ସୁବର୍ଣ୍ଣପୁର: ବିନିକା ଫରେଷ୍ଟ ରେଞ୍ଜ ଅନ୍ତର୍ଗତ ମହଦା ଗାଁରେ ଦନ୍ତା ହାତୀ ମୃତ୍ୟୁ ଘଟଣା । ଏନେଇ ବନ ବିଭାଗ 2ଜଣଙ୍କୁ ଗିରଫ କରିବା ସହ କୋର୍ଟ ଚାଲାଣ କରିଛି। ତେବେ ଗତ ଦୁଇ ଦିନ ତଳେ ଏକ ଦନ୍ତା ହାତୀ ମହଦା ଗ୍ରାମ୍ୟ ଜଙ୍ଗଲରେ ମୃତ୍ୟୁ ହୋଇଥିବା ବନ ବିଭାଗ ଖବର ପାଇଥିଲା । ଏନେଇ ପ୍ରାଣୀଧନ ଚିକିତ୍ସା ବିଭାଗର ପଶୁ ଚିକିତ୍ସକଙ୍କ ସହଯୋଗରେ ମୃତ ଦନ୍ତା ହାତୀର ମୃତଦେହ ବ୍ୟବଚ୍ଛେଦ କରିବା ପରେ ହାତୀର ସଂସ୍କାର କାର୍ଯ୍ୟ କରାଯାଇଥିଲା । ସେହିପରି ବନ ବିଭାଗ ଏହି ଦନ୍ତା ହାତୀର ମୃତ୍ୟୁ ଘଟଣାକୁ ନେଇ ତଦନ୍ତ କରୁଥିବା ବେଳେ ଆଜି ଏହି ଘଟଣାରେ ସଂପୃକ୍ତ ଦୁଇ ଜଣଙ୍କୁ ଗିରଫ କରାଯାଇଛି ।
ତେବେ ଗିରଫ ବ୍ୟକ୍ତି ଦୁଇ ଜଣ ହେଲେ ମହଦା ଗାଁର ବିରେନ୍ଦ୍ର ଶର୍ମା ଓ ଆଲାଉଦ୍ଦିନ ଶର୍ମା ବୋଲି ବନ ବିଭାଗ ପକ୍ଷରୁ ସୂଚନା ମିଳିଛି । ଉଭୟ ଅଭିଯୁକ୍ତ ସଂପର୍କରେ ବାପ, ପୁଅ ଓ ଉଭୟେ ମିଶି ବାରହା ଶିକାର ପାଇଁ ବିଛାଇଥିବା ବିଦ୍ୟୁତ ତାରରେ ଦନ୍ତା ହାତୀର ମୃତ୍ୟୁ ହୋଇଥିବା ବନ ବିଭାଗ ସ୍ପଷ୍ଟ କରିଛି । ଅଭିଯୁକ୍ତ ମାନଙ୍କ ପାଖରୁ ଦେଢ କେଜି ଖୋଲା ଲୁହା ତାର ଜବତ କରାଯାଇଛି।
ଜିଲ୍ଲାରେ ଅବାଧରେ ବନ୍ୟ ଜନ୍ତୁଙ୍କ ଶିକାର କରାଯାଉଥିବା ବେଳେ ବନ ବିଭାଗ ଶିକାରୀମାନଙ୍କ ଉପରେ ଅଂକୁଶ ଲଗାଇବାରେ ସକ୍ଷମ ହୋଇ ପାରୁ ନାହିଁ । ବିଶେଷକରି ବାରହା ଓ କୁଟରା ଆଦି ଶିକାର କରିବା ପାଇଁ ଶିକାରୀମାନେ ଖୋଲା ସଁପୁର ଲୁହା ତାର ବ୍ୟବହାର କରୁଛନ୍ତି । ଜଙ୍ଗଲ ଭିତରେ ଯାଇଥିବା ବିଦ୍ୟୁତ ଲାଇନରେ ଖୋଲା ତାର ବ୍ୟବହାର କରୁଛନ୍ତି । ତେବେ ସେହି ଖୋଲା ତାର ବିଦ୍ୟୁତ ସଂସ୍ପର୍ଶରେ ଆସି ଅନେକ ଧନ ଜୀବନ ନଷ୍ଟ ହେଉଛି ।
ବନ ବିଭାଗ ପକ୍ଷରୁ ହାତୀ ଟ୍ରାକିଂ ଦଳ ଗଠନ କରାଯାଇଥିବା ବେଳେ ହାତୀଙ୍କ ଗତି ନିୟନ୍ତ୍ରଣ କରିବା ସହିତ ଜନବସତି ମୁହାଁ ହାତୀଙ୍କୁ ଜଙ୍ଗଲ ଭିତରକୁ ଘଉଡାଇବା ପାଇଁ ଆଧୁନିକ ଉପକରଣ ବ୍ୟବହାର କରୁଛନ୍ତି । ତେବେ ବନ ବିଭାଗର ଅବହେଳା ଯୋଗୁଁ ହାତୀ ମୃତ୍ୟୁ ଭଳି ଘଟଣା ଦେଖିବାକୁ ମିଳୁଛି । ମହଦା ଗାଁରେ ଏହି ଦନ୍ତା ହାତୀ ମୃତ୍ୟୁ ଘଟଣାରେ ଜନସାଧାରଣ ଅଭିଯୁକ୍ତମାନଙ୍କୁ ଦାୟୀ କରିବା ସହିତ ଜଙ୍ଗଲ ବିଭାଗର କାର୍ଯ୍ୟକଳାପ ଉପରେ ପ୍ରଶ୍ନ ଉଠାଉଛନ୍ତି ।
ଇଟିଭି ଭାରତ, ସୁବର୍ଣ୍ଣପୁର
