ସୁବର୍ଣ୍ଣପୁର: ରାସ୍ତା କଡ଼ରୁ ଉଦ୍ଧାର ହେଲା ଏକ ମୃତଦେହ । ସୁବର୍ଣ୍ଣପୁର ଜିଲ୍ଲା ତରଭା ଥାନା ଅନ୍ତର୍ଗତ ବେହେରାମାଲ ଗାଁରେ ପୋଲିସ ଉକ୍ତ ମରଶରୀରକୁ ଉଦ୍ଧାର କରିଛି । ମୃତକ ଅଇଁଲା ପାଲି ଗାଁର 45 ବର୍ଷିୟ ସୁନା ମନହିରା ବୋଲି ଚିହ୍ନଟ କରାଯାଇଛି ।
ଗତ ଦୁଇ ଦିନ ତଳେ ଅର୍ଥାତ ମେ 9 ତାରିଖରେ ନିଜ ପୁତୁରାର ବିବାହ ପାଇଁ ସୁନା ବନ୍ଧପଡା ବଜାରକୁ ସଉଦା କରିଯାଇଥିଲେ । ହେଲେ ସୁନା ବଜାରରୁ ଆଉ ଘରକୁ ଫେରି ନଥିଲେ । ସୁନାଙ୍କ ପରିବାର ଲୋକେ ଦୀର୍ଘ 2ଦିନ ଧରି ନିଜ ଆତ୍ମୀୟ ସ୍ବଜନ ଓ ସମ୍ପର୍କୀୟଙ୍କୁ ସୁନା ସମ୍ପର୍କରେ ପଚାରି ବୁଝୁଥିଲେ ।
ହେଲେ ସୁନାଙ୍କର କୌଣସି ଖବର ମିଳିପାରିନଥିଲା । ହେଲେ ହଠାତ ଶନିବାର ସକାଳୁ ସୁନାଙ୍କ ଗଳିତ ମୃତଦେହ ରାସ୍ତାକଡରେ ପଡିଥିବା ଲୋକେ ଦେଖିବାକୁ ପାଇଥିଲେ । ପରିବାର ଲୋକେ ଘଟଣାସ୍ଥଳକୁ ପହଞ୍ଚି ତାଙ୍କ ଗଳିତ ମୃତଦେହକୁ ଚିହ୍ନଟ କରିବା ସହ ପୋଲିସକୁ ଖବର ଦେଇଥିଲେ ।
ମୃତକ ସୁନାକୁ ତାଙ୍କ ଭାଇ ସାଧୁ ମନହିରା ହତ୍ୟା କରିଥିବା ସୁନାଙ୍କ ପରିବାର ବର୍ଗ ଅଭିଯୋଗ କରିଛନ୍ତି । ତରଭା ପୋଲିସ ଘଟଣାସ୍ଥଳରେ ପହଞ୍ଚି ଗଳିତ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ବ୍ୟବସ୍ଥା କରିଛି । ସେପଟେ ସୁନାଙ୍କ ପରିବାର ଲୋକଙ୍କ ଅଭିଯୋଗ କ୍ରମେ ଏହି ହତ୍ୟାକାଣ୍ଡର ତଦନ୍ତ କରୁଛି ପୋଲିସ ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
