ସମ୍ବଲପୁର: ଚଳିତ ମାସ ଅଗଷ୍ଟ 15, 22 ଓ 23 ତାରିଖରେ ପଡୁଥିବା ସପ୍ତାହନ୍ତ ସଟଡାଉନକୁ ସମ୍ବଲପୁର ଜିଲ୍ଲାପାଳ ରଦ୍ଦ କରିଛନ୍ତି। ଏନେଇ ସମ୍ବଲପୁର ଜିଲ୍ଲା ସୂଚନା ଓ ଲୋକସମ୍ପର୍କ ବିଭାଗ ତରଫରୁ ସୂଚନା ଦିଆଯାଇଛି। ପୂର୍ବରୁ ସମ୍ବଲପୁର ଜିଲ୍ଲାରେ କୋରୋନା ସଂକ୍ରମଣ ରୋକିବାକୁ ସମ୍ବଲପୁର ଜିଲ୍ଲାପାଳ ଶୁଭମ ସକ୍ସେନା ଅଗଷ୍ଟ ମାସର ପ୍ରତ୍ୟେକ ଶନିବାର ଓ ରବିବାରକୁ ସଟଡାଉନ ଘୋଷଣା କରିଥିଲେ ।
ତେବେ ଆସନ୍ତା 22 ଓ 23 ତାରିଖରେ ଗଣେଶ ପୂଜା ଓ ନୂଆଁଖାଇ ପଡ଼ୁଥିବାରୁ ଏହି ସଟଡାଉନକୁ ରଦ୍ଦ କରିବାକୁ ସମ୍ବଲପୁର ବିଧାୟକ ଜୟ ନାରାୟଣ ମିଶ୍ର ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଥିଲେ । ଆଜି ସମ୍ବଲପୁର ଜିଲ୍ଲାପାଳଙ୍କ କାର୍ଯ୍ୟାଳୟ ତରଫରୁ ଅଗଷ୍ଟ 15,22 ଓ 23 ତାରିଖରେ ଥିବା ସଟଡାଉନକୁ ରଦ୍ଦ କରାଯାଇଥିବାର ସୂଚନା ଦିଆଯାଇଛି।
ଏହା ବଦଳରେ ଚଳିତ ମାସ 16 ଓ 17 ରେ ଏହି ସଟଡାଉନ ହେବ ବୋଲି କୁହାଯାଇଛି।
ସମ୍ବଲପୁରରୁ ବାଦଶାହା ଜୁସ୍ମନ ରଣା, ଇଟିଭି ଭାରତ
