ସମ୍ବଲପୁର: ସ୍ଥାନୀୟ ରେଢାଖୋଲ ବନ ବିଭାଗ ଦ୍ଵାରା ବଡ ଧରଣର ବଜ୍ରକାପ୍ତା ଚାଲାଣ ରାକେଟ ଠାବ । ବେଆଇନ ଭାବେ ବଜ୍ରକାପ୍ତା ଶିକାର କରି ଜିଲ୍ଲା ତଥା ରାଜ୍ୟ ବାହାରକୁ ଚାଲାଣ କରୁଥିବା 7 ଜଣ ପେଷାଦାର ଶିକାରୀ ଓ ବେପାରୀଙ୍କୁ ବନ ବିଭାଗ ଗିରଫ କରିବାରେ ସଫଳ ହୋଇଛି । ଏମାନଙ୍କଠାରୁ 2 କେଜି 600 ଗ୍ରାମ ବଜ୍ରକାପ୍ତା କାତି ଜବତ ହୋଇଛି । ଗିରଫ ଅଭିଯୁକ୍ତମାନେ ହେଲେ ସୁଶୀଲ ସେଠୀ, ଲକ୍ଷ୍ମଣ ସେଠୀ, ଶ୍ରୀରାମ ଶବର, ଶିର ଶବର, ଖିଜୁ ଶବର, ଯଦୁମଣି ପାତ୍ର ଓ ନେପାଳ ସାହୁ ।
ତେବେ ଏହି ଘଟଣାର ଅନ୍ୟ ଜଣେ ଅଭିଯୁକ୍ତ ଫେରାର ଥିବା ଜଣାପଡିଛି । ଗିରଫ ଅଭିଯୁକ୍ତ ମଧ୍ୟରେ ଜଣେ ପୂର୍ବତନ ସରପଞ୍ଚ ମଧ୍ୟ ଅଛନ୍ତି । ଅନ୍ୟପଟେ ଏହି ଘଟଣାରେ ଜଣେ ରାଜନୈତିକ ବ୍ୟକ୍ତିଙ୍କ ଲିଙ୍କ ଥିବା ବନ ବିଭାଗ କହିଛି ଓ ଏହାର ତଦନ୍ତ ଜାରି ରହିଛି ବୋଲି ଡିଏଫଓ କହିଛନ୍ତି । ଏହି ଘଟଣାର ଲିଙ୍କ ଦେବଗଡ, ଅନୁଗୋଳ ଓ କଟକ ଜିଲ୍ଲା ସହ ରହିଛି ଓ ଏହି ଶିକାରୀମାନେ ଅତ୍ୟାଧୁନିକ ଟେକ୍ନୋଲୋଜି ଜରିଆରେ ବେପାର କରୁଥିବା କୁହାଯାଇଛି ।
ଏହି ରାକେଟକୁ ଧରିବା ପାଇଁ ଦୀର୍ଘ 3 ମାସ ହେଲା 6ଟି ରେଞ୍ଜର ବନ ବିଭାଗର ଟିମ ତଦନ୍ତ କରି ଆସୁଥିଲେ ବୋଲି ରେଢ଼ାଖୋଲ ଡିଏଫଓ ସଂଗ୍ରାମ କେଶରୀ ବେହେରା କହିଛନ୍ତି ।
ସମ୍ବଲପୁରରୁ ବାଦଶାହା ଜୁସ୍ମନ ରଣା, ଇଟିଭି ଭାରତ
