ସମ୍ବଲପୁର: ସୁପ୍ରିମକୋର୍ଟଙ୍କ ନିର୍ଦ୍ଦେଶରେ ୨୦୧୯ ଏପ୍ରିଲ ୧ ପୂର୍ବରୁ ପଞ୍ଜୀକୃତ ହୋଇଥିବା ସମସ୍ତ ଗାଡ଼ିରେ ହାଇ ସିକ୍ୟୁରିଟି ରେଜିଷ୍ଟ୍ରେସନ ନମ୍ବର ପ୍ଲେଟ୍ ଲଗାଇବା ବାଧ୍ୟତାମୂଳକ ହୋଇଛି । ସରକାରଙ୍କ ନୂତନ ନିୟମ ଅନୁସାରେ ସବୁ ଗାଡ଼ିରେ ହାଇ ସିକ୍ୟୁରିଟି ନମ୍ବର ଲାଗିବ ( high security number plate ) । ଏଥିପାଇଁ ସରକାରଙ୍କ ଦ୍ଵାରା ସମୟ ନିର୍ଦ୍ଧାରିତ ମଧ୍ୟ ହୋଇଛି । ଏଥିପାଇଁ ରାଜ୍ୟ ସରକାର ସଚେତନତା ମଧ୍ୟ କରୁଛନ୍ତି ତେବେ ସମ୍ବଲପୁରରେ ଅଟୋ ଚାଳକଙ୍କ ପାଇଁ ମୁଣ୍ଡବଥାର କାରଣ ପାଲଟିଛି ଏହି ବ୍ୟବସ୍ଥା । କାରଣ ହାଇ ସିକ୍ୟୁରିଟି ନମ୍ବର ପାଇଁ ଯେଉଁ ସବୁ ଆନୁଷଙ୍ଗିକ ଖର୍ଚ୍ଚ ଆସୁଛି ତାହା ସାଧରଣ ଅଟୋଚାଳକ ଉପରେ ବଡ଼ ଆର୍ଥିକ ବୋଝ ପକାଉଛି । ଫଳରେ ଏବେ 700ରୁ ଊର୍ଦ୍ଧ୍ବ ଅଟୋ ଘରେ ପଡି ରହିଥିବା ଅଭିଯୋଗ ହେଉଛି ।
ବହନ କରି ହେଉନି ଆନୁଷଙ୍ଗିକ ଖର୍ଚ୍ଚ-ସମ୍ବଲପୁରରେ ଅଧିକାଂଶ ଅଟୋ ଚାଳକ ଭଡାରେ ଆଣି ଅଟୋ ଚଳାଇ ପରିବାର ପ୍ରତିପୋଷଣ କରୁଥିବା ବେଳେ ହାଇ ସିକ୍ୟୁରିଟି ନମ୍ବର ପାଇଁ ଆସୁଥିବା ଆନୁଷଙ୍ଗିକ ଖର୍ଚ୍ଚ ବହନ କରିବା ସେମାନଙ୍କ ପାଇଁ କଷ୍ଟକର ହେଉଛି । ମୁଖ୍ୟତଃ ଇସ୍ୟୁରାନ୍ସ ପାଇଁ 8ରୁ 10 ହଜାର ଟଙ୍କା, ଫିଟ୍ନେସ୍ ପାଇଁ ପାଖାପାଖି 1800 ଟଙ୍କା ଏହାସହ ରୋଡ଼ ପରମିଟ, ପଲ୍ୟୁସନ ସାର୍ଟିଫିକେଟ ଇତ୍ୟାଦି ପାଇଁ ମୋଟ 15 ହଜାରରୁ 18 ହଜାର ଟଙ୍କା ଖର୍ଚ୍ଚ ହେଉଛି । ଏଭଳି ସ୍ଥିତିରେ ଏତେ ଟଙ୍କା ଖର୍ଚ୍ଚ କରି ପରେ ହାଇସିକ୍ୟୁରିଟି ନମ୍ବର ପ୍ଲେଟ୍ ଲଗାଇବା ସାଧରଣ ଅଟୋ ଚାଳକ ପାଇଁ କଷ୍ଟକର ବୋଲି କହିଛନ୍ତି ଚାଳକ ।
