ସମ୍ବଲପୁର: ମହାମାରୀ କୋରୋନା ଭୂତାଣୁର ଭୟବହତାକୁ ରୋକିବା ପାଇଁ ସରକାର ସାରା ଦେଶକୁ 21ଦିନ ପାଇଁ ଲକଡାଉନ ଘୋଷଣା କରିଛନ୍ତି । ଏହି ପରିପ୍ରେକ୍ଷୀରେ ରାଜ୍ୟର ବିଭିନ୍ନ ଜିଲ୍ଲାରେ ଲକଡାଉନ ଗାଇ଼ଲାଇନ ବଜାୟ ରଖିବାକୁ ପୋଲିସ ପ୍ରଶାସନ ପକ୍ଷରୁ ବଳ ପ୍ରୟୋଗ କରାଯାଉଥିବା ଦେଖିବାକୁ ମିଳୁଛି । ତେବେ ସମ୍ବଲପୁର ସହରରେ ଲକଡାଉନକୁ ଦୀର୍ଘ ଦିନ ହୋଇଯାଇଥିଲେ ମଧ୍ୟ ସହରକୁ ଆସୁଥିବା ବାଇକ ଅରୋହୀଙ୍କ ସଂଖ୍ୟା କମିବାର ନାଁ ନେଉନାହିଁ ।
ଏ ଦୃଶ୍ୟ ହେଉଛି ସମ୍ବଲପୁର ସହରର ଏକ ପ୍ରମୁଖ ଛକ କୁହାଯାଉଥିବା ଜେଲ ଛକ । ଛକଟି ସମ୍ବଲପୁର ସହରର ଏକ ମୁଖ୍ୟ ଏଣ୍ଟ୍ରି ପଏଣ୍ଟରେ ହୋଇଥିବାରୁ ପ୍ରତ୍ୟେକ ଦିନ ଏଠାରେ ପୋଲିସ ପ୍ରଶାସନ ତରଫରୁ ଜୋରସୋରରେ ଚେକିଂ ଚାଲିଛି । ଲୋକଙ୍କୁ ତାଗିଦ କରାଯିବା ସହ ସଚେତନତା ସୃଷ୍ଟି କରାଯାଉଛି । ହେଲେ ସ୍ଥିତି ଯଥା ପୂର୍ବମ୍ ତଥା ପରମଂ । ଲୋକେ ସମୟର ସମ୍ବେଦନଶୀଳତାକୁ ବୁଝି ନପାରିବା ଭଳି ବହୁ ସଂଖ୍ୟକ ବାଇକ ଆରୋହୀ ସହରକୁ ଆସୁଛନ୍ତି ଏବଂ ବିଭିନ୍ନ ବାହାନା କରି ପୋଲିସ ସହ ଯୁକ୍ତି କରୁଥିବା ଦେଖିବାକୁ ମିଳୁଛି ।
ତେବେ ପୂର୍ବାପେକ୍ଷା ବାଇକ ଅରୋହୀଙ୍କ ସଂଖ୍ୟାରେ ହ୍ରାସ ପାଇଥିଲେ ମଧ୍ୟ ଯେତେକି ପରିମାଣର ଏମିତି ପରିସ୍ଥିତିରେ କମିବା କଥା ତାହା ହେଉନଥିବା ପ୍ରଶାସନ ଓ ସଚେତନ ନାଗରିକଙ୍କୁ ଚିନ୍ତାରେ ପକାଇଛି । ଏହା ସହ କେତେକ ସ୍ଥାନରେ ଆଳୁ ଓ ପିଆଜ ଦର ଆକାଶ ଛୁଆଁ ହୋଇଥିବା ବେଳେ ଏହାର କଳା ବଜାରୀର ଅଭିଯୋଗ ମଧ୍ୟ ଆସିଲାଣି । ତେଣୁ ଜିଲ୍ଲା ପ୍ରଶାସନକୁ ଏନେଇ ତତ୍ପର ହେବାକୁ ସାଧାରଣରେ ଦାବି ହୋଇଛି ।
ସମ୍ବଲପୁରରୁ ବାଦଶାହା ଜୁସ୍ମନ ରଣା, ଇଟିଭି ଭାରତ
