ସମ୍ବଲପୁର: ସୂର୍ଯ୍ୟପରାଗ ଯୋଗୁଁ ସମଲେଶ୍ବରୀ ମନ୍ଦିରର ନୀତି ନିର୍ଘଣ୍ଟ ପ୍ରଭାବିତ ହୋଇଛି । ଭୋର ୪ଟାରେ ନୀତିକାନ୍ତି ପରେ ଆସନ୍ତାକାଲି ପର୍ଯ୍ୟନ୍ତ ସମଲେଶ୍ବରୀ ମନ୍ଦିର ବନ୍ଦ ରଖାଯାଇଛି । ଏଥିପାଇଁ ସମଲେଶ୍ବରୀ ମନ୍ଦିରକୁ ଶ୍ରଦ୍ଧାଳୁଙ୍କ ପାଇଁ ସମ୍ପୂର୍ଣ୍ଣ ରୂପେ ବାରଣ କରାଯାଇଛି । ଏନେଇ ସୂଚନା ଦେଇଛନ୍ତି ସମଲେଶ୍ବରୀ ମନ୍ଦିରର ମୁଖ୍ୟ ପୂଜକ ଅମ୍ବିକା ରାୟ । ଆସନ୍ତା କାଲି ସୂର୍ଯ୍ୟୋଦୟ ପରେ ମନ୍ଦିର ଶୋଧନ ପରେ ଭକ୍ତଙ୍କ ପାଇଁ ଖୋଲିବ ମନ୍ଦିର ।
ଆଜି (ମଙ୍ଗଳବାର) ଓଡ଼ିଶାରେ ଆଂଶିକ ସୂର୍ଯ୍ୟପରାଗ ହେବ । ହିନ୍ଦୁନୀତି ଅନୁସାରେ, ଦେବସ୍ଥାନ ଓ ଗୃହ ଗୁଡିକରେ ଦେବକାର୍ଯ୍ୟ ବନ୍ଦ ରହିଥାଏ । ଏହି ପ୍ରଥା ଅନୁସାରେ ବିଭିନ୍ନ ଦେବାଦେବୀ ମନ୍ଦିରରେ ଦେବନୀତି ବନ୍ଦ ରହିଛି । ଆଜି ଚଳିତ ବର୍ଷର ପ୍ରଥମ ଅମବାସ୍ୟା ହୋଇଥିବା ବେଳେ ଏଥିରେ ସୂର୍ଯ୍ୟପରାଗ ଓ ପୂର୍ଣ୍ଣିମାରେ ଚନ୍ଦ୍ରଗ୍ରହଣ ଲାଗିବ । ଏନେଇ ଆଜି ଭୋର ୪ ଘଣ୍ଟା ୫୭ ମିନିଟରୁ ପାକତ୍ୟାଗ ହୋଇଥିବା ବେଳେ ଏହା ପୂର୍ବରୁ ବିଭିନ୍ନ ଦେବାଳୟରେ ସ୍ବତନ୍ତ୍ର ଦେବନୀତି ହୋଇଛି । ଅପରାହ୍ନ ୪ ଟା ୫୬ ମିନିଟ ୫୨ ସେକେଣ୍ଡରେ ଗ୍ରହଣ ସ୍ପର୍ଶ କରିବାକୁ ଥିବାରୁ ଭୋର ୪ ଟା ୫୭ରୁ ଅନ୍ନଭୋଜନ, ପାକତ୍ୟାଗ ଓ ଦେବନୀତି ନିଷେଧ କରାଯାଇଛି ।
