ସୁବର୍ଣ୍ଣପୁର: ସୁବର୍ଣ୍ଣପୁର ଜିଲ୍ଲା ବିରମହରାଜପୁର ସହରରେ ସୋମବାର ଯୁବ କଂଗ୍ରେସ ସଭାପତି ଓ ପ୍ରଦେଶ ଯୁବ କଂଗ୍ରେସ ସଭାପତିଙ୍କ ନିଯୁକ୍ତିକୁ ବିରୋଧ କରାଯାଇଛି । ପୂର୍ବତନ ଜିଲ୍ଲା ଛାତ୍ର କଂଗ୍ରେସ ସଭାପତି ସାମନ୍ତ ପାତ୍ରଙ୍କ ନେତୃତ୍ବରେ ଯୁବ କଂଗ୍ରେସ କର୍ମୀମାନେ ସହରରେ ବିକ୍ଷୋଭ ପ୍ରଦର୍ଶନ କରିଥିବା ଦେଖାଯାଇଥିଲା । ସ୍ଥାନୀୟ ନବ ନିଯୁକ୍ତ ଯୁବ କଂଗ୍ରେସ ସଭାପତି ପ୍ରିୟବ୍ରତ ସାହୁ, ପ୍ରଦେଶ କଂଗ୍ରେସ ଯୁବ ସଭାପତି ତ୍ରିଲୋଚନ ଲେଙ୍କାଙ୍କୁ ଲକ୍ଷାଧିକ ଟଙ୍କା ଲାଞ୍ଚ ଦେଇ ସଭାପତି ହୋଇଥିବା ଅଭିଯୋଗ ହୋଇଛି ।
ତେବେ କଂଗ୍ରସ କମିଟିଗୁଡ଼ିକରେ ପଦବୀ ପାଇବାକୁ ହେଲେ ଦକ୍ଷତା ନୁହେଁ ବରଂ ଟଙ୍କା ଲାଞ୍ଚ ଦେବାକୁ ହୁଏ ବୋଲି ଅଭିଯୋଗ କରାଯାଇଛି । ତୃଣମୂଳସ୍ତରରେ କାର୍ଯ୍ୟ କରି ସଭ୍ୟ ସଂଗ୍ରହ କରିବା ସହିତ କଂଗ୍ରେସ ବିଚାରଧାରାର ପ୍ରଚାର ପ୍ରସାର କରୁଥିବା ଲୋକଙ୍କୁ ସୁଯୋଗ ଦିଆଯାଉ ନ ଥିବା ସାମନ୍ତ ପାତ୍ର ଅଭିଯୋଗ କରିଛନ୍ତି । ସେପଟେ ପ୍ରଦେଶ ଯୁବ କଂଗ୍ରେସ ସଭାପତିଙ୍କ ନିଷ୍ପତ୍ତିର ପ୍ରତିବାଦ କରି ଜିଲ୍ଲା ଯୁବ କଂଗ୍ରେସ ସଭାପତି ଓ ପ୍ରଦେଶ ଯୁବ କଂଗ୍ରେସ ସଭାପତିଙ୍କ କୁଶ ପୁତ୍ତଳିକା ଦାହ କରାଯାଇଛି ।
ସୁବର୍ଣ୍ଣପୁରରୁ ତାର୍ଥବାସୀ ପଣ୍ଡା, ଇଟିଭି ଭାରତ