ବନ୍ଦ ପଡ଼ିଛି ୭୦୦ ଅଟୋ-ସମ୍ବଲପୁର ସହରରେ ମୋଟ 10ହଜାର ଅଟୋ ଚାଳକ ଅଛନ୍ତି । ଏମାନଙ୍କ ମଧ୍ୟରୁ ଅଧିକାଂଶ ଅଟୋ ଭଡାରେ ଚଲାନ୍ତି । ବର୍ତ୍ତମାନ ହାଇ ସିକ୍ୟୁରିଟି ନମ୍ବର ପାଇଁ ଆବଶ୍ୟକ ଆନୁଷଙ୍ଗିକ ଖର୍ଚ୍ଚ ବହନ କରିବା ଏମାନଙ୍କ ପାଇଁ କଷ୍ଟକର ହେଉଛି । ଏଭଳି ସ୍ଥିତିରେ ଅଧିକାଂଶ ଅଟୋ ଚାଳକ ଫାଇନ ଭୟରେ ଗାଡି ଘରୁ ବାହାର କରୁନାହାନ୍ତି । ଫଳରେ ବର୍ତ୍ତମାନ 700 ଅଟୋ ପଡି ରହିଥିବା ଅଭିଯୋଗ ହୋଇଛି । ଅନ୍ୟପଟେ ପୁରୁଣା ଅଟୋଗୁଡ଼ିକର ଫିଟନେସ ପାଇଁ ବହୁତ ବିଳମ୍ବ ହେଉଥିବା ଅଭିଯୋଗ କରିଛନ୍ତି ଅଟୋ ଚାଳକ । ତେଣୁ ଅଟୋ ଚାଳକମାନଙ୍କ ପାଇଁ ସ୍ୱତନ୍ତ୍ର ବ୍ୟବସ୍ଥା ହେବା ଉଚିତ ବୋଲି ଦାବି ହୋଇଛି । ତେବେ ଏନେଇ ସମ୍ବଲପୁର ଜିଲ୍ଲାପାଳ କହିଛନ୍ତି ଯେ, ଏହି ନିୟମ ରାଜ୍ୟସ୍ତରୀୟ ଅଟେ, ଏହା ମାନିବାକୁ ପଡିବ ।
ଅଟୋଚାଳକଙ୍କ ପାଇଁ ସ୍ବତନ୍ତ୍ର ବ୍ୟବସ୍ଥା ଦାବି-ଯେଉଁ ଗାଡିର ଶେଷ ନମ୍ବର ୭ ଓ ୮ ରହିଛି ସେ ଗାଡ଼ିରେ ୨୦୨୩ ଜାନୁଆରୀ ୩୧ ସୁଦ୍ଧା ଏବଂ ଶେଷ ନମ୍ବର ୯ ଓ ୦ ଥିବା ଗାଡ଼ିରେ ୨୦୨୩ ଫେବୃୟାରୀ ୨୮ତାରିଖ ସୁଦ୍ଧା ହାଇସିକ୍ୟୁରିଟି ନମ୍ବର ପ୍ଲେଟ୍ ଲଗାଇବାକୁ ନିର୍ଦ୍ଦେଶ ଦେଇଛନ୍ତି । ନମ୍ବର ପ୍ଲେଟ ଲଗାଇବାରେ ଅଟୋ ଚାଳକଙ୍କର କିଛି ସମସ୍ୟା ନାହିଁ ସମୟ ସୀମା ଆଉ ଟିକେ ବୃଦ୍ଧି କରିବା ସହ ଅଟୋ ଚାଳକମାନଙ୍କ ପାଇଁ ରାଜ୍ୟ ସରକାର ଏକ ସ୍ୱତନ୍ତ୍ର ବ୍ୟବସ୍ଥା କରନ୍ତୁ ବୋଲି ଦାବି ହୋଇଛି ।
ଇଟିଭି ଭାରତ, ସମ୍ବଲପୁର
