ସୁବର୍ଣ୍ଣପୁର: ଲଘୁଚାପ ଜନିତ ଲଗାଣ ବର୍ଷାରେ ବେହାଲ ହେଲେଣି ସୁବର୍ଣ୍ଣପୁରବାସୀ । ପ୍ରବଳ ବର୍ଷାରେ ଜିଲ୍ଲା ମଧ୍ୟ ଦେଇ ପ୍ରଭାବିତ ହେଉଥିବା ମହାନଦୀ ଓ ତେଲନଦୀରେ ଜଳସ୍ତର ବୃଦ୍ଧି ପାଇବାରେ ଲାଗିଛି । ଫଳରେ ହରିହର ଯୋର, ଅଙ୍ଗ ନଦୀ, ସୁକତେଲ, ନିବୃତ୍ତ ଆଦି ନଦୀଗୁଡିକରେ ବଢି ପାଣି ଆସିବାରେ ଲାଗିଛି । ଯଦ୍ବାର ବୀରମହାରାଜପୁର ବ୍ଲକ ପିତାମହୁଲ ନିକଟ ବାଉରୀନାଳ ଉପରେ ପ୍ରାୟ 4ଫୁଟ ଉଚ୍ଚରେ ପାଣି ପ୍ରଭାବିତ ହେଉଛି । ଫଳରେ ସୁବର୍ଣ୍ଣପୁରରୁ ରେଢାଖୋଲକୁ ଯୋଗଯୋଗ ବିଚ୍ଛିନ୍ନ ହୋଇପଡିଛି ।
ବାଉରୀ ନାଳ ଉପରେ ସ୍ଥାନୀୟ ନାବିକମାନେ ଡଙ୍ଗାରେ ସାଇକେଲ, ମୋଟର ସାଇକେଲ ଓ ଯାତ୍ରୀମାନଙ୍କୁ ପାର କରୁଛନ୍ତି । ରାସ୍ତାର ଉଭୟ ପାର୍ଶ୍ବରେ ଗାଡି ମଟର ଅଟକି ରହିଛି । ଗତ 4ଦିନ ଏହି ଲଗାଣ ବର୍ଷା ହେବା ଫଳରେ ସହରର ତଳିଆ ଅଞ୍ଚଳ ପୁରା ଜଳମଗ୍ନ ହୋଇପଡ଼ିଛି ।
ପ୍ରେସ କଲୋନୀ, ଗୋକର୍ଣ୍ଣେଶ୍ବ ପଡା, ପଟାଭାଡି ଅଞ୍ଚଳରେ ଗଳି ରାସ୍ତାମାନଙ୍କରେ 2 ଫୁଟର ପାଣି ଚାଲୁଛି । ସେପଟେ ବର୍ଷା ଯୋଗୁଁ ଲୋକେ ଘରେ ଏକ ପ୍ରକାର ବାନ୍ଧି ହୋଇପଡିଥିବାବେଳେ ନିହାତି ଜରୁରୀ କାର୍ଯ୍ୟରେ ଘରୁ ରାସ୍ତାକୁ ଗୋଡ କାଢୁଛନ୍ତି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
