ସମ୍ବଲପୁର: ମହାମାରୀ କୋରୋନାକୁ ନିଅନ୍ତ୍ରଣ କରିବା ପାଇଁ ଏବେ ସାରା ଦେଶରେ ଜାରି ରହିଛି ଲକଡାଉନ । ଏଭଳି ପରିସ୍ଥିତିରେ ଆର୍ଥିକ ମାନ୍ଦାବସ୍ଥା ଯୋଗୁଁ ସରକାର କୋରୋନା ମୁକାବିଲା ପାଇଁ ଲୋକଙ୍କୁ ଆର୍ଥିକ ସହାୟତା ପାଇଁ ଅନୁରୋଧ କରିଛନ୍ତି । ଏନେଇ ଅନେକ ଲୋକ ଏପରି ବି ଅଛନ୍ତି ଯେଉଁମାନେ ନିଜ ସାମର୍ଥ୍ୟ ଅନୁଯାୟୀ ଲୋକଙ୍କୁ ସାହାଯ୍ୟ କରିବା ସହ ସରକାରଙ୍କ ପାଣ୍ଠିକୁ ଦାନ କରୁଛନ୍ତି ଅର୍ଥ । ଆଉ ଏହି ପରିପ୍ରେକ୍ଷୀରେ ନିଜ ପରିଶ୍ରମର ରୋଜଗାର ସହ ଆଗେଇ ଆସିଛନ୍ତି ସମ୍ବଲପୁରର ଜଣେ ପରିବା ବିକାଳୀ ।
ଏ ହେଉଛନ୍ତି ସମ୍ବଲପୁର ଖଣ୍ଡୁଆଳର ସୁଭ ନାରାୟଣ ଦାସ । ଯିଏ ମୁଖ୍ୟମନ୍ତ୍ରୀ ରିଲିଫ ଫଣ୍ଡକୁ 2 ହଜାର ଟଙ୍କାର ଆର୍ଥିକ ସହାୟତା ପ୍ରଦାନ କରି ନିଜର ମାନବିକତାର ପରିଚୟ ଦେଇଛନ୍ତି। ଛୋଟ ବ୍ୟବସାୟରେ ଅଳ୍ପ ରୋଜଗାର ସତ୍ତ୍ବେ ସେ ନିଜ ଜମା ପୁଞ୍ଜିରୁ କିଛି ଅର୍ଥ ଦାନ କରିଛନ୍ତି । ମଙ୍ଗଳବାର ସେ ନିଜେ ସମ୍ବଲପୁର ଜିଲ୍ଲାପାଳଙ୍କ କାର୍ଯ୍ୟାଳୟରେ ରେଡକ୍ରସ ସୋସାଇଟି ମାଧ୍ୟମରେ ୨ହଜାର ଟଙ୍କା ଦାନ କରି ସମାଜ ପାଇଁ ଲକଡାଉନ ପରିସ୍ଥିତିରେ କିଭଳି ଭଲ କାମ କରାଯାଇପାରେ ସେନେଇ ଉଦାହରଣ ସୄଷ୍ଟି କରିପାରିଛନ୍ତି ।
ସମ୍ବଲପୁରରୁ ବାହଶାହ ଜୁସ୍ମନ ରଣା, ଇଟିଭି ଭାରତ
