ସୁବର୍ଣ୍ଣପୁର: ନୂଆଁଖାଇ ପାଇଁ ଚଳଚଞ୍ଚଳ ସୁବର୍ଣ୍ଣପୁର ଜିଲ୍ଲା । କାହିଁ କେଉଁ କାଳରୁ ଜିଲ୍ଲାକୁ ଅଷ୍ଟଚଣ୍ଡୀଙ୍କ ସହର ବୋଲି କୁହାଯାଏ । ତେବେ ଗଡଜାତରେ ଚୌହାନ ଶାସନ ଅମଳରୁ ଦେବୀମାନଙ୍କୁ ନେଇ ପ୍ରତିଟି ପର୍ବପର୍ବାଣୀ ପାଳନ କରାଯାଏ । ସେହିପରି ଗଡଜାତର ଇଷ୍ଟଦେବୀ ମା ସୁରେଶ୍ବରୀଙ୍କ ନାଁରେ ନୂଆଖାଇ ଲଗ୍ନ ନିର୍ଣ୍ଣୟ କରାଯାଉଥିବା ବେଳେ ଦେବୀ ମାନଙ୍କୁ ସ୍ବତନ୍ତ୍ର ପୂଜା ଆରାଧନା ମଧ୍ୟ କରାଯାଏ ।
ସେପଟେ ନୂଆଁଖାଇ ପର୍ବ ପାଳନ ପାଇଁ ଦେବୀ ସୁରେଶ୍ବରୀଙ୍କ ପରେ ସମଲେଇ, ଖମ୍ବେଶ୍ବରୀ, ନାରାୟଣୀ, ଦଶମତି, ବୁଢି ସମଲେଇ, ଭଗବତୀ ଆଦି ଦେବୀଙ୍କ ପାଖରେ ବି ସ୍ବତନ୍ତ୍ର ପୂଜା ଆରାଧନା କରାଯାଏ । ଏଥିରେ ମନ୍ଦିରର ବାନାଠାରୁ ଆରମ୍ଭ କରି ଦେବୀଙ୍କ ବସ୍ତ୍ର ଯାଏଁ ସବୁକିଛି ନୂଆ ଜିନିଷ ବ୍ୟବହାର କରାଯାଏ । ସେହିପରି ମନ୍ଦିରଗୁଡିକରେ ଦୈନନ୍ଦିନ ବ୍ୟବହାର ହେଉଥିବା ସାମଗ୍ରୀ ସବୁ ନୂଆ ଭାବେ କରାଯାଇଥାଏ ।
ଏହି ନୂଆଁଖାଇ ପାଳନ ପାଇଁ ପଣ୍ଡିତ ମାନଙ୍କ ଦ୍ବାରା ମହାସଭା ବସି ସ୍ଥିର କରାଯାଇଥିବା ନବାନ୍ନ ଲଗ୍ନରେ ଦେବୀ ମା ସମଲେଇଙ୍କ ପୀଠରୁ ଇଷ୍ଟଦେବୀ ମା ସୁରେଶ୍ବରୀ ଓ ଅନ୍ୟାନ୍ୟ ଦେବୀପୀଠଙ୍କ ଠାରେ ପାହୁର ପହଞ୍ଚିବା ପରେ ତାହା ପ୍ରସ୍ତୁତ କରି ନୈବେଦ୍ୟ ଅର୍ପଣ କରାଯାଏ ।
ତେବେ ଇଷ୍ଟଦେବୀ ମା ସୁରେଶ୍ବରୀଙ୍କ ପୀଠରେ ବର୍ଷ ସାରା ଆମିଷ ଭୋଗ ପ୍ରସ୍ତୁତ ହେଉଥିବା ବେଳେ ନୂଆଖାଇ ତିଥିରେ କିନ୍ତୁ ତାର ବ୍ୟତିକ୍ରମ ଦେଖିବାକୁ ମିଳେ । ବର୍ଷର ପହିଲି ଶସ୍ୟକୁ ନେଇ ଅରୁଆ ଅନ୍ନ ଓ ବିଭିନ୍ନ ପ୍ରକାରର ବ୍ୟଞ୍ଜନ ସହିତ ପିଠାପଣା ଆଦି ପ୍ରସ୍ତୁତ କରି ଦେବୀଙ୍କୁ ଅର୍ପଣ କରାଯାଏ । ତା ସହିତ ଦେବୀଙ୍କ ପାଖରେ ନବାନ୍ନ ସମର୍ପଣ ପରେ ସୋନପୁର ଗଡଜାତବାସୀ ଓ ବୌଦ୍ଧ ଜିଲ୍ଲାର ପଞ୍ଚରା ଅଞ୍ଚଳର ଜନସାଧାରଣ ନବାନ୍ନ ଗ୍ରହଣ କରିଥାନ୍ତି ।
ତେବେ ପରମ୍ପରା ଅନୁସାରେ ନୂଆଁଖାଇରେ ବର୍ଷକୁ ଥରୁଟିଏ ଏହି ନିରାମିଷ ନୈବେଦ୍ୟ ସମର୍ପଣ କରିବାର ପରମ୍ପରା ଆଜି ବି ଅମଳିନ ରହିଛି । ଗଡଜାତ ଶାସନ ସମୟରେ ଅନ୍ନ ,ବ୍ୟଞ୍ଜନ ଓ ପିଠାପଣା ପାଇଁ ରାଜପ୍ରାସାଦରୁ ସବୁ ସାମଗ୍ରୀ ଯାଉଥିବା ବେଳେ ଏବେ କିନ୍ତୁ ସଦର ପୌର ପରିଷଦ ଏହି କାର୍ଯ୍ୟ କରି ଆସୁଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
