ସମ୍ବଲପୁର: ବର୍ତ୍ତମାନ ଦେଶରେ ତୃତୀୟ ପର୍ଯ୍ୟାୟ ଲକଡାଉନ ସରି ଆରମ୍ଭ ହୋଇଛି ଚତୁର୍ଥ ପର୍ଯ୍ୟାୟ ଲକଡାଉନ । ଏମିତିରେ ଏହି ତାଲାବନ୍ଦ ଭିତରେ ଗରିବଙ୍କ ପାଇଁ ସରକାର 3 ମାସର ରାସନ ଆଗୁଆ ଦେବାର ନିଷ୍ପତ୍ତି ନେଇ ସାରିଛନ୍ତି । ଆଉ ଏହି ପ୍ରକ୍ରିୟା ସମ୍ବଲପୁରରେ ଏବେ ଖୁବ୍ ସଫଳତାର ସହ ଜାରି ରହିଛି । ବର୍ତ୍ତମାନ ସୁଦ୍ଧା ସମ୍ବଲପୁରରେ ଏହି ଯୋଜନା ଅଧିନରେ 90 ପ୍ରତିଶତ ବିତରଣ କାର୍ଯ୍ୟ ସରିଥିବା ବେଳେ ବଳକା କାର୍ଯ୍ୟ କିଛି ଦିନ ମଧ୍ୟରେ ଶେଷ ହେବା ନେଇ ଆଶ୍ବସ୍ତ କରିଛି ଜିଲ୍ଲା ପ୍ରଶାସନ ।
ସମ୍ବଲପୁର ଜିଲ୍ଲାର ସମ୍ବଲପୁର ମହାନଗର ନିଗମ, କୁଚିଣ୍ଡା ଏନଏସି, ରେଢ଼ାଖୋଲ ଏନଏସି ସମେତ 9ଟି ବ୍ଲକର ପ୍ରତ୍ୟେକ ପଞ୍ଚାୟତରେ ବର୍ତ୍ତମାନ 3 ମାସ ପାଇଁ ଆଗୁଆ ଚାଉଳ, ଡାଲି ଓ କିରାସିନି ଦେବା ପ୍ରକ୍ରିୟା ଜାରି ରଖିଛି ଜିଲ୍ଲା ପ୍ରଶାସନ। ବର୍ତ୍ତମାନ ସୁଦ୍ଧା ସମଗ୍ର ଜିଲ୍ଲାରେ ପାଖାପାଖି 90 ପ୍ରତିଶତ ପିଡ଼ିଏସ ଚାଉଳ ଓ ଡାଲି ବଣ୍ଟା ସରିଥିବା ଜଣାପଡିଛି । ଏଥିପାଇଁ ମୁଖ୍ୟତଃ ଗ୍ରାମାଞ୍ଚଳର ଗରିବ ଶ୍ରେଣୀ ଖୁସି ପ୍ରକାଶ କରିଛନ୍ତି। ଏପରି ଘଡିସନ୍ଧି ମୁହୂର୍ତ୍ତରେ ଅତି କମରେ ଏତିକି ସହାୟତା ତାଙ୍କ ପାଇଁ ଆଶ୍ଵସ୍ତିକର ବିଷୟ ବୋଲି ସେମାନେ କହିଛନ୍ତି।
ଜଣଙ୍କ ପିଛା 15 କେଜି ଚାଉଳ ଓ ରାସନ କାର୍ଡ ପିଛା 3 କେଜି ଡାଲି ମାଗଣାରେ ଦିଆଯାଉଛି । ଏହାସହ ଆକାଉଣ୍ଟରେ 1 ହଜାର ଟଙ୍କା ଓ କିରୋସିନି ମଧ୍ୟ ଦିଆଯାଉଛି । ସମ୍ବଲପୁର ଯୋଗାଣ ବିଭାଗ ତରଫରୁ ମିଳିଥିବା ସୂଚନା ଅନୁସାରେ ସମ୍ବଲପୁର ଜିଲ୍ଲାର ସହରାଞ୍ଚଳ ଓ 9ଟି ବ୍ଲକ ପାଇଁ 1,15,373.23 କ୍ବିଣ୍ଟାଲ ଚାଉଳ, 1,673.64 କ୍ବିଣ୍ଟାଲ ଡାଲି ଓ 8,68,649.46 କ୍ବିଣ୍ଟାଲ କିରାସିନି ଦେବାର ଅନୁମୋଦନ ମିଳିଛି। ଏଥିରୁ ଏଯାବତ୍ 1,07,002.12 କ୍ବିଣ୍ଟାଲ ଚାଉଳ, 6,282.21 କ୍ବିଣ୍ଟାଲ ଡାଲି ଓ 3,59,295 କ୍ବିଣ୍ଟାଲ କିରାସିନି ସମଗ୍ର ଜିଲ୍ଲାର ହିତାଧିକାରୀମାନଙ୍କୁ ଦିଆସରିଛି।
ଏହିଭଳି ଭାବେ ସମଗ୍ର ଜିଲ୍ଲାରେ 92.7 ପ୍ରତିଶତ ପିଡ଼ିଏସ ଚାଉଳ, 91.7 ପ୍ରତିଶତ ଡାଲି ଓ 41 ପ୍ରତିଶତ କିରାସିନି ହିତାଧିକାରୀଙ୍କ ମଧ୍ୟରେ ବଣ୍ଟା ସରିଛି । ଆଗାମୀ ଦିନରେ ବାକି ଥିବା ସମସ୍ତ ଯୋଗ୍ୟ ହିତାଧିକାରୀଙ୍କ ପାଖକୁ 3 ମାସର ରାସନ ଅତି ଶୀଘ୍ର ପହଞ୍ଚିଯିବ ବୋଲି ଜିଲ୍ଲା ପ୍ରଶାସନ ପକ୍ଷରୁ କୁହାଯାଇଛି ।
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ
