ସମ୍ବଲପୁର: ହାତୀ ଆକ୍ରମଣରେ କକା-ପୁତୁରା ମୃତ । ଏଭଳି ଅଭାବନୀୟ ଘଟଣା ଘଟିଛି ଜିଲ୍ଲାର ରେଢ଼ାଖୋଲ ଉପଖଣ୍ଡ ଖୋଲଗୋଡ ସଂରକ୍ଷିତ ଜଙ୍ଗଲରେ । ମୃତକ କକା ହେଉଛନ୍ତି ଦୁସାଶନ ଭୋଇ ଓ ପୁତୁରା ରତିକ ଭୋଇ ।
ମିଳିଥିବା ସୂଚନା ଅନୁଯାୟୀ ଗତକାଲି ସନ୍ଧ୍ୟାରେ ଡିମିରିକୁଦାଗାଁ ପାଖ ଖୋଲଗୋଡ ସଂରକ୍ଷିତ ଜଙ୍ଗଲରେ ଦୁଶାଶନ ଭୋଇ ତାଙ୍କ ୫ବର୍ଷର ପୁତୁରାକୁ ସାଇକେଲରେ ବିଜୟଓ୍ବାଡା-ରାଞ୍ଚି ଜାତୀୟ ରାଜପଥ ରାସ୍ତାରେ ବୁଲାଉଥିବା ବେଳେ ହଠାତ ହାତୀ ରାସ୍ତା ଉପରକୁ ଆସିଥିଲା । ଫଳରେ ହାତୀକୁ ଦେଖି କକା ପୁତୁରା ରାସ୍ତା ପାଖ ଜଙ୍ଗଲକୁ ପଳାଇଥିଲେ । ଏହା ପରେ ହାତୀ ସେମାନଙ୍କୁ ପିଛା କରି ଦଳି ମାରିଦେଇଥିବା ଜଣାପଡିଛି ।
ତେବେ ଘର ଲୋକେ ସନ୍ଧ୍ୟାରେ ଉଭୟଙ୍କୁ ବହୁ ଖୋଜାଖୋଜି କରିବା ପରେ ନପାଇବାରୁ ଆଜି ସକାଳୁ ଗାଁ ଲୋକେ ସାଇକଲ ପଡିଥିବା ଦେଖି ଜଙ୍ଗଲ ମଧ୍ୟକୁ ଯାଇଥିଲେ । ସେଠାରେ ଉଭୟଙ୍କ ମୃତଦେହ ଦେଖି ବନବିଭାଗକୁ ଖବର ଦେଇଥିଲେ । ଏନେଇ ଘଟଣାସ୍ଥଳରେ ବନବିଭାଗପହଞ୍ଚି ତଦନ୍ତ ଆରମ୍ଭ କରିଛି ।
ସମ୍ବଲପୁରରୁ ବାଦସାହା ଜୁସ୍ମନ ରଣା, ଇଟିଭି ଭାରତ