ସୁବର୍ଣ୍ଣପୁର: ଷୋହଳ ଭର୍ଣ୍ଣି ବାଦ୍ୟର ତାଳେ ତାଳେ ଝୁମି ଉଠିଥିଲା ସୁବର୍ଣ୍ଣପୁର ସହର । ସୁବର୍ଣ୍ଣପୁରର ତନ୍ତ୍ର ପୂଜାରେ ବାଜେ ଏହି ବାଦ୍ୟ । ବଳିଯାତ୍ରାରେ ଷୋହଳ ଭର୍ଣ୍ଣି ବାଦ୍ୟର ତାଳରେ ଉଦଣ୍ଡ ନୃତ୍ୟ କରେ ବଳୀ । ଆଉ ଏଥିରେ ବ୍ୟବହାର ହୋଇଥାଏ ମହିମାମୟ ଚେପଟା ଢୋଲ ।
ଖମ୍ବେଶ୍ବରୀ ମନ୍ଦିରରେ ଶହ ଶହ ବର୍ଷ ଧରି ରହି ଆସିଛି ଏହି ଚେପଟା ଢ଼ୋଲ । ଅଷ୍ଟଧାତୁରେ ନିର୍ମିତ ଏହି ଢୋଲକୁ ପାରଳା ଖେୁମଣ୍ଡି ରାଜଜେମା ବିବାହ ବେଳେ ଯୌତୁକରେ ଆଣିଥିଲେ । କିଛି ବର୍ଷ ପରେ ଢୋଲଟି ଭାଙ୍ଗି ଯିବାରୁ ଏହାକୁ ମହାନଦୀରେ ବିସର୍ଜିତ କରାଯାଇଥିଲା । କିନ୍ତୁ କିଛିଦିନ ପରେ ଏହା କୂଳରେ ଲାଗିଥିବାର ଦେଖିବାକୁ ମିଳିଲା । ଯାହାପରେ ରାଜା ସୁଧାଂଶୁ ଶେଖର ଏହାକୁ ପୁନଃ ନିର୍ମାଣ କରାଇଥିଲେ ।
ବଳିଯାତ୍ରା ସମୟରେ ଦେବୀଙ୍କ ଆଗରେ ଚେପଟା ଢୋଲ ଉପରେ ମହାବଳୀ ସବାର ହୋଇ କଳା ଓ ଧଳା ଛତ୍ର ଧରି ଉଦଣ୍ଡ ନୃତ୍ୟ କରେ । ଢୋଲର ଗୁରୁଗମ୍ଭୀର ଧ୍ଵନି ସହିତ ମାଲେଶ୍ରୀ ରାଗରେ ପ୍ରକମ୍ପିତ ହୁଏ ଚତୁର୍ଦିଗ । ଅନନ୍ୟ ଓ ଅପୂର୍ବ ଶ୍ରୁତିମଧୁର ଷୋହଳ ଭର୍ଣ୍ଣି ବାଦ୍ୟ ଧ୍ଵନିରେ ଖାଲି ବଳୀ କାହିଁକି, ଶ୍ରଦ୍ଧାଳୁଙ୍କ ଦେହ ମନରେ ମଧ୍ୟ ଶିହରଣ ସୃଷ୍ଟି ହୁଏ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା , ଇଟିଭି ଭାରତ
