶାସନ ପାଇଁ ଆନ୍ଦୋଳନକୁ ଓହ୍ଲାଇଛି ଟ୍ରକ ମାଲିକ ସଂଘ । ସ୍ଥାନୀୟ ସୁଖତେଲ୍ ନଦୀର ଘାଟକଇଁତରା ବାଲିଘାଟର ନିଲାମ ଦାବି ନେଇ ସଂଘ ଆନ୍ଦୋଳନକୁ ଓହ୍ଲାଇଛି । ତା ସହ ସଂପୃକ୍ତ ତହସିଲଦାର ଗତକାଲି ଭିଜିଲାନ୍ସ ଜାଲରେ ପଡିଥିବାବେଳେ ସେ ବେଆଇନ ଭାବେ ଲାଞ୍ଚ କାରବାର କରୁଥିବା ଅଭିଯୋଗ ହୋଇଛି ।
ତହସିଲଦାରଙ୍କ ସମୟରେ ହୋଇଥିବା ଦୁର୍ନୀତିର ଉଚ୍ଚସ୍ତରୀୟ ତଦନ୍ତ କରିବା ପାଇଁ ଟ୍ରାକ୍ଟର ମାଲିକମାନେ ଦାବି କରିଛନ୍ତି । ସ୍ଥାନୀୟ ନୁଆଁପଡା ଛକରୁ ଶତାଧିକ ଟ୍ରାକ୍ଟର ନେଇ ଏକ ବିଶାଳ ଶୋଭାଯାତ୍ରାରେ ବାହାରି ସହର ପରିକ୍ରମା କରିଥିଲେ । ପରେ ତହସିଲ କାର୍ଯ୍ୟାଳୟ ସମ୍ମୁଖରେ ଟ୍ରାକ୍ଟର ରଖି ମାଲିକମାନେ ବିକ୍ଷୋଭ ପ୍ରଦର୍ଶନ କରିଛନ୍ତି ।
ବାଲିଘାଟ ନିଲାମ ନେଇ ଜିଲ୍ଲାପାଳ ମନୀଷା ବନାର୍ଜୀଙ୍କ ଉଦ୍ଦେଶ୍ୟରେ ସ୍ଥାନୀୟ ଭାରପ୍ରାପ୍ତ ତହସିଲଦାର ତ୍ରିପୁର ମହାନନ୍ଦଙ୍କୁ ଏକ ଦାବିପତ୍ର ପ୍ରଦାନ କରାଯାଇଛି । ତୁରନ୍ତ ଏହାର ସମାଧାନ ନକଲେ ଆଗାମୀ ଦିନରେ ଆନ୍ଦୋଳନକୁ ବ୍ୟାପକ କରାଯିବା ନେଇଁ ଚେତାବନୀ ଦେଇଛି ଟ୍ରାକ୍ଟର ସଂଘ ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା , ଇଟିଭି ଭାରତ
