ସୁବର୍ଣ୍ଣପୁର: ଧାନ ସଂଗ୍ରହ ପ୍ରକ୍ରିୟାରେ ବିଭିନ୍ନ ଦାବି ନେଇ ଚାଷୀଙ୍କ ରାସ୍ତା ଅବରୋଧ । ପଶ୍ଚିମ ଓଡିଶାର କୃଷକ ସଙ୍ଗଠନ ସମନ୍ବୟ ସମିତିର ଡାକରାରେ ସୁବର୍ଣ୍ଣପୁର ଜିଲ୍ଲା କୃଷକ ସଙ୍ଗଠନ ପକ୍ଷରୁ ଶନିବାର ସୁବର୍ଣ୍ଣପୁର-ରେଢାଖୋଲ ମୁଖ୍ୟ ରାସ୍ତାର ଉଫୁଲା ଛକଠାରେ ରାସ୍ତା ଅବରୋଧ କରାଯାଇଛି । ଚାଷୀମାନେ ରାସ୍ତା ଉପରେ ଧାନ ବସ୍ତା ରଖି ପ୍ରତିବାଦ କରିବା ସହ ରାସ୍ତା ରୋକ କରିଛନ୍ତି । ରାଜ୍ୟ ସରକାର ଚାଷୀମାନଙ୍କୁ ଧାନ ବିକ୍ରି କରିବା ପାଇଁ ଟୋକନ ବ୍ୟବସ୍ଥା ଭୁବନେଶ୍ବରରୁ ନ କରି ଜିଲ୍ଲା ସ୍ତରରେ ଟୋକନ ବ୍ୟବସ୍ଥା ଲାଗୁ କରିବା ପାଇଁ ଦାବି କରାଯାଇଛି ।
ସେହିପରି ଫସଲ ଅମଳ ରିପୋର୍ଟ ଆଧାରରେ ଧାନ ବିକ୍ରି କରିବା ପାଇଁ ପଦକ୍ଷେପ ନେବା, ଅଣଜଳସେଚିତ ଅଞ୍ଚଳରେ ରାଜ୍ୟ ସରକାର ଏକର ପିଛା 13 କ୍ବିଇଣ୍ଟାଲ ବଦଳରେ 17 କ୍ବିଇଣ୍ଟାଲ ଧାନ ବିକ୍ରି ପାଇଁ ଅନୁମତି ପ୍ରଦାନ କରିବା ଓ ଜଳସେଚିତ ଅଞ୍ଚଳରେ 25 କ୍ବିଇଣ୍ଟାଲ ପାଇଁ ଅନୁମତି ଦେବା ସହ ବିନା କଟନୀ ଛଟନୀରେ ଧାନ କିଣିବା ଆଦି ଦାବି ରଖିଛି କୃଷକ ସଙ୍ଗଠନ ।
ରାସ୍ତା ରୋକ ଫଳରେ ସୁବର୍ଣ୍ଣପୁର-ରେଢାଖୋଲ, ବିରମହାରାଜପୁର-ସମ୍ବଲପୁର ରାସ୍ତାରେ ଗାଡି ଚଳାଚଳ ବନ୍ଦ ରହିଥିବା ଯୋଗୁଁ ଯାତାୟତ ବାଧାପ୍ରାପ୍ତ ହୋଇଛି । ରାସ୍ତାର ଉଭୟ ପଟରେ ଶହ ଶହ ଗାଡି ମଟର ଅଟକି ରହିଛି । ଦାବି ପୂରଣ ନ ହେବା ଯାଏଁ ଏହି ଆନ୍ଦୋଳନ ଚାଲୁ ରହିବ ବୋଲି କୃଷକ ସଙ୍ଗଠନ ପକ୍ଷରୁ କୁହାଯାଇଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
