ସୁବର୍ଣ୍ଣପୁର: ଜିଲ୍ଲାର ବିନିକା ଅଞ୍ଚଳରେ ଗତ ପାଞ୍ଚଦିନ ଧରି ହାତୀ ଉପଦ୍ରବ ବଢି ବଢି ଚାଲିଛି । ହାତୀପଲ କ୍ଷେତରେ ପଶି ଫସଲ ନଷ୍ଟ କରିବା ସହିତ ଜନବସତିରେ ପଶି ଗ୍ରାମବାସୀଙ୍କ ଘରକୁ ଭାଙ୍ଗିଥିବା ସୂଚନା ମିଳିଛି ।
ସୋମବାର ବିନିକା ରେଞ୍ଜ ସିନ୍ଦୁରପୁର ପଞ୍ଚାୟତର ଗଣେଶପୁର କେଉଟ ପଡାରେ ଏକ ହାତୀପଲ ପଶି ଚୂଡ଼ାମଣି ସେଠୀ,ଅମିତ ନାଏକ ଓ କ୍ଷମାନିଧି ନାଏକଙ୍କ ଘରକୁ ଭାଙ୍ଗିବା ସହ ବ୍ୟାପକ କ୍ଷୟକ୍ଷତି କରିଛନ୍ତି । ତେବେ କାହାର କିଛି କ୍ଷୟକ୍ଷତି ହୋଇନଥିବା ବେଳେ ସନ୍ଧ୍ୟା ହେଲେ ଲୋକଙ୍କ ଭିତରେ ଭୟ ଦେଖା ଦେଉଛି ।
ହାତୀପଲଙ୍କୁ ଘଉଡାଇବା ପାଇଁ ସ୍ଥାନୀୟ ଲୋକଙ୍କ ସହ ବନ ବିଭାଗର ଦୁଇଟି ଟିମ ରାତିତମାମ ନିୟୋଜିତ ହୋଇଛନ୍ତି । ହାତୀ ଘଉଡାଇବା ବେଳେ ବନ ବିଭାଗର ଜଣେ କର୍ମଚାରୀ ଆହତ ହୋଇଥିବା ଜଣା ପଡ଼ିଛି I କ୍ଷୟକ୍ଷତିର ଆକଳନ କରି କ୍ଷତିଗ୍ରସ୍ତଙ୍କୁ ତୁରନ୍ତ କ୍ଷତିପୂରଣ ଯୋଗାଇ ଦେବା ପାଇଁ ଲୋକେ ଦାବି କରିଛନ୍ତି । ଏହାସହିତ ହାତୀପଲ ଜନବସତି ମଧ୍ୟକୁ ନ ପଶିବା ଲାଗି କିଛି ସ୍ଥାୟୀ ବ୍ୟବସ୍ଥା କରିବା ପାଇଁ ସାଧାରଣରେ ଦାବି ହୋଇଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
