ସୁବର୍ଣ୍ଣପୁର: ଜିଲ୍ଲା ବୀରମହାରାଜପୁର ଉପଖଣ୍ଡର ହରିହର ଯୋର ମଧ୍ୟମ ଜଳସେଚନରୁ ଚାଷଜମିକୁ ପାଣି ଯୋଗାଇ ଦେବା ପାଇଁ ଦାବି ହେଉଛି। ଏଥର ଖରିଫ ଋତୁରେ ଅନିୟମିତତା ଓ ସ୍ବଳ୍ପ ବୃଷ୍ଟିପାତ ଏବେ ଚାଷୀ ମୁଣ୍ଡବ୍ୟଥାର କାରଣ ହୋଇଛି । ଆସନ୍ନ ମରୁଡ଼ିର ମୁକାବିଲା ପାଇଁ ଜଳସେଚନ ବ୍ୟବସ୍ଥାକୁ ଠିକ ଭାବେ କାର୍ଯ୍ୟକାରୀ କରିବା ପାଇଁ ଦାବି ହେଉଛି।
ଖରିଫ ଋତୁରେ ପ୍ରାୟ ନଅ ହଜାର ଏକର ଚାଷଜମିକୁ ହରିହର ଯୋର ମଧ୍ୟମ ଜଳସେଚନ ପ୍ରକଳ୍ପରୁ ଜଳସେଚିତ କରାଯାଇଥାଏ । ହେଲେ ମାତ୍ର ତିନିଦିନ କେନାଲ ପାଣି ଯୋଗାଇ ଦେଇଥିବାରୁ କେନାଲର ତଳିମୁଣ୍ଡକୁ ପାଣି ପହଞ୍ଚି ପାରିନାହିଁ । ଫଳରେ ତଳି ଅଞ୍ଚଳର ଚାଷ ଜମି ପାଣି ଅଭାବରୁ ଫାଟି ଆଁ କରିଛି।
ଅନ୍ୟପଟେ ବର୍ଷାର ଅଭାବ, ସେପଟେ ଜଳସେଚନ ପ୍ରକଳ୍ପର ଗେଟ ବନ୍ଦ କରି ଦିଆଯିବାରୁ ଚାଷୀମାନଙ୍କ ଭିତରେ ଅସନ୍ତୋଷ ଦେଖା ଦେଇଛି। ଏ ପରିସ୍ଥିତିରେ ଚାଷୀ କିଭଳି ଚାଷ ଜମିକୁ ବଞ୍ଚାଇବ, ଏ ନେଇ ଚାଷୀଙ୍କ ଭିତରେ ଭାଳେଣି ପଡିଛି ।
ତେବେ ରାଜସ୍ବ ବିଭାଗ ଓ ଜଳସେଚନ ବିଭାଗର ପ୍ରତ୍ୟକ୍ଷ ତତ୍ତ୍ବାବଧାନରେ ତଳି ଅଞ୍ଚଳକୁ ଜଳସେଚନ କରିବାକୁ ଚାଷୀ ଦାବି କରିଛି।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
