ସୁବର୍ଣ୍ଣପୁର: ମହାମାରୀ କୋରୋନା ସଙ୍କଟ ଦେଇ ଗତି କରୁଛି ଦେଶ । ଏପରିସ୍ଥିତିରେ ସଂକ୍ରମଣ ରୋକିବା ପାଇଁ ପରିବେଶର ସ୍ବଚ୍ଛତା ଗୁରୁତ୍ବପୂର୍ଣ୍ଣ ହୋଇପଡିଛି । ଆଉ ଏହି ସ୍ବଚ୍ଛତା କାର୍ଯ୍ୟରେ ଲାଗିଛନ୍ତି ଅନେକ ସଫେଇକର୍ମୀ । ଜନସାଧାରଣଙ୍କ ସୁରକ୍ଷା ପାଇଁ ନିଜ ଜୀବନକୁ ବାଜି ଲଗାଇଛନ୍ତି ଏମାନେ । ତେବେ କୋରୋନା ଯୁଦ୍ଧରେ ଯୋଦ୍ଧା ସାଜିଥିବା ଏହି ସଫେଇକର୍ମୀଙ୍କୁ ସମ୍ବର୍ଦ୍ଧିତ କରିଛି ସୁବର୍ଣ୍ଣପୁର ଜିଲ୍ଲା ବିଜେପି ।
ସୁବର୍ଣ୍ଣପୁର ଜିଲ୍ଲା ବିଜେପି ପକ୍ଷରୁ ସହରର କୁଞ୍ଜ ହୋଟେଲ ଆଗ ପଡ଼ିଆରେ ଆୟୋଜିତ ବୈଠକରେ ସହରର ପ୍ରାୟ 60ରୁ ଅଧିକ ସଫେଇ କର୍ମଚାରୀଙ୍କୁ ରାସନ ସାମଗ୍ରୀ ପ୍ରଦାନ କରାଯାଇଥିଲା। ଏହି ରାସନ କିଟରେ ତେଲ, ଲୁଣ , ଚିନି, ଚାହା, ଅଟା , ବେସନ ଆଦି ଖାଦ୍ୟ ସାମଗ୍ରୀ ଦିଆଯାଇଛି ।
ସେହିପରି କୋରନାକୁ ଭୃକ୍ଷେପ ନକରି ନିଜ କର୍ତ୍ତବ୍ୟ ସମ୍ପାଦନ କରୁଥିବା ସାମ୍ବାଦିକ ମନଙ୍କୁ ଉପଢୌକନ ଭାବେ ଗାମୁଛା ପ୍ରଦାନ କରି ସମ୍ବର୍ଧିତ କରାଯାଇଥିଲା। ଏହି ଅବସରରେ ବଲାଙ୍ଗୀର ଲୋକସଭା ସାଂସଦ ସଂଗୀତା ସିଂଦେଓ ଯୋଗଦେଇ ସଫେଇ କର୍ମଚାରୀ ଓ ସାମ୍ବାଦିକମାନଙ୍କୁ ପ୍ରଶଂସା କରିବା ସହିତ ସମ୍ବର୍ଧିତ କରିଥିଲେ ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା ,ଇଟିଭି ଭାରତ
