ସୁବର୍ଣ୍ଣପୁର: ଜିଲ୍ଲା ସ୍ଥିତ ବିନିକା ବସଷ୍ଟାଣ୍ଡ ନିକଟରେ ଥିବା ଏକ ହୋଟେଲରେ ନିଆଁ ଲାଗିଯାଇଛି । ଅଗ୍ନିକାଣ୍ଡରେ ବ୍ୟାପକ ସମ୍ପତ୍ତି ନଷ୍ଟ ହୋଇ ଯାଇ ଥିବାବେଳେ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଛି ।
ଗ୍ୟାସ ସିଲିଣ୍ଡର ଫାଟି ହୋଟେଲରେ ଲାଗିଲା ନିଆଁ
ସୂଚନା ଅନୁଯାୟୀ ଆଜି(ଶନିବାର) ସୁବର୍ଣ୍ଣପୁର ସହର ସ୍ଥିତ ବସଷ୍ଟାଣ୍ଡ ନିକଟରେ ଥିବା ସାହୁ ହୋଟେଲରେ ଗ୍ୟାସ ସିଲିଣ୍ଡରରୁ ଗ୍ୟାସ ଲିକହୋଇ ନିଆଁ ଲାଗିଯାଇଥିଲା । ଏଥିରେ ହୋଟେଲରେ ଥିବା ଆସବାବପତ୍ର ପୋଡି ପାଉଁଶ ହୋଇଯାଇ ଥିବାବେଳେ ସେଠାରେ ଥିବା ଫ୍ରିଜ, କୁଲର ଆଦିରେ ମଧ୍ୟ ନିଆଁ ଲାଗି ନଷ୍ଟ ହୋଇଯାଇଛି । ଏପରିକି ପାଖାପାଖି 80 ହଜାର ଟଙ୍କାର ହୋଟେଲ ସାମଗ୍ରୀ ନଷ୍ଟ ହୋଇଥିବା ଅନୁମାନ କରାଯାଉଛି । ଏନେଇ ଖବର ପାଇ ତୁରନ୍ତ ବିନିକା ଦମକଳ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିବା ଜଣାପଡିଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
