ସୁବର୍ଣ୍ଣପୁର: ଯୁବ ଉଦ୍ୟୋଗୀଙ୍କ ପାଇଁ ସୁବର୍ଣ୍ଣପୁର ପ୍ରଶାସନ ପକ୍ଷରୁ ଅନେକ ଦୋକାନ ଘର ନିର୍ମାଣ ହୋଇଛି । ହେଲେ ଦିନ ପରେ ଦିନ ଗଡି ଚାଲିଛି, କିନ୍ତୁ ବ୍ୟବସାୟୀଙ୍କୁ ମିଳୁନି ଦୋକାନ । ବର୍ଷେ କି ଦୁଇ ବର୍ଷ ନୁହେଁ, ଦୀର୍ଘ 10 ବର୍ଷ ହେଲା ଦୋକାନଟିଏ ପାଇବାରୁ ବଞ୍ଚିତ ଅଛନ୍ତି ବ୍ୟବସାୟୀ ।
ଚକାଚକ ଦୋକାନ ଘର । କିନ୍ତୁ ଦୁର୍ଭାଗ୍ୟର କଥା ଆଜି ପର୍ଯ୍ୟନ୍ତ ଉଦ୍ୟୋଗୀଙ୍କୁ ଦିଆଯାଇ ନାହିଁ । ଫଳରେ ରାସ୍ତାଘାଟରେ ଅସ୍ଥାୟୀ ଦୋକାନ କରି ବେପାର କରୁଛନ୍ତି ବ୍ୟବସାୟୀ । ପୌର ପରିଷଦ ପକ୍ଷରୁ ଶହ ଶହ ଦୋକାନ ଘର ନିର୍ମାଣ ହୋଇଛି । ହେଲେ ପୌର ପରିଷଦ ସଭ୍ୟଙ୍କ ମଧ୍ୟରେ ତାଳମେଳ ଅଭାବରୁ ଦୋକାନ ଘର ବଣ୍ଟା ଯାଇ ନଥିବା ଅଭିଯୋଗ ହୋଇଛି ।
ପୌର ପରିଷଦ ପକ୍ଷରୁ ବଲାଙ୍ଗୀର ରୋଡ, ସମ୍ବଲପୁର ରୋଡ, ପ୍ରୋଗ୍ରେସ-ଇନ ସମ୍ମୁଖ , ଘୋଡାଘାଟପଡାର କଚେରୀ ଛକ ଓ ସୁରେଶ୍ବରୀ ମନ୍ଦିରର ନିକଟରେ ଶତାଧିକ ଦୋକାନ ଗୃହ ତିଆରି ହୋଇଛି । ଏପରିକି ଦୋକାନ ଘର ବାଣ୍ଟିବା ପାଇଁ ବହୁବାର ବିଜ୍ଞାପନ ମଧ୍ୟ ଦିଆଯାଇଛି । କିନ୍ତୁ ପୁଞ୍ଜିପତିଙ୍କ ଚାପ ଓ କର୍ତ୍ତୃପକ୍ଷଙ୍କ ତାଳମେଳ ଅଭାବରୁ ସେମିତି ପଡି ରହିଛି ଦୋକାନସବୁ । ଏନେଇ ପୌର ପରିଷଦ କାର୍ଯ୍ୟ ନିର୍ବାହୀ ଅଧିକାରୀଙ୍କୁ ପଚାରିବାରୁ ସେ ଉଚ୍ଚ ନ୍ୟାୟାଳୟର ରହିତାଦେଶକୁ ଦୋଷ ଦେଇ କଥାକୁ ଏଡାଇ ଦେଇଛନ୍ତି ।
ଦୀର୍ଘ ବର୍ଷ ହେଲା ଯୁବ ଉଦ୍ୟୋଗୀଟିଏ ଦୋକାନ ଘର ପାଇବାକୁ ଅନେଇ ବସିଛି । ଏପଟେ କିନ୍ତୁ ପ୍ରଶାସନର କଥାରେ ତାଳମେଳ ରହୁ ନଥିବା ଯୋଗୁଁ ନିରାଶ ହେଉଛନ୍ତି ବ୍ୟବସାୟୀ ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
