ସମ୍ବଲପୁର: କେନ୍ଦ୍ର ସରକାର ଆଣିଥିବା ନାଗରିକତା ସଂଶୋଧନ ଆଇନର ସମର୍ଥନରେ ବାହାରିଛନ୍ତି ସମ୍ବଲପୁରର ବଜରଙ୍ଗ ଦଳ ସମେତ ବହୁ ହିନ୍ଦୁ ସଙ୍ଗଠନ। ଆଇନକୁ ସମର୍ଥନ କରିବା ସହ ଏନେଇ ଜିଲ୍ଲା ପ୍ରଶାସନକୁ ସାକ୍ଷାତ କରିଛନ୍ତି ମିଳିତ ଭାବେ ସହରର ବିଭିନ୍ନ ସଙ୍ଗଠନ।
ଅନ୍ୟପଟେ ଗୁରୁବାର ଭୀମ ଆର୍ମି ନେତୃତ୍ବରେ ସିଏଏ ବିରୁଦ୍ଧରେ ଏକ ଶୋଭାଯାତ୍ର ହେବାର କାର୍ଯ୍ୟକ୍ରମ ଥିବାରୁ, ଏହାକୁ ଅନୁମତି ନଦେବାକୁ ସଙ୍ଗଠନ ପ୍ରଶାସନ ନିକଟରେ ଦାବି କରିଛି। ସମ୍ବଲପୁରରେ ଏହି ଶୋଭାଯାତ୍ରା ହେଲେ ସହରରେ ଆଇନ ଶୃଙ୍ଖଳା ପରିସ୍ଥିତି ବିଗିଡିବାର ସମ୍ଭାବନା ଥିବାରୁ ଏହାକୁ ବିରୋଧ କରିଛନ୍ତି ହିନ୍ଦୁ ସଙ୍ଗଠନର ସଦସ୍ୟ। ଆଜି ସମ୍ବଲପୁର ଏସପିଙ୍କୁ ସାକ୍ଷାତ କରି ବଜରଙ୍ଗ ଦଳର ସଦସ୍ୟ ଗୁରୁବାର ହେବାକୁ ଥିବା ସିଏଏ ବିରୋଧ ଶୋଭାଯାତ୍ରା ପାଇଁ ଅନୁମତି ନ ଦେବା ପାଇଁ ଦାବି କରିଛନ୍ତି।
ହିନ୍ଦୁ ସଙ୍ଗଠନ ଆହୁରି ଅଭିଯୋଗ କରିଛି, ହେବାକୁ ଥିବା ଏହି ଶୋଭାଯାତ୍ରାରେ ବହୁ ଦେଶ ବିରୋଧୀ ତତ୍ତ୍ବ ସାମିଲ ହେବାର ଆଶଙ୍କା ରହିଛି। ଯାହା ଦେଶପାଇଁ ବିପଦ। ସେହି ଦୃଷ୍ଟିରୁ ଆଇନ ବିରୋଧରେ କୌଣସି ଶୋଭାଯାତ୍ରାର ଅନୁମତି ଦିଆନଯାଉ।
ସମ୍ବଲପୁରରୁ ବାଦଶାହା ଜୁଷ୍ମନ ରଣା, ଇଟିଭି ଭାରତ
