ସୁବର୍ଣ୍ଣପୁର: ରାଜ୍ୟରେ ବିଦେଶାଗତ ପକ୍ଷୀଙ୍କ ପାଇଁ ଉଦ୍ଦିଷ୍ଟ କହିଲେ ଚିଲିକା କଥା ମନକୁ ଆସେ । ହେଲେ ଏବେ ଏହି ପକ୍ଷୀମାନେ ଖୋଜିଛନ୍ତି ରାଜ୍ୟରେ ଆଉ ଏକ ନୂଆ ଠିକଣା । ମହାନଦୀର ବିସ୍ତିନ୍ନ ଜଳରାଶି ଓ ଘଞ୍ଚ ଜଙ୍ଗଲ ଘେରା ପରିବେଶ ପାଇଁ ଏବେ ବିଦେଶାଗତ ଅନେକ ବିରଳ ପକ୍ଷୀଙ୍କ ପାଇଁ ନୂଆ ପସନ୍ଦ ପାଲଟିଛି ସୁବର୍ଣ୍ଣପୁର । ଏବେ ଯୁଆଡେ ଦେଖିଲେ ଆଖିକୁ ଆକର୍ଷିତ କରୁଛନ୍ତି ରଙ୍ଗ ବେରଙ୍ଗର ବିଦେଶୀ ପକ୍ଷୀ । ସକାଳ ହେଉ ହେଉ ଏମାନଙ୍କ କଳରବରେ କମ୍ପୁଛି ପରିବେଶ ।
ସୁବର୍ଣ୍ଣପୁର ଜିଲ୍ଲାର ପ୍ରାକୃତି ପରିବେଶ, ଜଳବାୟୁ ଓ ପ୍ରକୃତିର ମିଳୁଥିବା ଖାଦ୍ୟ ଆଧାରରେ ଉଭୟ ଜଳଚର ଓ ସ୍ଥଳଚର ପକ୍ଷୀମାନେ ଖୋଜି ପାଇଛନ୍ତି ନିଜର ନୂଆ ଠିକଣା । ଏହି ପକ୍ଷୀଙ୍କ ମଧ୍ୟରେ ଉତ୍ତର ଆମେରିକାର କମନ ମାର୍ଗନ୍ସର ସହ ରହିଛନ୍ତି ରୁଡି ଶେଲ ଡକ, ରେଡ କ୍ରେଷ୍ଟେଡ ପୋଚାର୍ଡ, ବ୍ଲକା ବେଲିଡ ଟର୍ନ, ରୋଜି ଷ୍ଟର୍ଲିଙ୍ଗ, ପଲାସ ଗଲ, ବ୍ଲାକ ହେଡେଡ ଗଲ ଓ ରିଭର ଲାପବି । ଏଥିସହ ୟୁରୋପ ଓ ସାଇବେରିଆ ଅଞ୍ଚଳରୁ ମଧ୍ୟ ଅନେକ ପକ୍ଷୀଙ୍କ ଆଗମନ ହୋଇଥିବା ଦେଖାଯାଇଛି । ଏହି ପକ୍ଷୀମାନେ ଚିଲିକାରେ ଦେଖାଯାଉନଥିବା ବେଳେ ଏମାନଙ୍କୁ ନିଜ ଜିଲ୍ଲାରେ ଦେଖି ଖୁସିରେ ଆତ୍ମହରା ହୋଇଛନ୍ତି ପକ୍ଷୀପ୍ରେମୀ ଓ ପରିବେଶବିତ୍ ।
ଜିଲ୍ଲାର ଅନୁକୂଳ ପାଣିପାଗ ଏହି ବିଦେଶାଗତ ପକ୍ଷୀଙ୍କୁ ସୁହାଉଥିବାରୁ ଧିରେ ଧିରେ ଜିଲ୍ଲାରେ ପ୍ରଜାତିର ସଂଖ୍ୟା ବଢି 220ରେ ପହଞ୍ଚିଥିବା ବନ ବିଭାଗ ସୂଚନା ଦେଇଛି । ଏଥିପାଇଁ ଜିଲ୍ଲାରେ ବ୍ୟାପକ ମାତ୍ରାରେ ଭରି ରହିଥିବା ନଦୀ, ନାଳ ଓ ଘଞ୍ଚ ଜଙ୍ଗଲ । ବିଶେଷ କରି ମହାନଦୀ ଓ ତେଲ ନଦୀର ସଂଗମସ୍ଥଳ ସହ ସୋନପୁର ଜିଲ୍ଲାରେ ରହିଛି ଅନେକ ବଡ ବଡ ପୁସ୍କରିଣୀ । ଯାହାକି ଏହି ବିଦେଶାଗତ ପକ୍ଷୀଙ୍କୁ ବେଶ ସୁହାଉଛି । ଏଣୁ ଧିରେ ଧିରେ ଜିଲ୍ଲାକୁ ଏହି ପକ୍ଷୀଙ୍କ ଆଗମନ ସଂଖ୍ୟା ବଢିବାରେ ଲାଗିଛି । ଏସବୁ ପକ୍ଷୀଙ୍କୁ ଦେଖିବାକୁ ଏବେ ଲୋକଙ୍କ ଆଗ୍ରହ ମଧ୍ୟ ବଢିବାରେ ଲାଗିଛି ।
ଏହି ପକ୍ଷୀଙ୍କ ସୁରକ୍ଷା ପାଇଁ ଏବେ ବ୍ୟାପକ ଜନ ସଚେତନତା ଦରକାର ବୋଲି କହିଛନ୍ତି ପକ୍ଷୀ ପ୍ରେମୀ । ଜଳ, ଜମି, ଜଙ୍ଗଲ ଦିନକୁ ଦିନ କ୍ଷୟ ହୋଇ ହୋଇ ଯାଉଛି ।ହେଲେ ଏ ଅତିଥି ପକ୍ଷୀମାନଙ୍କୁ ଆତିଥେୟତା ଦେବା ସହ ଆବଶ୍ୟକ ଖାଦ୍ୟ ଓ ବାସସ୍ଥାନ ଯୋଗାଇବା ସହ ନିଜ ପରିବେଶକୁ ସରସ ସୁନ୍ଦର କରିବା ପାଇଁ ସଭିଏଁ ସଚେତନ ହେବା ଜରୁରୀ ହୋଇ ପଡିଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
