ସମ୍ବଲପୁର: ହାତୀ ଆକ୍ରମଣରେ ମା' ପୁଅର ମୃତ୍ୟୁ ଅଭିଯୋଗ । ଏମିତି ଏକ ଲୋମଟାଙ୍କୁରା ଦୃଶ୍ୟ ଦେଖିବାକୁ ମିଳିଛି ସମ୍ବଲପୁର ଜିଲ୍ଲା କୁଚିଣ୍ଡା ଥାନା ଅନ୍ତର୍ଗତ ଅଖରାଦାଣ୍ଡ ଗ୍ରାମରେ ।
ଭୋଜପୁର ଫରେଷ୍ଟ ରେଞ୍ଜ ପକ୍ଷରୁ ମିଳିଥିବା ସୂଚନା ଅନୁଯାୟୀ, ଅଖରାଦାଣ୍ଡ ଗ୍ରାମର ପ୍ରଶାନ୍ତ ମୁଣ୍ଡା, ସ୍ତ୍ରୀ ରୀନା ମୁଣ୍ଡା ଓ 10 ବର୍ଷର ପୁଅ ସାହିଦ ମୁଣ୍ଡା ଇଟାଭାଟି ଶ୍ରମିକ ଭାବେ କାମ କରନ୍ତି । ଆଜି(ବୁଧବାର) ଭୋର 3ଟା ସମୟରେ ଗୋଟିଏ ଦନ୍ତାହାତୀ ଇଟାଭାଟି ପରିସରକୁ ପଶି ଆସିବା ସହ ପ୍ରଶାନ୍ତଙ୍କ ପରିବାର ରହିଥିବା ଘରକୁ ଧସେଇ ପଶି ଆସିଥିଲା ।
ମା' ପୁଅକୁ ହାତୀ ପାଦ ତଳେ ଦଳି ମାରିଦେବା ସହ ବାପାଙ୍କୁ ଶୁଣ୍ଢରେ କଚାଡି ଦେଇଥିଲା । ଯାହାଫଳରେ ଘଟଣାସ୍ଥଳରେ ହିଁ ମା'ପୁଅଙ୍କ ମୃତ୍ୟୁବରଣ କରିଥିଲେ । ଅନ୍ୟପଟେ ଗୁରୁତର ଅବସ୍ଥାରେ ବାପା ପ୍ରଶାନ୍ତଙ୍କୁ ଉଦ୍ଧାର କରାଯାଇଛି । ତାଙ୍କୁ ତୁରନ୍ତ ବୁର୍ଲା ମେଡିକାଲ ସ୍ଥାନାନ୍ତର କରାଯାଇଛି। ଏବେ ତାଙ୍କର ଚିକିତ୍ସା ଚାଲିଥିବା ମେଡିକାଲ ସୂତ୍ରରୁ ଜଣାପଡ଼ିଛି ।
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ
